Mito 6: Dios Ta Permití Hende Usa Imágen i Prenchi pa Ador’é

Kiko ta orígen di e mito?

“E promé kristiannan no tabata usa imágen den adorashon . . . Ta te den siglo 4 i 5 numa iglesia a kuminsá permití uso di imágen. Nan hustifikashon tabata basá riba e teoria ku uso di imágen por yuda hende ignorante komprondé kristianismo mas mihó ku sermon òf buki.”—Cyclopedia of Biblical, Theological, and Ecclesiastical Literature, di McClintock and Strong, Volúmen 4, página 503 i 504.

Kiko Beibel ta bisa?

“No traha ningun imágen grabá pa bo mes, ni nada semehante na loke tin ariba den shelu, ni abou riba tera, ni den e awa bou di tera. No adorá nan ni sirbi nan.” (Eksodo 20:4, 5) Apòstel Juan a skirbi e kristiannan di promé siglo: ‘Yunan chikitu, warda boso di dios falsu.’—1 Juan 5:21, E Testament Nobo.

Imágen, manera iglesianan ta pretendé, ta sirbi djis komo un medio pa aserká i onra loke esakinan ta representá? Segun The Encyclopedia of Religion, “den kuminsamentu nan lo tabata usa imágen prinsipalmente komo opheto pa siña hende algu i komo dekorashon; por lo ménos, esei tabata un argumento pa hustifiká uso di imágen. Pero nos mester atmití ku no a tarda muchu ku nan a kuminsá venerá esakinan. Esaki tabata e kaso foral ku e prenchinan ku a bira un aspekto importante di religion òrtodòks.” Sinembargo, profeta Isaias tabatin rason di puntra bèrdè: “Ku ken boso ke kompará Dios antó, ku kua imágen boso ke represent’é?”—Isaias 40:18, BPK.

Wak tambe e versíkulonan di Beibel akí: Isaias 44:13-19; Echonan 10:25 i 26; 17:29; 2 Korintionan 5:7

E BÈRDAT:

Dios no ta permití hende usa imágen i prenchi pa ador’é

RECHASÁ MITO, PEGA NA E BÈRDAT

Kiko nos por konkluí for di e análisis breve akí di mitonan ku te awe hopi iglesia tin komo doktrina? E ‘kuentanan [na griego, mý·thos] di webu di gai’ akí no por para banda di e bèrdatnan simpel i trankilisante di Beibel.—2 Pedro 1:16, BPK.

P’esei, ku un mente habrí, no duda pa kompará e Palabra di Dios—e fuente di e bèrdat—ku loke nan a siña bo. (Juan 17:17) E ora ei, e promesa akí lo kumpli den bo kaso tambe: “Boso lo konosé e bèrdat, i e bèrdat lo hasi boso liber.”—Juan 8:32.