Hala Serka Dios
Yehova “Ta Wak Kurason”
APARENSIA ta gaña. Loke un hende ta di pafó no nesesariamente ta revelá loke e ta di paden, esta, loke e tin den fondo di su kurason. Hende ta inkliná na husga a base di aparensia. Ménos mal ku Yehova Dios no ta wak aparensia so, e ta wak mas leu. E palabranan na 1 Samuel 16:1-12 ta indiká esei klaramente.
Visualisá loke ta pasando. Yehova ta serka di ungi un rei nobo pa e nashon di Israel. Dios ta bisa profeta Samuel: “Lo mi manda bo serka Isaí e bètlehemita, pasobra mi a skohe un rei pa mi mes for di su yu hòmbernan.” ((Versíkulo 1) Yehova no ta menta nòmber. E úniko kos ku Yehova ta bis’é ta ku esun skohí ta ún di e yunan di Isaí. Riba kaminda pa Bètlehèm, kisas Samuel ta puntra su mes, ‘Kon mi por sa ta kua di e yunan di Isaí ta esun ku Yehova a skohe?’
Ora Samuel yega Bètlehèm, e ta palabrá ku Isaí i su yu hòmbernan pa nan kome huntu kuné for di e karni ku el a usa pa sakrifisio. Ora Eliab, e yu mayó, drenta, mesora Samuel ta keda impreshoná pa su aparensia. Samuel ta pensa ku Eliab tin estatura di un rei i ta bisa den su mes: “Siguramente SEÑOR su ungí ta pará dilanti di [Yehova].”—Versíkulo 6.
Sinembargo, Yehova ta wak e asuntu diferente. E ta bisa Samuel: “No wak su aparensia ni e haltura di su estatura, pasobra mi a rechas’é.” (Versíkulo 7) Yehova no ta keda impreshoná ku e estatura di Eliab ni p’e echo ku e tin bon tipo. Yehova ta mira tur kos i no aparensia so, e ta mira mas profundo. E ta mira te kaminda berdadero bunitesa por ser hañá.
Yehova ta splika Samuel: “Pasobra Dios no ta mira manera hende ta mira, pasobra hende ta wak aparensia di pafó, ma SEÑOR ta wak kurason.” (Versíkulo 7) Sí, loke ta konta pa Yehova ta e kurason, es desir, loke un hende ta di paden: su pensamentu, aktitut i sintimentu. Esun ku ta “sonda kurason” ta rechasá tantu Eliab komo e otro seis yu hòmbernan di Isaí ku ta pasa dilanti Samuel.—Proverbionan 17:3.
Isaí tin ún yu hòmber mas, David, esun di mas chikitu, kende “ta kuida e karnénan.” (Versíkulo 11) P’esei Isaí ta manda un hende bai den kunuku pa buska David i David ta pasa dilanti di Samuel. Despues Yehova ta bisa Samuel: “Lanta, ungié, pasobra esaki t’é.” (Versíkulo 12) Ta bèrdat ku David tin “bunita wowo i nèchi aparensia.” Pero ta su kurason ta loke a agradá Dios.—1 Samuel 13:14.
Den e mundu djawe hende ta pone hopi énfasis riba aparensia. Pero loke por konsolá nos ta e echo ku Yehova Dios no ta laga aparensia influensi’é. P’e no ta importante kon haltu bo ta òf si otro hende ta haña bo atraktivo òf bunita. Loke ta konta pa Yehova ta kon bo ta di paden, den bo kurason. Esei no ta motivá bo pa kultivá e kualidatnan ku ta hasi bo bunita den Dios su bista?