‘Mi Yudansa Ta Bin for di Yehova’

Hóbennan Ku Ta Alabá Yehova Ta Enrikesé Nan Bida

“MI KE lo mihó ku tin den bida!” Asina un mucha hòmber tiner a ekspresá su ekspektativanan. Pero kon un persona hóben por saka lo mihó for di bida? Beibel ta duna un kontesta stret: “Kòrda . . . riba bo Kreadó den e dianan di bo hubentut”!—Eklesiastés 12:1.

Alabá Yehova i sirbié no ta pa hende grandi so. Samuel, yu di Elkana i Ana, tabata hopi yòn ora ku el a bai sirbi Yehova na e tabernakel. (1 Samuel 1:19, 20, 24; 2:11) Un mucha muhé hebreo di edat hóben a demostrá su pleno fe den Yehova ora el a sugerí pa Naaman, kapitan di e ehérsito sirio, bai serka profeta Eliseo pa e por a kura di su lepra. (2 Reinan 5:2, 3) Salmo 148:7 i 12 ta manda tantu mucha hòmber komo mucha muhé alabá Yehova.a Tempu ku Hesus tabatin apénas 12 aña, el a mustra un interes profundo den e sirbishi di su Tata. (Lukas 2:41-49) Mas despues, algun mucha hòmber ku a mira Hesus den tèmpel, debí na nan entrenamentu for di e Skritura, a grita: “Salba, nos ta roga, Yu di David!”—Mateo 21:15, 16, NW.

Alabando Yehova Awe

Awe, tin hopi hóben entre Testigunan di Yehova ku ta orguyoso di nan kreensianan i ku kurashi nan ta papia ku otro hende tokante esei na skol i otro kaminda. Konsiderá dos ehèmpel.

Na Gran Bretaña, e klas di Stephanie di 18 aña tabata papia tokante aborto i otro kuestionnan étiko. E dosente a deklará ku awor hende por lo general ta aseptá aborto i ku ningun mucha muhé no tin motibu pa rechasá e práktika aki. Ora ku tur hende den klas a bai di akuerdo ku e punto di bista aki, Stephanie a sinti su mes obligá na defendé su posishon basá riba Beibel. E oportunidat pa hasi esei a presentá ora ku e dosente a puntra Stephanie kiko e ta pensa. Ounke na promé instante Stephanie tabata nervioso, el a hasi uso di e okashon pa presentá e punto di bista bíbliko. Ku su mes palabranan el a bisa loke Eksodo 21:22-24 [NW] ta bisa i a splika ku si tabata malu pa kousa daño na un yu ku no a nase ainda, anto ta bisto ku aborto lo ta kontra e boluntat di Dios.

E dosente, kende tabata un miembro di klero, nunka a yega di lesa e versíkulonan aki. Stephanie su testimonio duná ku kurashi a hiba na hopi kòmbersashon interesante ku e muchanan di su klas riba vários tópiko. Awor tin un mucha muhé ku ta aseptá e edishonnan mas resien di E Toren di Vigilansia i Spièrta! ku regularidat, i dos otro mucha muhé a asistí na un kongreso di distrito di Testigunan di Yehova pa mira Stephanie batisá komo símbolo di su dedikashon na Dios.

Vareta di seis aña, kende ta biba na Sürnam, a probechá di e oportunidat pa alabá Dios ora ku su yùfrou tabatin mester di konsuelo for di e Skritura. E yùfrou a bin skol bèk despues di un ousensia di tres dia, i el a puntra su alumnonan si nan tabata sa dikon e no tabata na skol. Nan a kontestá, “Yùfrou tabata malu tòg?” E yùfrou a kontestá: “Nò. Mi ruman muhé a muri, i mi ta sinti mi hopi tristu. Pues mi ke pa boso ta ketu.”

E atardi ei miéntras ku Vareta su mama a bai tira un kabes, Vareta tabata drùk ta blader den e revistanan bieu, lesando e títulonan. El a topa E Toren di Vigilansia di 15 di yüli 2001, ku e título “Tin Bida Despues di Morto?” Entusiasmá, el a lanta su mama for di soño i a bisa, “Mami, Mami, wak! Mi a haña un revista tokante morto pa mi yùfrou!” Nan a manda e revista pa e yùfrou huntu ku un karta di Vareta. Vareta a skirbi: “Esaki ta spesialmente pa yùfrou. Den Paradeis bo ta bai mira bo ruman muhé atrobe pasobra Yehova nunka ta gaña. El a primintí ku lo e trese un paradeis, no den shelu, pero riba tera.” E yùfrou a ekspresá su apresio profundo pa e konsuelo basá riba Beibel ku e artíkulonan aki a dun’é.

Trahando pa Futuro

Yehova ta “e Dios felis,” i e ke pa hóbennan ta felis. (1 Timoteo 1:11, NW) Su propio Palabra ta bisa: “Gosa di bo hubentut, gosa tanten bo ta hóben ainda.” (Predikador [Eklesiastés] 11:9, BPK) Yehova ta mira mas leu ku presente i ta konsiente di e konsekuensianan riba largu plaso di tantu bon komo mal komportashon. Ta p’esei su Palabra ta spièrta hóbennan: “Kòrda tambe riba bo Kreadó den e dianan di bo hubentut, promé ku e dianan malu bin i e añanan yega serka, di kualnan lo bo bisa: ‘Mi no tin goso den nan.’”—Eklesiastés 12:1.

Sí, Yehova ta deseá pa hóbennan gosa plenamente di e presioso regalo di bida. Dor di kòrda riba Dios i alab’é, hóbennan por hiba un bida ku ta duna nan satisfakshon i rekompensa. Asta ora nan ta konfrontá difikultat, nan por bisa ku konfiansa: ‘Mi yudansa ta bin for di Yehova.’—Salmo 121:2.

[Nota]

[Komentario na página 9]

‘Alabá Yehova for di tera, . . . tantu yònkuman komo bírgen.’—SALMO 148:7, 12

[Kuadro na página 8]

YEHOVA TA SOSTENÉ HÓBENNAN

“Bo ta mi speransa; o Señor DIOS, bo ta mi konfiansa for di mi hubentut.”—Salmo 71:5.

“[Dios] ta satisfasé bo deseonan ku kosnan bon, asina ku bo hubentut ta wòrdu renobá manera águila.”—Salmo 103:5.