Historia di Bida
Sa Loke Ta Korekto, Anto Hasié
SEGUN E RELATO DI HADYN SANDERSON
Hesus a yega di bisa su apòstelnan: “Si boso sa e kosnan aki, boso ta bendishoná si boso hasi nan.” (Juan 13:17) Sí, tal bes nos sa loke ta korekto, pero tin biaha ta pa hasié ta e kos! Pero, awor ku mi tin mas ku 80 aña di edat, di kua 40 mi a sirbi komo misionero, mi ta konvensí ku Hesus su palabranan ta sierto. Esun ku ta hasi loke Dios ta bisa lo ta berdaderamente felis. Laga mi splika dikon.
NA 1925, tempu mi tabatin tres aña, mi mayornan a asistí na un diskurso bíbliko den nos stat, Newcastle, Oustralia. E diskurso, “Miónes di Hende na Bida Awor Lo No Muri Nunka,” a konvensé mi mama ku el a haña e bèrdat, i el a kuminsá asistí na e reunionnan kristian regularmente. Pero e interes di mi tata sí a mengua rápidamente. El a oponé mi mama su fe nobo i a menasá di bai for di kas si mi mama no a renunsiá su fe. Mi mama tabata stima mi tata i kier a mantené nos famia huntu. No opstante, e tabata sa ku obedensia na Dios tabata mas importante ku esei, i e tabata determiná pa hasi loke ta korekto den Su bista. (Mateo 10:34-39) Mi tata a bai laga nos, i despues mi tabata mir’é solamente de bes en kuando.
Mirando bèk, mi ta atmirá mi mama su lealtat na Dios. Su desishon a hiba na un bida di bendishon spiritual tantu pa ami komo mi ruman muhé mas grandi, Beulah. Ademas, el a siña nos un lès importante: ora nos sa loke ta korekto, nos tin ku hasi esfuerso pa hasié.
Pruebanan di Fe
E Studiantenan di Beibel, manera Testigunan di Yehova tabata wòrdu yamá e tempu ei, a yuda nos famia masha tantu. Mi wela a bin biba serka nos i e tambe a aseptá e bèrdat di Beibel. E ku mi mama a bira kompañeranan inseparabel den e trabou di prediká. Nan aparensia digno i amabilidat a gana e rèspèt di hopi hende.
Miéntras tantu, ruman hòmbernan kristian mas grandi a tuma mi bou di nan kuido i a duna mi entrenamentu balioso. Mi a siña lihé kon pa usa karchi di testimonio pa duna presentashonnan simpel na kas di hende. Tambe mi tabata presentá diskursonan bíbliko grabá riba un tokadisko portátil i tabata partisipá den marchanan ku pankarta den e kaya prinsipal di stat. Esaki no tabata fásil pasobra mi tabatin miedu di hende. Sin embargo, mi tabata sa loke tabata korekto i mi tabata determiná pa hasié.
Despues ku mi a kaba skol, mi a kuminsá traha na un banko. Mi trabou a pone ku mi tabatin ku bishitá vários sukursal di e banko rònt e estado di New South Wales. Ounke tabatin masha poko Testigu den e parti ei di e pais, e formashon ku mi a haña a yuda mi mantené mi fe bibu. Mi mama tabata skirbi mi kartanan di animashon i eseinan a fortalesé mi spiritualmente.
E yudansa ku mi a haña via di e kartanan ei a yega nèt na tempu. Segundo Guera Mundial a kuminsá, i outoridatnan a manda yama mi pa drenta servisio militar. E gerente di banko tabata un fiel baidó di misa i un komandante militar di e área ei. Ora mi a splik’é mi posishon neutral komo kristian, el a duna mi un ultimátum: sea sali for di mi religion òf pèrdè mi trabou na banko! Kosnan a yega na un punto kulminante ora mi a raportá na e sentro lokal di reklutamentu pa e ehérsito. E gerente tabata presente i a wak ku hopi interes ora mi a aserká e mesa di registrashon. Na momento ku mi a nenga di firma e papelnan di registrashon, e ofisialnan a rabia pisá. Tabata un momento di hopi tenshon, pero mi tabata determiná pa hasi loke ta korekto. Ku yudansa di Yehova, mi a keda kalmu i desididu. Ora mi a haña sa despues ku algun hende violento tabata buska mi problema, mi a paketá mi kosnan lihé i kohe e siguiente trein pa sali for di e stat!
Despues ku mi a regresá Newcastle, outoridatnan a hiba mi korte huntu ku shete otro ruman hòmber ku a nenga di drenta servisio militar. E hues a sentensiá nos na tres luna di prizon ku trabou fòrsá. Ounke prizon tabata un eksperensia desagradabel, e echo ku mi a hasi loke tabata bon a trese su bendishonnan. Despues ku nos a sali liber, Hilton Wilkinson, un otro Testigu ku tabata será den sèl huntu ku mi, a invitá mi pa traha p’e den su studio di saka i laba potrèt. Ei mi a topa mi futuro esposa, Melody, kende tabata traha n’e negoshi komo resepshonista. Djis despues ku nos a sali liber, mi a batisá komo símbolo di mi dedikashon na Yehova.
Mi A Pone e Meta di Sirbishi di Tempu Kompletu
Despues ku nos a kasa, ami ku Melody a habri nos mes studio na Newcastle. Den poko tempu nos tabata haña asina tantu trabou ku nos salú i kondishon spiritual a kuminsá bai atras. Rònt di e tempu ei, Ted Jaracz, kende tabata sirbi na e sukursal di Testigunan di Yehova na Oustralia i kende awor ta miembro di e Kuerpo Gobernante di Testigunan di Yehova, a papia ku nos tokante nos metanan spiritual. Despues di e kòmbersashon ei, nos a disidí di bende nos negoshi i simplifiká nos bida. Na 1954 nos a kumpra un trailer chikitu, muda bai e stat di Ballarat den e estado di Victoria i kuminsá sirbi komo pionero, òf predikadó di tempu kompletu.
Yehova a bendishoná nos esfuersonan pa sirbi den e kongregashon chikitu na Ballarat. Den 18 luna, e kantidat di personanan ku tabata asistí n’e reunionnan a oumentá di 17 pa 70. Despues nos a haña un invitashon pa kuminsá e trabou di sirkuito, òf di superintendente biahero, den e estado di Sur Oustralia. Pa e siguiente tres añanan nos tabatin e trabou agradabel di bishitá kongregashonnan den e stat di Adelaide i den e regionnan di produkshon di biña, i lamunchi ku apelsina banda di Riu Murray. Tur esei a nifiká un kambio grandi den nos bida! Nos tabata kontentu di por a sirbi den kompania di rumannan amoroso. I e echo ku nos a hasi loke segun nos tabata korekto a resultá den un berdadero bendishon!
Asignashon Komo Misionero
Na 1958 nos a informá e sukursal di Oustralia di nos intenshon pa asistí na e Asamblea Internashonal “Boluntat Divino” na New York mas lat den e aña ei. Nan a kontestá nos dor di manda formularionan di aplikashon pa e skol di Galaad pa misionero na Merka. Siendo ku nos tabatin 30 i piku aña, nos a pensa ku nos tabata muchu bieu pa asistí na Galaad. Asina mes nos a manda nos aplikashonnan i nos a haña e invitashon pa asistí na e di 32 klas. Na mitar di e kurso, nos a risibí nos asignashon komo misionero, lokual tabata India! Apesar ku na prinsipio nos tabatin poko miedu, nos kier a hasi loke tabata korekto i gustosamente a aseptá nos asignashon.
Un mainta trempan na 1959, nos a yega Bombay (awor Mumbai) ku barku. Tabatin sientos di obrero drumí na aire liber tur plamá riba waf, i nos a sinti un holó straño. Ora solo a sali, nos a haña un idea di loke nos por a spera. Nunka promé nos a sinti tantu kalor asina! Un pareha misionero, Lynton i Jenny Dower, ku a traha komo pionero huntu ku nos na Ballarat, a bin risibí nos. Nan a hiba nos n’e sukursal i Kas di Bètel di India, ku tabata konsistí di un apartamento chikitu parti ariba, situá pegá ku sentro di siudat. Einan tabata biba seis trahadó boluntario di Bètel. Ruman Edwin Skinner, kende a sirbi komo misionero na India for di 1926, a konsehá nos pa kumpra dos maleta di paña di bela promé ku nos a sigui pa nos asignashon. Kasi tur hende ku tabata biaha den e treinnan na India tabatin e maletanan aki i nan tabata útil durante nos biahenan mas despues.
Despues di un biahe di dos dia den trein, nos a yega nos asignashon na Tiruchchirappalli, un stat den e estado sur di Madras (awor Tamil Nadu). Ei nos a djòin tres pionero spesial di India ku tabata prediká den un poblashon di 250.000 hende. E kondishonnan di bida tabata simpel. Un biaha nos a sobra ménos di 4 dòler den nos saku. Pero ora e plaka ei a kaba, Yehova no a laga nos na kaya. Un persona ku tabata studia Beibel a fia nos plaka pa hür un kas apropiá pa tene e reunionnan. Un dia ku nos no tabatin muchu kuminda, un bisiña tabatin e bondat di trese kuminda ku el a prepará ku curry pa nos. Mi a gust’é, pero e tabata asina pikante ku el a pone mi hik!
Den Sirbishi di Vèlt
Ounke algun hende na Tiruchchirappalli tabata papia ingles, e mayoria tabata papia tamil. P’esei, nos a hasi hopi esfuerso pa siña un presentashon simpel pa sirbishi di vèlt den e idioma ei. Ku esei nos a gana e rèspèt di hopi hende lokal.
Nos a disfrutá kabalmente di e sirbishi di kas pa kas. Di naturalesa e hendenan di India ta hospitalario, i mayoria tabata invitá nos drenta pa kome òf bebe algu. Siendo ku e temperatura hopi biaha tabata laba den kareda di 40 grado Celsius, nos tabata masha gradisidu pa nan hospitalidat. Promé ku nos presentá nos mensahe, nos tabatin ku mustra bon manera dor di papia di nos bida personal. Hopi bes e doñonan di kas tabata puntra ami ku mi kasá: “Di unda boso ta? Boso tin yu? Pakiko nò?” Riba e punto aki, hopi bes nan tabata ofresé pa rekomendá nos un bon dòkter! E kòmbersashonnan ei a permití nos introdusí nos mes i splika e importansia di nos obra di siña hende tokante Beibel.
Mayoria hende ku nos tabata prediká na dje tabata di e religion hindú. Nan kreensianan ta hopi distinto for di kristianismo. En bes di debatí riba e siñansanan kompliká di filosofia hindú, nos tabata simplemente prediká e bon nobo di e Reino di Dios, anto ku bon resultado. Den seis luna, kasi 20 persona a kuminsá asistí n’e reunionnan na nos kas di misionero. Un di e personanan aki tabata un ingeniero sivil ku yama Nallathambi. Despues, e ku su yu hòmber Vijayalayan a yuda rònt di 50 persona bira sirbidó di Yehova. Vijayalayan a sirbi pa un tempu tambe n’e sukursal di India.
Konstantemente di Biahe
Nos no tabatin ni seis luna na India dia nan a invitá mi pa sirbi komo e promé superintendente di distrito permanente di e pais. Esei a nifiká biaha rònt India, organisá asamblea i traha huntu ku nuebe diferente grupo di idioma. Tabata un trabou duru. Nos a paketá nos pañanan i ekipo pa seis luna den tres valis di heru i nos maletanan konfiabel di paña di bela i a sali ku trein for di e stat di Madras (awor Chennai). Siendo ku e teritorio ku e distrito a abarká tabatin un omtrek di mas o ménos 6.500 kilometer, nos tabata biaha konstantemente. Na un okashon, nos a kaba ku un asamblea den e stat sur di Bangalore riba djadumingu. Despues nos a biaha direkshon nort pa Darjeeling na pia di e serunan di Himalaya pa sirbi na un otro asamblea e siguiente siman. E biahe pa yega Darjeeling tabata mas o ménos 2.700 kilometer i nos a kambia trein sinku biaha.
Durante e biahenan di e tempunan ei, nos tabata gusta pasa e pelíkula E Sosiedat di Mundu Nobo den Akshon. E obra aki a laga e hendenan konosé e aktividatnan i alkanse di Yehova su organisashon aki riba tera. Na vários okashon, hopi hende tabata asistí na e presentashonnan aki. Un biaha nos a presentá e pelíkula na un grupo di hende ku a reuní kantu di un kaminda. Miéntras e pelíkula tabata pasando a forma un mal tempu i nubianan kargá tabata biniendo hopi lihé den nos direkshon. Ya ku un biaha kaba un multitut a kuminsá hasi bochincha ora nos a para e pelíkula, mi a disidí di sigui ku e presentashon pero na un spit mas haltu. Afortunadamente, e pelíkula a kaba sin insidente na momento ku e promé spatnan di awa a kuminsá kai.
Den e siguiente añanan, ami ku Melody a bishitá mayoria parti di India. Siendo ku kada region tabatin su kuminda, bistí, idioma i paisahenan típiko, ta komo si fuera nos tabata biaha di un pais pa otro. E variedat den Yehova su kreashon ta berdaderamente maravioso! Esaki ta konta tambe pa animalnan den e naturalesa di India. Un biaha, miéntras nos tabata kamper den e mondinan di Nepal, nos a haña un bon bista di un tiger enorme. Tabata un animal impreshonante. E bista aki a duna nos mas deseo ainda pa biba den Paradeis, kaminda finalmente lo tin pas entre hende ku bestia.
Mehorashonnan Organisatorio
E tempunan aya tabatin e nesesidat pa e rumannan na India pega mas na Yehova su areglonan di organisashon. Den algun kongregashon, e hòmbernan tabata sinta na un banda di e sala di reunion miéntras e muhénan tabata sinta na e otro banda. Rara bes e reunionnan tabata kuminsá na tempu. Na un lugá, nan tabata bati bèl pa yama e publikadónan di Reino na reunion. Den otro áreanan, publikadónan tabata kana drenta un pa un ora solo a alkansá un sierto posishon den shelu. Asambleanan i bishitanan di superintendentenan biahero tabata iregular. E rumannan tabata dispuesto pa hasi loke tabata korekto, pero mester a entrená nan.
Na 1959, e organisashon di Yehova a instituí e Skol di Ministerio di Reino. E programa mundial di entrenamentu aki a yuda superintendentenan di sirkuito, pioneronan spesial, misioneronan i ansianonan di kongregashon kumpli ku nan responsabilidatnan bíbliko na un manera mas efikas. Ora e skol a kuminsá na India na desèmber 1961, ami tabata e instruktor. Gradualmente, e kongregashonnan rònt e pais a kuminsá sinti e efektonan di e skol aki, i nan a progresá rápidamente. Unabes e rumannan tabata sa loke ta korekto, e spiritu di Dios a motivá nan pa apliká loke nan a siña.
Kongresonan grandi tambe a animá i unifiká e rumannan. Un asamblea ku a sobresalí tabata e Asamblea Internashonal “Bon Nobo Eterno” na New Delhi tené na 1963. Testigunan for di tur parti di India a biaha míles di kilometer pa asistí na e asamblea ei. Hopi di nan a gasta tur loke nan tabatin di spar pa hasi esei. Siendo ku tabatin 583 delegado di 27 otro pais tambe presente, tabata pa promé bes ku e Testigunan lokal por a reuní i asosiá ku un gran kantidat di ruman bishitante.
Na 1961, ami ku Melody a ser invitá pa bira parti di e famia di Bètel na Bombay, kaminda despues mi a sirbi komo miembro di e Komité di Sukursal. Mi a haña mas privilegio. Pa hopi aña, mi a sirbi komo superintendente di zona den vários parti di Asia i Medio Oriente. Siendo ku e trabou di prediká tabata prohibí den hopi di e paisnan aki, e publikadónan lokal mester tabata “kouteloso manera kolebra i inosente manera palomba.”—Mateo 10:16.
Ekspanshon i Kambionan
Na 1959, ora nos a yega India pa promé biaha, tabatin 1.514 publikadó aktivo den e pais. Awe, e kantidat ei a oumentá te na mas ku 24.000. Pa akomodá e kresementu aki, nos a muda dos biaha bai un Bètel nobo na Bombay òf den serkania di dje. Anto, na mart 2002, e famia di Bètel a bolbe muda—e biaha aki pa un kompleho nobo konstruí banda di Bangalore, den sur di India. Aktualmente tin 240 miembro di Bètel ta biba den e fasilidat moderno aki i un grupo di nan ta tradusí literatura bíbliko na 20 idioma.
Ounke ami ku Melody tabata ansioso pa muda pa Bangalore, na 1999 enfermedat a obligá nos regresá Oustralia. Awor nos ta sirbi komo miembro di e famia di Bètel na Sydney. Ounke nos a bandoná India, e amor ku nos tin pa nos amigunan stimá i yunan spiritual den e pais ei ta keda fuerte. Ta hopi dushi pa risibí karta for di nan!
Mirando bèk riba mas ku 50 aña di sirbishi di tempu kompletu, ami ku Melody ta sinti nos rikamente bendishoná. Un tempu nos tabata traha pa konserbá imágen di hende riba potrèt, pero nos eskoho pa traha pa konserbá hende na bida den e memoria di Dios tabata muchu mas mihó. E desishon di pone e boluntat di Dios na promé lugá den nos bida a trese eksperensianan presioso! Sí, hende ku ta hasi loke Dios ta bisa ta korekto en bèrdat lo ta felis!
[Mapanan na página 15]
(Pa e teksto den su formato kompleto, wak e publikashon)
INDIA
New Delhi
Darjeeling
Bombay (Mumbai)
Bangalore
Madras (Chennai)
Tiruchchirappalli
[Plachinan na página 13]
Hadyn ku Melody na 1942
[Plachi na página 16]
E famia di Bètel na India, 1975