Nos Lektornan Ta Puntra . . .

Testigunan di Yehova Ta Praktiká Sanashon?

▪ Testigunan di Yehova nunka a praktiká sanashon. Meskos ku Hesus, nan ta konvensí ku nan mishon prinsipal ta pa prediká e bon notisia tokante e Reino di Dios. Ademas, nan ta kere firmemente ku por identifiká kristian berdadero, no pa medio di sanashon, sino mediante algu hopi mas importante.

No kabe duda ku e echo ku Hesukristu a kura hende malu den e promé siglo di nos era ta hopi importante pa tur hende. Ta di e manera ei el a duna un garantia ku bou di su reinado komo Rei di e Reino di Dios, “ningun habitante lo no bisa: ‘Mi ta malu.’”​—Isaias 33:24.

Pero kiko di nos tempu? Tantu sanadónan den kristiandat komo esnan den algun religion ku no ta kristian ta bisa ku nan por sana hende milagrosamente. Sinembargo, Hesus mes a spièrta pa tene kuidou ku hende ku ta bisa ku nan ta “hasi hopi milager” den su nòmber. Lo e bisa nan: “Nunka Mi no a konosé boso! Bai for di Mi, malechornan.” (Mateo 7:​22, 23, BPK) Pues, nos por bisa ku e supuesto milagernan ku sanadónan ta hasi awendia realmente ta indiká ku nan tin Dios su aprobashon òf bendishon?

Ban wak kiko Beibel ta bisa tokante kurashon ku Hesus a hasi. Ora nos kompará e manera ku Hesus a kura hende ku e métodonan ku sanadónan djawe ta usa, nos lo por mira si sanashon di tempu moderno ta bini di Dios òf nò.

E kurashonnan ku Hesus a hasi nunka tabata ku e meta di atraé siguidó òf un públiko grandi. Al kontrario, el a kura vários hende den privá. Hopi bes e tabata bisa e hendenan ku el a kura pa no bisa niun hende.​—Lukas 5:​13, 14.

Nunka Hesus a kobra pa e milagernan ku el a hasi. (Mateo 10:8) Ademas, semper su milagernan tabata eksitoso. El a kura tur hende enfermo ku a bini serka dje kompletamente, anto esei no a dependé di kuantu fe nan tabatin. (Lukas 6:19; Juan 5:​5-9, 13) Figurá bo, Hesus asta a lanta hende for di morto!​—Lukas 7:​11-17; 8:​40-56; Juan 11:​38-44.

Maske el a hasi e milagernan ei, e meta prinsipal di Hesus su ministerio no tabata pa atraé siguidó pa medio di milager durante seremonianan emoshonal. Mas bien, su trabou prinsipal tabata pa deklará e bon notisia di e Reino di Dios. Hesus a instruí su siguidónan den e trabou di hasi disipel pa nan siña otro hende tokante e speransa di haña salú perfekto bou di e Reino di Dios.​—Mateo 28:​19, 20.

Ta bèrdat ku algun di Hesus su siguidónan di promé siglo tabatin e don di kura hende, pero esakinan a stòp. (1 Korintionan 12:​29, 30; 13:​8, 13) Awe, nos por identifiká kristiannan berdadero, no pa medio di sanashon, sino pa medio di un laso di amor di sakrifisio propio. (Juan 13:35) Sanashon ku ta tuma lugá den tempu moderno no a logra produsí un berdadero famia kristian di tur rasa i antesedente ku ta uní pa e klase di amor ei.

Sinembargo, tin un grupo di kristian ku ta uní pa un laso di amor ku ta asina fuerte ku nan no ta hasi daño na niun hende, ni sikiera ora tin konflikto humano serio. Ken nan ta? Testigunan di Yehova. Rònt mundu, nan ta konosí pa e echo ku nan ta imitá Kristu su amor. Pa uni hende di diferente rasa, nashon, kultura i antesedente étniko, ta un milager, na moda di papia, i ta Dios su spiritu santu so por a logra esei. Bo ta keda kordialmente invitá pa asistí na nan reunionnan pa bo mira pa bo mes.

[Plachi na página 13]

Sanadónan di tempu moderno realmente tin Dios su respaldo?