Kontesta Riba Kuater Pregunta Tokante e Fin

HESUKRISTU a profetisá ku un dia den futuro “e fin lo yega.” El a deskribí e tempu ei asin’akí: “E ora ei lo tin un gran tribulashon, manera nunka tabatin for di prinsipio di mundu te aworakí, i ku lo no tin nunka mas tampoko.”​—Mateo 24:​14, 21.

Loke Hesus a bisa tokante e fin, huntu ku loke otro pasashinan di Beibel ta bisa riba e tópiko akí, ta lanta vários pregunta importante. Pakiko no habri bo Beibel i lesa kiko e ta bisa komo kontesta riba e preguntanan akí?

1 Fin di Kiko?

Beibel no ta bisa ku planeta Tera lo ser destruí. E salmista a skirbi: “[Dios] a establesé tera riba su fundeshinan, pa asina esei no kita for di su lugá nunka mas.” (Salmo 104:5) Beibel no ta bisa tampoko ku Dios lo destruí tur bida riba tera den un kandela mundial. (Isaias 45:18) Hesus mes a indiká ku algun hende lo sobrebibí e fin. (Mateo 24:​21, 22) Kiko Beibel ta bisa anto ku lo kaba?

Fin di gobièrnunan ku a frakasá. Dios a inspirá profeta Daniel pa skirbi: “E Dios di shelu lo lanta un reino ku nunka lo no wòrdu destruí, i e reino ei lo no pasa pa ningun otro pueblo; e lo garna i pone un fin na tur e reinonan akí, ma e mes lo dura pa semper.”​—Daniel 2:44.

Fin di guera i polushon. Salmo 46:9 ta duna e siguiente deskripshon di loke Dios lo hasi: “E ta hasi gueranan stòp te na e fin di tera; e ta kibra bog i ta kòrta lansa na dos; e ta kima e garoshinan ku kandela.” Beibel ta bisa tambe ku Dios lo “destruí esnan ku ta destruí e tera.”​—Revelashon 11:18.

Fin di krímen i inhustisia. E Palabra di Dios ta primintí: “E rektonan lo biba den e tera, i e perfektonan lo keda den dje; ma e malbadonan lo wòrdu kòrtá kitá for di tera, i e traidónan lo wòrdu ranká for di dje ku rais ku tur.”a​—Proverbionan 2:​21, 22.

2 Ki Dia e Fin Ta Bini?

Yehova Dios a fiha “e tempu” pa trese un fin na maldat i establesé e gobernashon di su Reino. (Marko 13:33) Ma Beibel ta indiká bon kla ku nos no por kalkulá ki dia presis e fin ta bini. Hesus a bisa: “Ma di e dia i e ora ei ningun hende no sa, ni e angelnan di shelu tampoko, ni e Yu, sino e Tata so.” (Mateo 24:36) Sinembargo, Hesus ku su disipelnan a profetisá tokante e kondishonnan ku lo reina riba tera djis promé ku Dios trese e fin. Fin lo ta hopi serka ora ku tur e siguiente susesonan ta tuma lugá na mesun tempu i na un eskala mundial:

Kambionan polítiko, sosial i di medio ambiente ta tuma lugá na un eskala nunka bisto den historia. Ora e disipelnan di Hesus a puntr’é tokante e fin, el a kontestá nan: “Nashon lo lanta kontra nashon, i reino kontra reino; lo tin temblor na vários lugá i lo tin hamber. E kosnan akí ta e prinsipio di dolónan di parto.” (Marko 13:8) Apòstel Pablo a skirbi: “Den e último dianan tempunan trabahoso lo bini. Pasobra hende lo ta stimadó di nan mes, stimadó di plaka, gabadó, arogante, blasfemadó, desobedesidu na mayornan, ingrato, impio, sin amor, irekonsiliabel, ku mala lenga, sin dominio propio, grosero, odiadó di loke ta bon, traidó, imprudente, sobèrbè, mas bien stimadó di plaser ku stimadó di Dios.”​—2 Timoteo 3:​1-5.

Un kampaña mundial di predikashon ta tuma lugá na tur idioma. Hesus a bisa: “E evangelio akí di e reino lo wòrdu prediká den henter mundu komo un testimonio na tur nashon, i e ora ei e fin lo yega.”​—Mateo 24:14.

3 Kiko Lo Pasa Despues di e Fin?

Beibel no ta bisa ku Dios lo tuma tur bon hende for di tera pa nan bai biba pa semper den felisidat den shelu. Mas bien, Hesus a siña e hendenan ku Dios su propósito original pa humanidat lo kumpli. E di: “Bendishoná ta esnan humilde, pasobra nan lo heredá e tera.” (Mateo 5:5; 6:​9, 10) Na e hendenan ku muri promé ku e fin yega, Beibel ta ekstendé e promesa di un resurekshon den futuro. (Jòb 14:​14, 15; Juan 5:​28, 29) Pues, kiko lo pasa despues di e fin?

Hesus lo goberná for di shelu komo Rei di e Reino di Dios. Profeta Daniel a skirbi: “Mi a sigui wak den e vishon di anochi, i mira, ku e nubianan di shelu tabata bini unu manera un yu di hende [Hesus resusitá], i el a bini serka e Ansiano di Dianan [Yehova Dios] i a wòrdu presentá Su dilanti. I na dje [Hesus] a wòrdu duná dominio, gloria i un reino, pa tur pueblo, nashon i hende di tur idioma por sirbié. Su dominio ta un dominio eterno ku lo no pasa nunka, i su reino ta un ku lo no wòrdu destruí.”​—Daniel 7:​13, 14; Lukas 1:​31, 32; Juan 3:​13-16.

E hendenan riba tera ku someté nan mes na e Reino di Dios lo disfrutá di salú perfekto, siguridat duradero i bida eterno. Profeta Isaias a skirbi: “Nan lo traha kas i biba den nan; tambe nan lo planta kunukunan di wendrùif i kome nan fruta. Nan lo no traha kas pa otro hende biba aden, ni planta pa otro hende kome.” (Isaias 65:​21-23) Apòstel Juan a skirbi en konekshon ku e tempu ei: “Mira, e tabernakel di Dios ta meimei di hende, i e lo biba meimei di nan, i nan lo ta su pueblo, i Dios mes lo ta meimei di nan, i e lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló; e promé kosnan a pasa.”​—Revelashon 21:​3, 4.

4 Kiko Bo Tin ku Hasi pa Sobrebibí e Fin?

Apòstel Pedro a rekonosé ku den e tempu di fin algun hende lo hasi bofon di e idea ku un dia Dios lo intervení den asuntunan humano i kaba ku maldat riba tera. (2 Pedro 3:​3, 4) Asina mes, Pedro a urgi e hendenan ku ta biba den nos tempu pa hasi lo siguiente:

Siña un lès for di historia. Pedro a skirbi ku Dios “no a spar e mundu antiguo, ma a preservá Noe, un predikadó di hustisia, huntu ku shete otro persona mas, ora ku el a trese un diluvio riba e mundu di e impionan [òf, malbadonan].” (2 Pedro 2:5) Pedro a bisa di e hendenan ku ta hasi bofon: “Di nan mes boluntat nan no kier aseptá e echo akí, ku pa medio di e palabra di Dios e shelunan a eksistí di hopi tempu pasá i e tera a wòrdu formá for di awa i pa medio di awa, dor di kua e mundu di e tempu ei a wòrdu destruí, siendo inundá ku awa. Ma e shelunan i e terab aktual pa medio di su palabra ta wòrdu reservá pa kandela, wardá pa e dia di huisio i destrukshon di hendenan impio.”​—2 Pedro 3:​5-7.

Biba segun e normanan moral di Dios. Pedro a skirbi ku e personanan ku ke sobrebibí e fin mester tin “un kondukta santu i deboto.” (2 Pedro 3:11) Tuma nota ku Pedro a enfatisá “kondukta santu.” Pues, aki no ta trata di djis bisa ku bo tin fe òf kore drecha kos ku Dios na último ora.

Ki obranan di kondukta santu Dios ta aseptá? Pakiko no kompará loke bo sa ku loke Beibel ta bisa di e tema akí? Testigunan di Yehova lo yuda bo hasi esei gustosamente. Pidi nan mustra bo den bo Beibel kua ta e base pa e kontestanan ku nan ta duna. Esei sigur lo yuda bo enfrentá futuro ku kurashi i konfiansa, apesar ku rònt di nos tin hopi kos ta pasa ku ta kousa miedu.

[Nota]

[Komentario na página 7]

No ta planeta Tera lo kaba, ma e hendenan ku ta destruyé