Bo Por Konosé Dios na Su Nòmber?
Ta un onor pa haña un invitashon pa saludá i papia en persona ku un hende importante. Hopi biaha ora hende ta dirigí nan mes na un dignatario, nan ta usa título manera “Señor Presidente,” “Su Mahestat” òf “Su Ekselensia.” Es mas, lo bo sinti bo masha onrá si un persona den puesto haltu bisa bo: “Yama mi na mi nòmber.”
E DIOS berdadero ta bisa nos den su Palabra skirbí, Beibel: “Ami ta Yehova. Esei ta mi nòmber.” (Isaias 42:8, NW; wak e nota riba Eksodo 3:14, BPK) Ounke e tin hopi título tambe, manera por ehèmpel, “Kreador,” “Todopoderoso” i “Señor Soberano,” semper el a duna su sirbidónan leal e onor di yam’é na su nòmber.
Por ehèmpel, un biaha profeta Moisés a roga Dios: “No tuma mi na malu, [Yehova].” (Eksodo 4:10, BPK)a Na dedikashon di e tèmpel na Yerusalèm, Rei Salomon a kuminsá su orashon ku e palabranan “O [Yehova].” (1 Reinan 8:22, 23) I ora profeta Isaias a dirigí su mes na Dios na fabor di e pueblo di Israel, el a bisa: “Abo, o [Yehova], ta nos Tata.” (Isaias 63:16) Nos ta mira bon kla anto ku nos Tata selestial ke pa nos pa yam’é na su nòmber ora nos ta papia kuné.
Pues, ta importante pa yama Yehova na su nòmber ora nos ta papia kuné. Ma konos’é na su nòmber ta enserá mas ku esei. Yehova a hasi e promesa akí en konekshon ku esun ku ta stim’é i konfi’é: “Lo mi proteh’é, pasobra e konosé mi nòmber.” (Salmo 91:14) Konosé e nòmber di Dios lo mester ta nifiká hopi kos, ya ku e ta un faktor klave pa risibí e protekshon di Dios. Pues, kiko ta nifiká konosé Yehova na su nòmber?
[Nota]
a Den e versíkulo akí i e dos siguiente ehèmpelnan (1 Reinan 8:22, 23 i Isaias 63:16), e Beibelnan na papiamentu ta menshoná ku e sirbidónan di Yehova a yam’é “Señor” ora nan a papia kuné. Ma den e idioma original ku nan a skirbi Beibel, e versíkulonan ei ta referí na Dios na su nòmber “Yehova.”