Kiko Por Yuda Bo Komprondé Beibel?

3. Aseptá Yudansa di Otro Hende

Ora eksploradó Edward John Eyre a hasi e biahe largu i difísil atraves di e sabana desolá di Nullarbor, Oustralia, e aborígennan a siña Eyre e manera pa haña awa for di e serunan di santu i for di mata di eukalipto. E yudansa ei ku Eyre a aseptá serka e hendenan ku tabata konosé e lugá, mas despues a salba su bida.

MANERA e ehèmpel akí ta ilustrá, pa un hende realisá un tarea difísil ku éksito, hopi biaha e mester di yudansa di un persona ku tin mas eksperensia. Esei ta konta tambe pa ora bo kuminsá lesa Beibel.

Hesus no a ferwagt di su siguidónan ku nan lo a komprondé Beibel sin yudansa di otro hende. Na un okashon, “el a habri nan huisio pa nan komprondé e Skrituranan.” (Lukas 24:45) Hesus tabata sa ku hende ku ta lesa Beibel tin mester di yudansa pa nan kapta e siñansanan ku e ta kontené.

Yudansa di Ken?

Hesus a duna su berdadero siguidónan e enkargo pa perkurá e yudansa akí. Promé ku el a subi na shelu, el a manda nan: “Bai i hasi tur e nashonnan disipel di mi, . . . i siña nan pa kumpli ku tur loke mi a ordená boso.” (Mateo 28:19, 20) E trabou prinsipal di kristiannan ta di siña hende, i esei ta inkluí splika nan kon nan por apliká prinsipionan di Beibel den e bida di tur dia. Pues, kristiannan berdadero ta yuda otro hende komprondé Beibel.

No muchu tempu despues ku Hesus a duna su siguidónan e enkargo ei, un kos masha interesante a sosodé. Beibel ta konta di un ofisial di kas real di Etiopia ku tabata lesa parti di e profesia di Isaias. El a topa un pasashi ku e no por a saka afó kiko ta kiko. Segun e relato bíbliko, e versíkulonan ku a konfundié tabata bisa: “Manera un karné nan a hib’é pa wòrdu matá; i manera un lamchi ta ketu dilanti di su peladónan, asina e no ta habri su boka. Den su humiashon nan no a hasi hustisia p’e; ken lo konta di su generashon? Pasobra su bida a wòrdu kitá for di riba tera.”—Echonan 8:32, 33; Isaias 53:7, 8.

E ofisial a puntra Felipe, un kristian eksperensiá ku tabata vèrsá den e Skritura: “Di ken e profeta ta bisa esaki? Di su mes òf di un otro?” (Echonan 8:34) E etiopio sinsero ei a bai Yerusalèm kaba pa adorá Dios i probablemente a pidié su gui’é. Evidentemente, e tabata lesa ku un aktitut mansu i ansioso pa siña. Pero tòg e ofisial no por a komprondé e pasashi ei. Humildemente el a pidi Felipe yud’é. Anto e splikashon ku Felipe a dun’é a hasié asina kontentu ku esei a motiv’é pa e tambe bira kristian.—Echonan 8:35-39.

Testigunan di Yehova ta sigui ku e obra ku Felipe i otro kristiannan di promé siglo a hasi. Den mas ku 235 pais, e Testigunan boluntariamente ta yuda hende komprondé loke Beibel realmente ta siña. Nan ta hasi esaki pa medio di un estudio di e Skritura basá riba tópiko. E método progresivo akí di studia Beibel ta enserá analisá loke Beibel ta bisa di un sierto tópiko.a—Wak e kuadro “Kontestanan Satisfaktorio Riba Preguntanan di Beibel.”

“Tur Mi Preguntanan A Haña Kontesta”

Steven, Valvanera i Jo-Anne, sitá den e artíkulo di introdukshon, a kuminsá studia Beibel ku Testigunan di Yehova. Steven a bisa: “Loke a laga mi keda asombrá ta ku si bo djis kompará vários prinsipio òf relato bíbliko ku otro, hopi biaha bo por haña e bèrdat di un asuntu ei mes den Beibel. Promé ku mi estudio di Beibel ku Testigunan di Yehova, ningun hende no a mustra mi kon pa hasi esei. E echo ku bo no tin nodi di drenta konstantemente den debate i kontradisí opinion di otro pa komprondé Beibel tabata un gran alivio pa mi.”

Valvanera tambe ta pensa meskos. El a bisa: “Tur loke mi a siña ta masha koherente i lógiko. E kosnan ta bèrdat, no djis pasobra ta asina ‘Iglesia’ ta bisa, sino pasobra tin un splikashon rasonabel pa tur kos.” Jo-Anne a konta: “E echo ku tur mi preguntanan a haña kontesta for di Beibel a duna mi un gran rèspèt pa e Outor, pasobra e tabata sa ku hende lo tabatin hopi pregunta i el a hasi sigur di inkluí kontestanan apropiá den su Palabra ku por a satisfasé nan kuriosidat.”

Bo konosé un Testigu di Yehova? Pakiko bo no ta pidié mustra bo kon nan ta kondusí un estudio di Beibel? Si bo no konosé ningun Testigu di Yehova personalmente, sea asina bon di manda un karta na un di e adrèsnan menshoná na página 2 di e revista akí. Ku spiritu santu di Dios, un mente habrí i yudansa personal di un maestro di Beibel kualifiká, e Palabra di Dios no tin nodi di ta un buki será pa bo. Sí, bo por komprondé Beibel!

[Nota]

[Kuadro/Plachi na página 8]

Kontestanan Satisfaktorio Riba Preguntanan di Beibel

Algun di e tópikonan ku Testigunan di Yehova ta trata den un estudio di Beibel:

• Kiko ta Dios su propósito pa e tera?

• Unda e mortonan ta?

• Nos ta bibando den “e último dianan”?

• Dikon Dios ta permití sufrimentu?

• Kon mi por hasi mi bida di famia felis?

[Plachi na página 7]

Pa komprondé Beibel . . . pidi Dios duna bo su spiritu, les’é ku un mente habrí, aseptá yudansa di otro hende