E Influensia di Hesus Rònt Mundu

“TUR loke Hesus a bisa segun e Evangelionan, tantu den privá komo den públiko, lo no a tuma mas ku dos ora,” e traduktor di Beibel Edgar Goodspeed a skirbi. “Sin embargo e tiki ei tabata asina impaktante, konmovedor i penetrante ku nos por bisa sin mas ku ningun otro hende no a influensiá mundu asina tantu.”

Tempu ku Hesukristu a kaba ku su ministerio terenal na aña 33 di nos era, e tabatin por lo ménos 120 siguidó, tantu hòmber komo muhé. (Echonan 1:15) Awe, mas ku dos mil mion hende ta bisa ku nan ta kristian. Miónes di hende mas ta rekonosé Hesus komo un profeta. No kabe duda ku loke el a siña hende tabatin un influensia notabel riba nan.

Asta lidernan ku no ta kristian a rekonosé e influensia ku Hesus tabatin rònt mundu. Por ehèmpel, e rabi hudiu Hyman Enelow a skirbi: “Hesus a bira e personahe mas popular, ku mas a ser studiá i esun ku mas a influensiá e historia di religion di humanidat.” Tambe Enelow a deklará: “Ken por logra sa tur loke Hesus a nifiká pa humanidat? E amor ku el a lanta den hende, e konsuelo ku el a duna, e bon ku el a impulsá hende pa hasi i e speransa i goso ku el a duna nan—tur esei ta inkomparabel den historia di humanidat. Ni e persona mas famoso di e rasa humano no tabatin e mesun poder di atrakshon ku Hesus. El a bira e personahe mas fasinante den historia.” I e lider hindú Mohandas K. Gandhi a bisa: “Mi no konosé ningun otro hende ku a hasi asina tantu pa humanidat manera Hesus. De echo, no tin nada malu den kristianismo.” Sin embargo, el a agregá: “Ta boso kristiannan ta e problema. Boso ta leu di apliká boso mes siñansanan.”

Evidensia ta mustra ku pa hopi tempu kaba kristiandat no ta kumpliendo ku Hesus su siñansanan. Cecil John Cadoux, historiadó di kristianismo, a komentá ku “e degenerashon gradual i konstante di normanan moral den henter e Iglesia” a hala “atenshon di lidernan kristian for di . . . 140 A.D. kaba.” El a bisa: “E flohamentu di e rigor moral ku tabatin promé aya naturalmente lo kontribuí na e proseso den kua hende lo imitá e komportashon di mundu.”

E proseso aki a aselerá den siglo 4, ora e emperador romano Constantino a aseptá kristianismo. Cadoux a skirbi: “Historiadónan no a keda sin ripará, i algun di nan a lamentá, e echo ku Iglesia a komprometé su mes di un manera asina bergonsoso mediante su pakto ku Constantinus.” Pa hopi siglo djei padilanti, e asina yamá kristiannan a hasi hopi kos malu ku a trese reproche riba e nòmber di Kristu.

Pues, e preguntanan ku nos ke haña kontesta p’e ta: Kiko realmente Hesus a siña hende? I ki efekto su siñansanan mester tin riba nos?

[Plachi na página 3]

“Mi no konosé ningun otro hende ku a hasi asina tantu pa humanidat manera Hesus.”—Mohandas K. Gandhi

[Plachi na página 3]

“Ningun otro hende no a influensiá mundu asina tantu.”—Edgar Goodspeed

[Rekonosementu]

Culver Plachinan