Sirakusa—Un Haf Kaminda Pablo Tabata di Tránsito

RÒNT di aña 59 di nos era, un barku a sali for di e isla mediteráneo di Malta rumbo pa Italia. Na kabes di e barku tabatin un figura di e “Rumannan Morocho,” esta e Yunan di Zeus, diosnan ku hende tabata konsiderá komo protektor di e marineronan. Lukas, un eskritor di Beibel ta konta ku e barku a drenta haf di “Sirakusa” na e parti zùitost di e kosta di Sisilia i “a keda einan tres dia.” (Echonan 28:11, 12) Lukas i Aristarko tabata na bordo huntu ku apòstel Pablo. A manda Pablo Roma pa trata su kaso einan.—Echonan 27:2.

Nos no sa si nan a laga Pablo baha for di e barku na Sirakusa. Si Pablo i su kompañeronan di biahe a baha, kiko nan lo por a mira einan?

Den e époka griego i romano, Sirakusa tabata kasi mes importante ku Atenas i Roma. Tradishon ta konta ku e korintionan a funda Sirakusa na 734 promé ku nos era. Sirakusa tabatin su momentonan di gloria i personahenan bon konosí di antigwedat a nase einan, manera por ehèmpel e dramaturgo Epikarmo i e matemátiko Arkimedes. Na 212 promé ku nos era, e romanonan a konkistá Sirakusa.

Un bishita na e stat moderno lo por duna bo un idea ta kon Sirakusa di Pablo su dia tabata. E stat tabata partí den dos: un parti ta keda riba e isla chikitu di Ortigia, kaminda muy probablemente Pablo su barku a mara, i e otro parti ta riba tera firme.

Awe, bo ta haña riba e isla ruinanan di e tèmpel di Apolo. E tèmpel ta data di siglo 6 promé ku nos era i tin e estilo klásiko griego mas bieu na Sisilia. Tambe bo ta haña kolumnanan di e tèmpel dediká na Atenea, ku ta data di siglo 5 promé ku nos era; pero awor nan ta forma parti di e katedral.

E sentro di e siudat moderno ta riba tera firme, kaminda bo por bishitá e parke arkeológiko di Neápolis. Den serkania di e entrada tin e teatro griego. E ta representá un di e ehèmpelnan mas impreshonante di arkitektura di teatro griego. Debí ku e ta kara pa laman, e públiko tabatin un bista espektakular durante e presentashonnan. Den e parti mas zùit di e parke tin un anfiteater romano di siglo 3 di nos era. Su forma ta oval, i ta 140 meter largu i 119 meter hanchu; e ta e di tres anfiteater mas grandi di Italia.

Si bo haña un chèns di bai Sirakusa, bo por sinta riba un banki kant’i laman na Ortigia, habri bo Beibel na Echonan 28:12, i imaginá kon apòstel Pablo ta riba e barku segun ku e ta drenta den e haf einan.

[Tabèl/Mapa na página 8]

(Pa e teksto den su formato kompleto, wak e publikashon)

Malta

Sisilia

Sirakusa

ITALIA

Regio

Puteoli

Roma

[Plachi na página 8]

Ruinanan di e teatro griego na Sirakusa