Biba na Armonia ku Dios Su Propósito Awe
“[Kristu] a muri pa tur, pa esnan ku ta biba no biba mas pa nan mes.”—2 KORINTIONAN 5:15.
1. Relatá un eksperensia ku un misionero tabatin den su asignashon.
“NOS outo tabata e promé vehíkulo no-militar ku a drenta e pueblito afrikano alehá ei despues ku e guera sivil a terminá.” Asina un misionero ku yama Aaron ta konta.a “Komo ku nos a pèrdè tur kontakto ku e kongregashon chikitu den e pueblo ei, nos mester a atendé e nesesidatnan di e rumannan. Ademas di a hiba kuminda, paña i literatura bíbliko pa nan, nos a hiba e vidio Testigonan di Jehova—E Organisacion Tras dje Nomber.b E “teater” kaminda nos a hasi e presentashon a konsistí simplemente di un televishon i un vidiokasètrikòrder den un hùt grandi di pal’i maishi, i asina tantu hende a basha bin pa wak e vidio ku nos mester a pas’é dos biaha. Tur dos presentashon a produsí hopi estudio di Beibel. Tabata bisto ku nos esfuerso a bale la pena.”
2. (a) Dikon kristiannan ta determiná pa usa nan bida den Dios su sirbishi? (b) Ki preguntanan nos ta bai trata awor?
2 Dikon Aaron ku su kompañeronan a tuma un asignashon asina difísil? Pasobra nan ta sinti gratitut pa e sakrifisio di reskate di Hesukristu, i e gratitut ei a motivá nan pa dediká nan bida na Dios. P’esei, nan ke usa nan bida na armonia ku Dios su propósito. Meskos ku nan, asina tur otro kristian dediká a disidí firmemente di “no biba mas pa nan mes.” Mas bien, nan ta hasi tur loke ta den nan poder “pa kousa di evangelio.” (2 Korintionan 5:15; 1 Korintionan 9:23) Nan sa ku ora e fin di e sistema di kosnan aki yega, ni tur e plaka ni prestigio na mundu lo no ta di ningun balor. P’esei, miéntras ku nan tin bida i un grado di salú, nan ke usa esakinan na armonia ku Dios su propósito. (Eklesiastés 12:1) Kon nos por hasi esaki? Unda nos por haña e kurashi i forsa nesesario pa hasié? I ki diferente maneranan tin pa nos sirbi Dios?
Dal Pasonan Práktiko i Progresivo
3. Ki pasonan básiko entre otro un hende mester dal pa hasi Dios su boluntat?
3 Pa un kristian berdadero, hasimentu di Dios su boluntat ta algu ku e ta kumpli kuné durante henter su bida. Generalmente nos ta kuminsá ku pasonan básiko manera inskribí den e Skol di Ministerio Teokrátiko, lesa Beibel tur dia, partisipá den e trabou di prediká i progresá te na boutismo. Segun ku nos ta progresá, nos ta tene e siguiente palabranan di apòstel Pablo na mente: “Perkurá pa e kosnan aki; sea dediká na nan, pa bo progreso por ta bisto pa tur hende.” (1 Timoteo 4:15) E progreso ku nos hasi no ta pa nos por broma, sino pa demostrá ku nos ta determiná pa hasi Dios su boluntat sin egoismo. Asina nos ta mustra ku nos ta laga Dios guia nos pasonan den tur área di bida, i Dios por hasi esei hopi mas mihó ku nos.—Salmo 32:8.
4. Kon nos por vense miedu innesesario?
4 Pero si nos ta duda pa aktua òf ta preokupá muchu ku nos mes, esei por stroba nos di progresá den sirbishi di Dios. (Eklesiastés 11:4) P’esei, pa nos por haña berdadero goso sirbiendo Dios i otro hende, kisas nos tin ku kuminsá na vense miedu. Erik, por ehèmpel, tabata pensando pa bai sirbi den un kongregashon di otro idioma. Pero e tabata pensa: ‘Lo mi sinti mi na kas den e kongregashon? Lo mi gusta e rumannan? Nan lo gusta mi kompania?’ E ta konta: “Dado momento mi a realisá ku mi mester ta mas interesá den e rumannan ku den mi mes. Mi a disidí di stòp di preokupá anto djis hasi tur loke mi por pa yuda otronan. Mi a pidi yudansa den orashon i a dal bai. Awor mi ta disfrutá inmensamente di mi sirbishi huntu ku e kongregashon ei.” (Romanonan 4:20) Sí, mas nos duna di nos mes pa sirbi Dios i hende, mas goso i satisfakshon nos mes ta haña.
5. Dikon nos mester plania nos asuntunan bon pa nos por biba na armonia ku Dios su propósito? Ilustrá esaki.
5 Pa nos por biba ku éksito na armonia ku Dios su propósito nos mester plania nos asuntunan kuidadosamente tambe. Ta sabí di nos parti pa evitá di akumulá debe ku por hasi nos katibu di e mundu aki i stroba nos di kumpli ku e trabou di Dios. Beibel ta rekordá nos ku “e fiadó ta bira esklabo di esun ku ta fi’é.” (Proverbionan 22:7) Si nos konfia riba Yehova i pone kos spiritual na promé lugá den nos bida, esei lo yuda nos pa no pèrdè e kosnan mas importante for di bista. Guoming i su dos ruman muhénan, por ehèmpel, ta biba huntu ku nan mama den un área kaminda preis di bibienda ta haltu i no ta fásil pa haña trabou vast. Tin biaha algun di nan no tin trabou, pero asina mes nan no falta nada, pasobra nan ta wak bon kon nan ta usa e sèn i ta parti e gastunan. Guoming ta konta: “Nos ta logra sigui traha pionero i kuida nos mama bon, maske tin biaha no ta nos tur tin un entrada. Nos ta gradisidu ku Mama no ke pa nos sakrifiká nos aktividatnan spiritual pa por kumpra kos karu i di luho p’e.”—2 Korintionan 12:14; Hebreonan 13:5.
6. Menshoná un ehèmpel ku ta mustra kon nos por pone nos bida na armonia ku Dios su propósito.
6 Si bo ta hopi metí den interesnan di mundu, sea ta finansiero òf di otro tipo, kisas lo bo tin ku hasi kambio grandi pa por pone Dios su propósito na promé lugá den bo bida. Hopi bes e kambionan aki no ta kos ku bo por logra hasi di un dia pa otro, i si bo faya aki i aya na kuminsamentu, no mira esei komo un frakaso. Por ehèmpel, Koichi tabata dediká muchu hopi tempu na rekreo. Koichi a yega di studia Beibel tempu ku e tabata un tiner, pero pa hopi aña weganan di vidio a dominá su bida. Un dia Koichi a puntra su mes: ‘Ta kiko mi ta bezig kuné? Mi tin riba 30 aña i mi no ta hasiendo nada útil ku mi bida!’ Koichi a kuminsá studia Beibel bèk i a aseptá yudansa di e kongregashon. E kambionan a tuma lugá gradualmente, pero e no a entregá. Ku hopi orashon i ku e animashon amoroso ku el a risibí, por fin el a logra libra di e opseshon ku e tabatin. (Lukas 11:9) Awor Koichi ta felis sirbiendo komo sirbidó ministerial.
Siña Keda Balansá
7. Pakiko nos mester keda balansá den hasimentu di Dios su trabou?
7 Ta bale la pena pa nos hasi tur loke nos por pa biba na armonia ku Dios su propósito. Nos mester ta dispuesto pa hasi esfuerso i no ser floho. (Hebreonan 6:11, 12) Sin embargo, Yehova no ke tampoko pa nos hasi di mas i kaba ku nos mes den sentido físiko, mental ni emoshonal. Si nos ta modesto i ta rekonosé ku nos no por kumpli ku Dios su trabou riba nos mes forsa, esei ta glorifiká Dios i ta mustra ku nos ta hende balansá. (1 Pedro 4:11) Yehova ta primintí di duna nos e forsa nesesario pa kumpli ku su boluntat, pero nos no mester fòrsa nos mes pa purba logra kosnan ku e no ta spera di nos. (2 Korintionan 4:7) Pa nos por sigui sirbi Dios sin kaba ku nos mes, nos mester plania bon kon nos ta usa nos energia.
8. Kiko a sosodé ora un hóben kristian a purba duna lo mihó di su mes tantu na Yehova komo na mundu, i kon el a korigí e situashon?
8 Por ehèmpel, pa dos aña largu Ji Hye, un ruman muhé ku ta biba na Asia oriental, a traha un trabou ku tabata eksigí hopi di dje, i e tabata traha komo pionero na mes momento. E ta konta: “Mi a purba duna lo mihó di mi mes tantu na Yehova komo na mundu, pero mi tabata drumi sinku ora so tur anochi. Komo resultado mi a keda mentalmente agotá i no a sobra energia pa dediká na e bèrdat, i mi no tabatin muchu goso mas den mi sirbishi na Dios.” Pa Ji Hye por a sirbi Yehova ‘ku henter su kurason, alma, mente i forsa,’ el a buska un trabou ménos eksigente. (Marko 12:30) E ta bisa: “Mi a hasi hopi esfuerso pa pone Dios su propósito na promé lugá den mi bida, apesar ku mi famia a pone preshon riba mi pa purba alkansá éksito finansiero. Ainda mi ta gana sufisiente pa mi por kumpra kosnan básiko, manera paña presentabel. I ta dushi ku awor mi por drumi un par di ora èkstra! Awor mi ministerio ta duna mi goso, i spiritualmente mi ta mas fuerte. Esei ta pa motibu ku mi no ta sobra muchu tempu mas pa dediká na e atrakshonnan i distraishonnan di mundu.”—Eklesiastés 4:6; Mateo 6:24, 28-30.
9. Ki efekto nos esfuerso por tin riba hende den nos teritorio?
9 No ta tur hende por sirbi Dios komo predikadó di tempu kompletu. Si bo tin ku lucha ku e efektonan di behes, problema di salú òf otro limitashonnan, tene na mente ku Yehova tin hopi apresio pa bo fieldat i e sirbishi ku bo por rindi na dje di henter bo kurason. (Lukas 21:2, 3) P’esei, maske nos no por hasi hopi den Dios su sirbishi, niun di nos no mester balotá e efekto ku esei por tin riba hende. Por ehèmpel, laga nos bisa ku nos a yama na un par di kas sin haña ningun hende ku parse interesá den nos mensahe. Despues ku nos bai, e doñonan di kas lo por keda papia oranan òf dianan tokante nos bishita, maske ningun hende no a habri porta. Nos no ta spera pa tur hende ku tende e bon nobo reakshoná faborablemente, pero algun sí lo reakshoná bon. (Mateo 13:19-23) Otronan lo reakshoná mas despues, debí na kambio den situashon di mundu òf den nan mes bida. Di tur manera, hasiendo loke nos por den e ministerio públiko nos ta kumpli ku Dios su trabou. Nos ta “Dios su kolaboradónan.”—1 Korintionan 3:9.
10. Ki oportunidatnan henter e kongregashon tin?
10 Ademas, nos tur por yuda miembronan di nos famia i nos rumannan spiritual. (Galationan 6:10) E bon influensia ku nos por tin riba hende por ta profundo i duradero. (Eklesiastés 11:1, 6) Ora ansiano- i sirbidónan ministerial kumpli ku nan tareanan ku diligensia, nan ta kontribuí na e salú spiritual i stabilidat di e kongregashon, i aktividat kristian ta oumentá. Beibel ta duna nos siguransa ku si nos ta ‘abundá den e trabou di Señor, nos trabou no ta en bano.’—1 Korintionan 15:58.
Hasi Dios Su Propósito Bo Karera den Bida
11. Fuera di traha ku e kongregashon lokal, ki otro oportunidat di sirbi nos por tin?
11 Komo kristian nos ta disfrutá di bida i nos ke glorifiká Dios den tur loke nos hasi. (1 Korintionan 10:31) Si nos dediká nos fielmente na e obra di prediká e bon nobo di Reino i siña hende opservá tur e kosnan ku Hesus a manda, nos lo ripará ku tin hopi manera pa sirbi Dios ku lo hasi nos felis. (Mateo 24:14; 28:19, 20) Fuera di traha ku e kongregashon lokal por tin oportunidat pa nos sirbi kaminda tin mas nesesidat, sea ku ta den un otro teritorio, un otro idioma òf den un otro pais. Ansiano- i sirbidónan ministerial ku ta soltero por haña invitashon pa partisipá den e Skol di Entrenamentu Ministerial, i despues sirbi den kongregashonnan ku tin mester di kristian maduro, sea den nan mes pais òf den eksterior. Parehanan kasá ku ta den e ministerio di tempu kompletu lo por bin na remarke pa risibí entrenamentu pa misionero na e skol di Galaad i haña un asignashon pa bai sirbi den otro pais. I semper tin mester di boluntario pa kumpli ku un variedat di tarea na Bètel i den konstrukshon i mantenshon di lugá di adorashon i sukursal.
12, 13. (a) Kon bo por sa kua di e maneranan di sirbi Dios bo mester skohe? (b) Ilustrá kon e eksperensia ku bo ta haña den un asignashon por ta útil den un otro asignashon.
12 Kua di e maneranan aki di sirbi Dios abo lo skohe? Komo un sirbidó dediká di Yehova, semper buska guia serka dje i serka e kongregashon. Dios su “bon spiritu” lo yuda bo tuma e desishon korekto. (Nehemias 9:20) Hopi bes, un asignashon ta habri kaminda pa un otro, i e eksperensia i abilidatnan ku bo haña den un asignashon lo por ta útil den un otro ku bo risibí despues.
13 Por ehèmpel, Dennis ku su kasá Jenny ta partisipá regularmente den proyektonan pa konstruí Salòn di Reino. Despues ku horkan Katrina a asotá e parti zùit di Merka, nan a ofresé pa partisipá den e trabou di duna ousilio. Dennis ta konta: “Tabata un gran goso di por usa e abilidatnan ku nos a haña trahando Salòn di Reino pa yuda nos rumannan kristian. Ta konmovedor pa mira e apresio di esnan ku nos a yuda. Mayoria di e otro gruponan ku a duna ousilio no tabatin muchu éksito den loke ta trata rekonstrukshon. Testigunan di Yehova ya kaba a drecha òf rekonstruí mas ku 5.300 kas, i tambe hopi Salòn di Reino. Hende ta ripará esei, i awor nan ta mustra mas interes den nos mensahe.”
14. Kiko bo por hasi si bo ke drenta e ministerio di tempu kompletu?
14 Abo por biba na armonia ku Dios su propósito dor di skohe e ministerio di tempu kompletu komo bo karera den bida? Si bo hasié, sin duda lo bo haña hopi bendishon. Si bo sirkunstansianan aktual no ta permití, anto kisas bo por hasi un ahuste. Hasi orashon meskos ku Nehemias ora ku e tabata anhelá di por a tuma un asignashon importante: “O Señor, mi ta roga bo, . . . hasi bo sirbidó eksitoso awe.” (Nehemias 1:11) Despues, traha na armonia ku bo orashon, konfiando riba “[Esun] ku ta skucha orashon.” (Salmo 65:2) Promé ku Yehova bendishoná bo esfuerso pa sirbié mas plenamente, bo mester kuminsá na hasi esfuerso. Unabes bo tuma e desishon pa drenta e ministerio di tempu kompletu, tene bo na dje. Ku tempu lo bo gana eksperensia i bo goso lo oumentá.
Un Bida Ku Ta Bale la Pena di Bèrdat
15. (a) Ki benefisio nos por saka ora nos papia ku rumannan ku tin hopi tempu ta sirbi Yehova, i ora nos lesa tokante e bida di rumannan asina? (b) Menshoná un historia di bida ku a animá bo hopi.
15 Ki resultado bo por spera si bo biba na armonia ku Dios su propósito? Papia ku rumannan ku tin hopi tempu sirbiendo Yehova, spesialmente esnan ku a sirbi den e ministerio di tempu kompletu pa hopi aña. Nan bida sí ta rekompensador i yen di propósito! (Proverbionan 10:22) Nan lo bisa bo ku asta den e sirkunstansianan di mas difísil, Yehova semper a duna nan loke nan realmente tabatin mester i muchu mas ku esei. (Filipensenan 4:11-13) Di 1955 pa 1961, E Toren di Vigilansia a publiká un seri di historia di bida di rumannan fiel titulá: “Bibando na Armonia ku Mi Propósito den Bida.” Entre tantu, a publiká sentenáres di otro historia di bida. Kada un di nan ta reflehá un selo i un goso ku ta pone nos kòrda loke nos por lesa den e buki di Echonan. Ora bo lesa e relatonan emoshonante aki, lo bo por sinti bo impulsá pa bisa: “Ta un bida asina ami tambe ke tin!”
16. Kiko ta duna un kristian felisidat i propósito den bida?
16 Aaron, ku nos a menshoná na kuminsamentu, ta konta: “Na Afrika, hopi bes mi tabata topa hóbennan ku tabata bai di un lugá pa otro den e pais buskando un propósito den bida. Mayoria di nan no a haña loke nan tabata buska. Pero nos sí ta bibando na armonia ku Dios su propósito, ya ku nos ta traha pa e bienestar di e Reino, i ta disfrutá di un bida interesante i ku ta bale la pena. Nos a mira personalmente ku tin mas felisidat den duna ku den risibí.”—Echonan 20:35.
17. Dikon nos mester biba na armonia ku Dios su propósito awor?
17 Kiko di abo? Ki propósito bo tin den bida? Si bo no tin meta spesífiko ku ta na armonia ku Dios su propósito, promé ku bo ke sa otro metanan lo yena e bashí. Pakiko lo bo malgastá bo bida presioso den Satanas su mundu di fantasia? Djis akí ora e “gran tribulashon” dal aden, kos material i posishon den mundu lo no tin ningun balor mas. E ora ei, ta nos relashon ku Yehova lo konta. Nos lo keda hopi kontentu ku nos a sirbi Dios i hende, bibando na armonia ku Dios su propósito!—Mateo 24:21; Revelashon 7:14, 15.
[Nota]
a A kambia algun nòmber.
b Publiká pa Testigunan di Yehova.
Bo Por Splika?
• Kon Yehova ta mira e sirbishi ku nos ta rindi na dje?
• Dikon nos mester ta balansá i práktiko pa nos por sirbi Dios i hende?
• Ki diferente maneranan nos tin pa sirbi Dios?
• Kon nos por hiba un bida awor ku ta bale la pena di bèrdat?
[Plachi na página 27]
Pa nos por keda sirbi Yehova di henter nos alma, nos mester ta balansá
[Plachi na página 27]
Tin diferente manera pa nos rindi Dios sirbishi sagrado