Pregunta di Lektor

Un kristian tin mag di duna un empleado di gobièrnu tep òf regalo pa su servisio, òf lo por konsiderá esei komo soborno?

Na unda ku kristiannan ta biba, nan ta purba desplegá sabiduria práktiko ora di trata ku situashonnan lokal, kòrdando ku loke ta aseptabel i legal den un pais, kisas por ta totalmente inaseptabel i ilegal den un otro pais. (Proverbionan 2:6-9) Klaru ku un kristian mester kòrda semper ku ken ku ke ta un huéspet ‘den Yehova su tabernakel’ mester rechasá soborno òf pasamentu di plaka bou di mesa.—Salmo 15:1, 5; Proverbionan 17:23.

Kiko ta soborno? Segun The World Book Encyclopedia, “soborno ta nifiká duna òf ofresé algu di balor na un . . . funshonario públiko, kende na su turno ta violá su deber òf e lei afin di benefisiá e dunadó.” Pues, sin importá unda bo ta biba, duna plaka òf regalo na un hues òf un agente polisial pa nan no kumpli ku lei òf na un inspektor pa e ignorá un defekto òf un violashon di lei, ta soborno. Loke tambe ta kai bou di soborno ta dunamentu di regalo pa risibí trato preferensial, por ehèmpel pa laga bo nòmber bai promé riba un lista di espera òf pa pasa dilanti di otro hende pará den rei. Tal proseder ta revelá tambe un falta di amor.—Mateo 7:12; 22:39.

Pero ta soborno pa duna regalo òf tep na, laga nos bisa, un sirbidó públiko afin di optené un servisio legítimo òf pa evitá trato inhustu? Por ehèmpel, den algun pais funshonarionan kisas no ta dispuesto pa inskribí mucha na skol, atmití un persona den hospital òf stèmpel dokumentonan di imigrashon sino te ora nan haña tep. Òf nan por tarda pa prosesá solisitutnan pa renobá lisensia òf pèrmit.

E kustumber di duna tep i e aktitut general pa ku esei ta varia di un pais pa otro. Kaminda tal pagonan ta e kustumber òf hende ta ferwagt nan, algun kristian kisas ta sinti ku tanten esei no ta violá lei, nan no ta violando prinsipio bíbliko ora nan duna un funshonario tep pa kumpli ku su deber. Den algun pais hende ta asta mira e pagonan ei komo un regalo pa suplementá e salario abou di un empleado públiko. E kos importante ta pa kòrda ku tin un diferensia den duna un regalo pa haña un servisio legítimo i ofresé un soborno pa haña un fabor ilegal.

Di otro banda, tin Testigunan di Yehova ku ora nan ta hasi petishonnan legítimo ta nenga di duna tep na inspektornan, funshonarionan di duana òf otro hende, asta kaminda tal dunamentu di regalo ta un kustumber. Komo ku lokalmente e Testigunan ta konosí tantu pa e posishon aki basá riba nan konsenshi komo pa nan onrades, nan sa haña trato ku mayoria hende ta haña solamente despues di duna tep òf regalo.—Proverbionan 10:9; Mateo 5:16.

En resúmen, kada sirbidó di Yehova tin ku disidí pa su mes si lo e duna tep pa risibí un servisio legítimo òf pa evitá un trato inhustu. Riba tur kos, e mester sigui un proseder ku ta lag’é ku un bon konsenshi, ku no ta trese reproche riba e nòmber di Yehova i ku no ta trompeká otro hende.—Mateo 6:9; 1 Korintionan 10:31-33; 2 Korintionan 6:3; 1 Timoteo 1:5.