Krea den Bo Yunan un Amor pa Lesa i pa Studia

UN DI e kosnan ku mas por influensiá e futuro di bo yunan ta bo esfuersonan pa siña nan lesa i studia. I pensa riba e goso ku e aktividatnan akí por duna nan! Pa algun hende, e rekuerdonan di mas dushi ku nan tin di nan infansia ta kon nan mayornan tabata lesa pa nan. Fuera di ta algu masha agradabel, lesamentu por trese tambe hopi benefisio. Esaki ta konta spesialmente pa sirbidó di Dios, ya ku nan ta forma un relashon muchu mas será ku Yehova ora nan ta studia Beibel. Un mayor kristian a komentá: “E kosnan ku mas nos ta balorá ta e kosnan ku nos a siña via lesamentu i studiamentu.”

Bon kustumbernan di studia por yuda bo yunan forma un amistat mas será ku Dios. (Sal. 1:​1-3, 6) Ounke un hende no mester por lesa i skirbi pa e haña salbashon, Beibel ta mustra sí ku lesamentu por trese hopi benefisio spiritual. Por ehèmpel, Revelashon 1:3 ta bisa: “Bendishoná ta esun ku lesa i esnan ku tende e palabranan di e profesia.” Ademas, apòstel Pablo a duna Timoteo un konseho inspirá ku indirektamente ta enfatisá e importansia di konsentrashon, lokual ta un aspekto importante di studiamentu. El a bisa Timoteo: “Reflekshoná riba e kosnan akí; sea intensamente okupá den nan.” Pakiko? “Pa bo progreso por ser manifestá na tur hende.”​—1 Tim. 4:15, NW.

Klaru ku e solo echo ku un hende sa kon pa lesa i studia no ta un garantia ku esaki lo benefisi’é. Hopi hende ku sa kon pa hasi e kosnan akí no ta wòri hasi nan; en bes di esei, nan ta okupá nan mes ku kosnan di ménos importansia. Pues, kon mayornan por krea den nan yunan e deseo pa haña konosementu ku ta benefisiá nan?

Bo Amor i Bo Ehèmpel

Yunan ta siña disfrutá di momentonan di estudio ora esakinan ta tuma lugá den un esfera di amor. Owen i Claudia, un pareha kristian, ta bisa di nan dos yunan ku aworakí ta grandi kaba: “Nan tabata ansioso pa e ora di studia yega pasobra esei tabata un dushi tempu pa nan, den kua nan tabata sinti nan mes safe i kómodo. Nan a relashoná e aktividat akí ku un ambiente di kariño i amor.” Asta ora yunan ta bira tiner—un etapa den nan bida ku por trese su difikultatnan kuné—un dushi ambiente rònt di e aktividatnan di estudio di famia lo sigui influensiá e manera ku nan ta mira studiamentu. Aktualmente e yunan di Owen i Claudia ta pionero, i te awe nan ta benefisiá di e amor pa lesa i studia ku nan mayornan a fomentá den nan.

Ademas di amor, tin algu mas ku por ta un tremendo yudansa pa mayornan: nan bon ehèmpel. Yunan ku tin kustumber di mira nan mayornan lesa i studia ta mas inkliná pa konsiderá e aktividatnan akí un parti normal di nan mes bida. Pero kon abo komo mayor por ta un ehèmpel si bo mes no gusta lesa mashá? Kisas bo tin ku ahustá bo prioridatnan òf bo aktitut pa ku lesamentu. (Rom. 2:21) Si lesamentu ta un parti importante di bo rutina diario, esaki lo touch kurason di bo yunan. Bo esfuersonan diligente—spesialmente den lesamentu di Beibel, preparashon pa reunion i estudio di famia—lo laga bo yunan mira kon balioso e aktividatnan akí ta.

Pues, e amor ku bo tin pa bo yunan i bo bon ehèmpel ta esensial pa bo logra krea den nan e deseo pa lesa. Pero kiko ta algun kos práktiko ku bo por hasi pa animá nan?

Yuda Bo Yunan Krea un Amor pa Lesamentu

Kua ta algun paso importante den e proseso pa stimulá un amor pa lesa den bo yunan? Duna nan buki for di chikitu. Un ansiano kristian, kende su mayornan a krea den dje un amor pa lesa, a sugerí: “Laga bo yunan kustumbrá di tin buki den nan man. Di e manera ei buki ta bira nan amigu i parti di nan bida.” Asina, buki basá riba Beibel, manera Siña for di e Gran Maestro i Mi Buki di Relato Bíbliko, ta bira bon amigu di hopi mucha, hopi tempu promé ku nan por lesa mes. Ora bo ta lesa e tipo di publikashonnan ei ku bo yunan, bo ta pone nan den kontakto, no solamente ku idioma, sino tambe ku “pensamentunan spiritual” i “palabranan spiritual.”​—1 Kor. 2:13.

Lesa regularmente ku nan na bos haltu. Krea e kustumber di lesa ku bo yunan tur dia. Esei ta siña nan kon pa pronunsiá palabra korektamente i ta stimulá e kustumber di lesa mas ainda. E manera ku bo ta lesa tambe ta importante. Si bo ta lesa ku smak, nan tambe lo haña smak. De echo, lo bo ripará ku bo yunan lo pidi bo pa lesa e mesun relato bes tras bes pa nan. Hasi loke nan ta pidi bo! Ku tempu, nan lo ke sa di otro tópikonan. Ma tene kuidou pa bo no fòrsa bo yunan pa lesa huntu ku bo. Hesus tabata un ehèmpel den esei, ya ku el a siña su oyentenan solamente “te na e grado ku nan por a skucha.” (Mar. 4:33, NW) Ora bo no ta forsa bo yunan, nan lo ta ansioso pa e ora ku bo ta lesa ku nan yega, i lo bo ta mas serka di bo meta di krea un amor pa lesa den nan.

Animá nan pa kòmbersá riba loke bo ta lesa huntu ku nan. Masha lihé bo yu chikitunan lo siña rekonosé, pronunsiá i kapta e nifikashon di hopi palabra. Esei sigur ta algu ku lo hasi bo masha kontentu. Ora boso ta kòmbersá riba loke boso ta lesa, nan por progresá hopi mas lihé. Un buki riba e tema kon pa yuda yu bira bon lesadó a splika ku kòmbersashon ta yuda mucha “siña e palabranan ku nan lo tin mester di dje mas despues pa rekonosé loke nan ta lesa i komprond’é.” Tambe el a agregá: “Ta masha importante pa kòmbersá ku yu chikitu, kende nan mente den desaroyo ta hasi esfuerso pa siña lesa i skirbi. Mas profundo e tema ta, . . . mas mihó pa nan.”

Laga bo yunan lesa pa bo tende, i animá nan pa hasi pregunta riba loke nan lesa. Kisas bo mes por hasi pregunta i duna nan vários kontesta pa skohe for di dje. Asina yu ta siña ku buki ta un fuente di informashon i ku e palabranan ku nan ta lesa tin un nifikashon. E método akí ta spesialmente útil ora ku loke bo ta lesa ta basá riba e Palabra di Dios, e buki di mas importante ku tur!​—Heb. 4:12.

Ma kòrda ku no ta fásil pa siña lesa. Anto pa bo lesa bon, bo mester saka tempu pa praktiká.a Pues, mas bo yu ta gusta lesa, mas bo mester elogi’é. Esei lo anim’é pa e haña mas amor pa lesamentu.

Lesamentu Ku Ta Agradabel i Ku Ta Bale la Pena

Ora bo siña bo yunan kon pa studia, nan ta mira e balor di lesamentu. Studia ta enserá siña dato i echo, anto komprondé nan relashon ku otro. Tambe bo mester sa kon pa organisá un informashon, kòrd’é i hasi uso di dje. Unabes ku un mucha siña kon pa studia i e por mira e balor práktiko di studiamentu, lesamentu ta bira e ora ei algu ku ta agradabel i ku ta bale la pena.​—Ekl. 10:10.

Siña nan e puntonan klave di studiamentu. Probechá di e Adorashon Komo Famia, konsiderashon di teksto di dia i otro okashonnan similar pa siña bo yunan kon pa studia. Laga nan sinta ketu i enfoká riba un tópiko spesífiko pa periodonan kòrtiku; esei lo siña nan konsentrá, lokual ta indispensabel den siñamentu. Ademas, bo por animá bo yu hòmber p’e konta bo kiko ta e konekshon entre loke el a kaba di siña i loke e sa kaba. Esei ta siñ’é kon pa hasi komparashon. Pakiko no puntra bo yu muhé pa resumí ku su mes palabranan loke el a lesa? Esei lo yud’é kapta e nifikashon di loke e ta lesa i keda kòrd’é. Un otro yudansa pa memoria ta di repasá e informashon, esta, ripití ku nan mes palabra e puntonan klave di un artíkulo ku nan a kaba di lesa. Asta mucha chikitu por siña kon pa tuma nota breve ora boso ta studia òf durante reunionnan di kongregashon. Esaki lo por yuda nan konsentrá mas mihó. E téknikanan simpel akí ta hasi e proseso di siña interesante i produktivo, tantu pa bo komo pa bo yunan.

Krea un ambiente ku ta promové studiamentu. Ta mas fásil pa e muchanan konsentrá ora tin bon ventilashon i lus, i un ambiente trankil i kómodo. Klaru ku e aktitut di e mayornan pa ku studiamentu ta krusial. Un mama a bisa: “Ta masha importante pa bo saka tempu riba un base regular i konsistente pa lesa i studia. Esaki ta siña bo yunan pa nan ta organisá i ku kada kos tin su tempu.” Hopi mayor simplemente no ta permití nan yunan hasi otro kos durante estudio di famia, i segun un outoridat riba e tereno akí, esei ta krea bon kustumber di studia den nan yunan.

Enfatisá e balor práktiko di studiamentu. Finalmente, yuda bo yunan mira kon nan por usa e informashon ku nan a studia den nan bida di tur dia. Asina nan ta mira e berdadero motibu pakiko nan ta studia. Un ruman hóben a atmití: “Si mi no por mira kon loke mi ta lesa ta bai yuda mi, mi no ta haña gana mes di studia e informashon. Ma si mi ta mira kon mi por aplik’é personalmente, e ta bira algu ku mi ke komprondé.” Ora hóbennan ta mira studiamentu komo un manera pa logra un meta importante, nan lo dediká mas tempu na dje. Nan lo kuminsá anhelá pa e ora di studia yega, meskos ku tempu nan tabata chikitu i tabata ansioso pa siña lesa.

E Mihó Rekompensa

No tin sufisiente espasio pa menshoná tur e benefisionan ku bo yunan lo haña ora bo krea un amor pa lesa den nan. Algun di esakinan ta éksito na skol i na trabou, bon relashon ku otro hende, un komprondementu di e mundu ku nos ta biba aden i un relashon mas será ku nan mayornan, pa no papia mes di e satisfakshon profundo ku lesamentu i studiamentu ta trese kuné.

Mas importante ainda, amor pa studiamentu por yuda bo yunan bira personanan spiritual. E amor akí ta e klave pa habri nan mente i kurason pa nan komprondé “e hanchura i largura i haltura i profundidat” di e bèrdatnan di Beibel. (Efe. 3:18) Naturalmente, mayornan kristian tin hopi kos di siña nan yunan. Ora mayornan ta dediká tempu i atenshon na nan yunan i ta hasi tur loke ta posibel pa duna nan un bon fundeshi den bida, nan ta spera ku un dia nan yunan lo skohe e kaminda di Yehova. Segun ku abo komo mayor ta siña bo yunan bon kustumbernan di estudio, bo ta dunando nan e medio pa nan kuida nan bienestar spiritual i haña un bon relashon ku Dios. Pues, pidi Yehova bendishoná bo esfuersonan pa bo logra krea den bo yunan un amor pa lesa i pa studia.​—Pro. 22:6.

[Nota]

[Kuadro/​Plachinan na página 30]

Lesamentu . . .

• Duna bo yunan buki

• Lesa na bos haltu

• Animá nan pa kòmbersá

• Papia riba loke boso ta lesa huntu

• Laga bo yunan lesa pa bo tende

• Animá bo yunan pa hasi pregunta

Studiamentu . . .

• Komo mayor, pone un bon ehèmpel

• Siña bo yunan . . .

○ konsentrá

○ kompará

○ resumí

○ repasá

○ tuma nota

• Krea un ambiente ku ta promové studiamentu

• Enfatisá e balor práktiko di studiamentu