Ken Dios Ta?

KON lo bo kontestá e pregunta ei? Tin hende ta pensa ku nan konosé Dios bon i ku e ta un amigu íntimo. Otronan ta konsiderá Dios komo un famia leu. Nan ta kere ku e ta eksistí pero nan no sa mashá di dje. Si abo ta kere ku Dios ta eksistí, kon lo bo kontestá e preguntanan ku tin aki bou?

1. Dios ta un persona real?

2. Dios tin un nòmber?

3. Hesus ta e Dios Todopoderoso?

4. Dios ta interesá den mi?

5. Dios ta haña tur forma di adorashon bon?

Si bo hasi hende e preguntanan akí, probablemente lo bo haña un avalancha di kontesta. P’esei, no ta nada straño ku mito- i ideanan robes a desaroyá tokante Dios.

Dikon e Kontestanan Ta Hopi Importante

Un biaha ora Hesukristu tabata papia ku un señora religioso na un pos, Hesus a enfatisá ku ta importante pa sa ken Dios ta realmente. E señora akí, kende tabata un samaritano, a rekonosé ku Hesus tabata un profeta. Pero algu tabata molesti’é. Hesus su kreensianan tabata diferente. Ora el a ekspresá su preokupashon, Hesus a bis’é frankamente: “Boso ta adorá loke boso no konosé.” (Juan 4:​19-22) For di Hesus su palabranan nos por mira bon kla ku no ta tur hende religioso konosé Dios realmente.

Pero loke Hesus a bisa ta nifiká ku ningun hende no por siña konosé Dios? Nò. Hesus a sigui bisa e señora: “Adoradónan berdadero lo adorá e Tata den spiritu i bèrdat; pasobra ta hendenan asina e Tata ta buska pa ador’é.” (Juan 4:23) Abo ta entre e hendenan ku ta adorá Dios “den spiritu i bèrdat”?

Ta di sumo importansia pa bo saka afó kiko ta bo kontesta riba e pregunta ei. Dikon? Hesus a enfatisá e importansia di konosementu eksakto ora el a pidi den orashon: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.” (Juan 17:3) Sí, pa bo haña bida den futuro bo mester sa e bèrdat tokante Dios!

Ta realmente posibel pa haña sa e bèrdat tokante Dios? Sí, esei ta posibel! Pero, kon bo por logra haña e konosementu ei? Hesus a bisa lo siguiente tokante su mes: “Ami ta e kaminda, i e bèrdat, i e bida; ni un hende no ta bin serka e Tata, sino pa medio di mi.” (Juan 14:6) El a bisa tambe: “Niun hende no konosé e Tata, sino e Yu so i esnan ku e Yu ke laga konosé e Tata.”​—Lukas 10:22, BPK.

Pues pa un hende siña konosé Dios e siñansanan di Hesukristu, e Yu di Dios, ta esensial. Sí, Hesus a primintí nos: “Si boso keda den mi palabra, boso ta berdaderamente disipelnan di mi, i boso lo konosé e bèrdat, i e bèrdat lo hasi boso liber.”​—Juan 8:​31, 32.

P’esei, kon Hesus lo kontestá e sinku preguntanan menshoná na prinsipio?

[Plachi na página 4]

Bo ta adorá un Dios ku realmente bo no konosé?