“Un di e Mihó Dianan di Mi Bida”

“DEPRESHON ta e problema di salú mental ku mas ta ser registrá, i posiblemente esun ku mas ta resaltá bou di hóbennan,” segun Beyondblue, un organisashon supsidiá pa gobièrnu na Oustralia. Estudionan ta revelá ku pa aña mas o ménos 100.000 oustraliano hóben ta sufri di depreshon.

Hóbennan kristian tambe por sufri di depreshon. Sin embargo, fe den Yehova a yuda hopi di nan vense sintimentunan negativo i probechá bon di nan hubentut. Dor di esei, nan ta kousa bon impreshon riba otro hende. Kon asina?

Tuma por ehèmpel e eksperensia di Claire di 18 aña di edat. E ku su mama ta asistí na un kongregashon di Testigunan di Yehova na Melbourne. Tempu Claire su tata a bai laga e famia, Claire a kai den depreshon. Pero su fe den su Tata selestial, Yehova, a keda fuerte. Riba un dia e dòkter di famia, Lydia, a yama na kas di Claire pa wak kon a sigui ku e mama kende tabata malu. Anto el a ofresé bondadosamente pa hiba Claire na un sentro komersial p’e hasi kómpras. Na kaminda el a puntra Claire si e tin mucha hòmber. Claire a splik’é ku komo Testigu di Yehova, e no sa ‘date’ mucha hòmber. Esaki a sorprendé e dòkter. Despues Claire a splik’é kon Beibel a yud’é tuma desishonnan sabí den bida. Finalmente, Claire a ofresé pa trese p’e dòkter un publikashon basá riba Beibel ku a yuda e mes masha hopi. Esei tabata e buki Loke hovenan sa puntra—Contesta práctica.

Tres dia despues ku Lydia a risibí e buki, el a yama Claire su mama na telefòn pa bis’é kuantu el a disfrutá di e buki ora el a les’é. Anto el a pidi seis buki mas pa su koleganan. Ora Claire a entregá e bukinan, e dòkter a splik’é kon impreshoná el a keda ku su fe. Claire a ofresé pa studia Beibel kuné, i e dòkter a aseptá.

Pa vários luna, Claire a kondusí e estudio durante e dòkter su pousa di mèrdia. Despues Lydia a puntra Claire si e kier a papia na un seminario riba e tópiko di depreshon bou di hóbennan. Ounke Claire tabatin poko miedu, el a bai di akuerdo. Mas ku 60 persona a asistí na e seminario. Kuater profeshonal di salú mental—tur tabata adulto—a papia ku e presentenan. Despues tabata Claire su bùrt di papia. El a resaltá kon importante ta pa hóbennan tin un amistat ku Dios. El a splika ku Yehova Dios tin interes profundo den hóbennan i ta yuda tur ku ta akudí na dje en buska di sosten i konsuelo. Ademas, el a ekspresá su konvikshon ku pronto Yehova lo eliminá tur tipo di enfermedat físiko i mental. (Isaias 33:24) Kiko tabata e resultado di e bunita testimonio aki?

Claire a bisa: “Despues di e seshon hopi hende a aserká mi pa bisa mi kon impreshoná nan a keda pa tende un hóben papia tokante Dios. . . . Mi a laga 23 ehemplar di e buki Loke hovenan sa puntra. Tres hobensita den e ouditorio a duna mi nan number di telefòn. Aworakí un di e mucha muhénan aki ta studiando Beibel. Tabata un di e mihó dianan di mi bida.”