Loke Nos Por Siña for di Hesus

Loke Nos Tin Ku Hasi pa Sigui Kristu

Ora hende a pone fe den Hesus, hopi bes el a bisa nan: “Sigui mi!” (Mateo 9:9; 19:21) Kiko nos tin ku hasi pa nos por ta siguidó di Hesus, esta, un kristian? Laga nos konsiderá kontesta di tres pregunta prinsipal.

Kon bo mester trata otro hende?

▪ Un disipel di Hesus mester sigui su instrukshon enkuanto kon pa trata otro hende. Por ehèmpel, Hesus a bisa: “P’esei, tur loke boso kier pa hende hasi pa boso, hasi meskos pa nan.” Kiko si un hende ofendé bo? Hesus a bisa: “Pura drecha asuntu ku bo atversario.” Ademas, el a bisa su siguidónan: “Si boso no pordoná hende, boso Tata tampoko lo no pordoná boso transgreshonnan.”​—Mateo 5:25; 6:15; 7:12.

Na hende kasá, Hesus a duna e konseho akí: “Boso a tende ku a wòrdu bisá: ‘No kometé adulterio’; ma ami ta bisa boso ku ken ku wak un muhé pa dese’é, ya kaba el a kometé adulterio kuné den su kurason.” Un kristian berdadero ta permití e siñansanan di Hesus moldia su mente i su kurason.​—Mateo 5:​27, 28.

Kristiannan berdadero ta sakrifiká nan komodidat personal pa yuda otro hende. Hesus tabatin e spiritu di sakrifisio propio. Por ehèmpel, durante un biahe di predikashon agotador, Hesus i su apòstelnan no tabatin tempu ni sikiera pa kome. P’esei Hesus a subi huntu ku nan den un boto i el a hiba nan na un lugá solitario pa sosegá. Pero e hendenan a haña sa na unda e tabata bai i nan a sali kore i yega promé kuné. E relato bíbliko ta bisa: “Ora Hesus a baha for di boto, el a mira un multitut grandi, i el a sinti kompashon pa nan, pasobra nan tabata manera karné sin wardadó; i el a kuminsá siña nan hopi kos.” (Marko 6:​30-34) Maske ki difikultat bo enfrentá, bo por imitá Hesus i hasi loke Dios ta pidi di bo.

Pakiko bo tin ku prediká e bon notisia?

▪ Hesus a siña su siguidónan pa prediká e bon notisia. El a bisa e apòstelnan: “I segun ku boso ta bai, prediká, bisando: ‘E reino di shelu ta serka.’” (Mateo 10:7) Hesus su siguidónan tin un mensahe masha balioso pa kompartí. Den orashon Hesus a bisa: “I esaki ta bida eterno, ku nan por konosé bo, e úniko Dios berdadero.”​—Juan 17:3.

Hesus a profetisá tokante un trabou den kua miónes di su siguidónan lo a partisipá. El a bisa: “E evangelio akí di e reino lo wòrdu prediká den henter mundu komo un testimonio na tur nashon.” (Mateo 24:14) Si bo a siña tokante e Reino di Dios i ta kere loke Beibel ta bisa, sin duda lo bo ta kontentu pa papia ku otro hende tokante loke bo sa. Hopi siguidó di Hesus a kuminsá papia tokante e Reino di Dios ku nan famianan.​—Juan 1:​40, 41.

Pakiko bo tin ku batisá?

▪ Tempu ku Hesus a batisá den Riu Hordan, el a bisa evidentemente den orashon: ‘Mi a bin pa hasi bo boluntat, o Dios.’ (Hebreonan 10:7) Si bo ke hasi Dios su boluntat, abo tambe mester batisá. Hesus su instrukshon tabata: “Hasi tur e nashonnan disipel di mi, i batisá nan.”​—Mateo 28:19.

Ora un hende batisá, ki responsabilidat i bendishon e ta haña? Siguidónan batisá di Hesus ta sirbi Dios ku henter nan alma. Hesus a sita e Lei di Dios, ku ta bisa: “Stima SEÑOR bo Dios ku henter bo kurason, i ku henter bo alma.” (Mateo 22:37) Tambe el a bisa: “Si un hende kier bin mi tras, lag’é nenga su mes.” (Mateo 16:24) Boutismo ta simbolisá e echo ku un hende a disidí di nenga su mes, esta ku e no ta doño di su mes mas sino ku Yehova ta bira su doño. Esnan ku tin un relashon spesial asina ku Dios por pidié pa duna nan un konsenshi limpi.​—1 Pedro 3:21.

Pa mas informashon, wak kapítulo 18 di e buki akí, publiká pa Testigunan di Yehova.