Nos Lektornan Ta Puntra . . .

Mi Mester Djòin un Religion?

▪ Akaso e hipokresia i desunion ku ta reina entre baidónan di misa, i asta entre pastornan, ta disgustá bo i ta pone bo pensa dos biaha promé ku bo djòin un religion? Den tal kaso, e dicho franses akí kisas ta ekspresá bo sintimentu: “Hopi biaha esun mas serka di misa ta mas leu di Dios.”

Kisas bo ta respetá Beibel, i bo ta pensa ku otro hende i gobièrnu mester respetá un persona su derecho di pertenesé na un religion. Pero tal bes bo ta puntra bo mes: ‘Dios ta bisa ku hende ku ke ador’é na e manera ku e ta aseptá mester pertenesé na un religion?’

Den ún palabra, e kontesta ta sí. Dikon nos por ta asina sigur di esei? I kualke religion ta bon?

Laga nos wak e ehèmpel di Hesus. Akaso e tabata pertenesé na un religion? Sí, pasobra tempu e tabata mucha, el a kompañá su famia hudiu i otro hende ku tabatin e kustumber di bai na e tèmpel na Yerusalèm pa rindi adorashon na un manera organisá. (Lukas 2:​41-43) Na grandi, Hesus a adorá Dios huntu ku otro hudiu na e snoa lokal. (Lukas 4:​14-16) Un biaha ku e tabata papia ku un muhé ku a lanta den un otro religion, el a bisa e muhé: “Nos ta adorá loke nos konosé.” (Juan 4:22) Ku e palabranan ei Hesus a indiká bon kla ku e tabata pertenesé na e forma di religion hudiu.

Mas despues, Hesus a bisa ku Dios lo rechasá e hudiunan su forma di adorashon kontaminá, pasobra nan, komo nashon, a rechasá Hesus. (Mateo 23:​33–24:2) Sinembargo, Hesus a indiká ku hende ku ke adorá Dios na e manera ku e ta aseptá lo mester a pertenesé na un grupo organisá. El a bisa su siguidónan: “Na esaki tur hende lo sa ku boso ta mi disipel, si boso tin amor un pa otro.” (Juan 13:35) Un disipel di Kristu mester a asosiá ku su kompañeronan di kreensia pa e por a mustra nan amor. De echo, Hesus a bisa bon kla ku ta dos kaminda religioso so tin. Unu el a deskribí komo un kaminda ‘hanchu i espasioso ku ta hiba na destrukshon.’ Anto di e otro kaminda, el a bisa na kontraste: “Chikitu ta e porta i smal e kaminda ku ta hiba na bida, i poko ta esnan ku ta hañ’é.”​—Mateo 7:​13, 14.

Pues, ta bisto ku Dios no ta aseptá kualke kaminda religioso. Beibel ta spièrta asta pa no djòin esnan ku ta “hasi manera nan ta masha ku Dios, kaba nan a nenga e poder real di e fe kristian.” Es mas, e Palabra di Dios ta bisa pa “keda leu for di hende asina.” (2 Timoteo 3:5, BPK) Di otro banda, nos ta haña masha benefisio ora nos sa ta ken ta esnan ku ta riba e kaminda di bida i ta asosiá ku nan. Nos lo haña enkurashamentu i sosten awor, i nos lo tin un speransa briante pa futuro.​—Hebreonan 10:​24, 25.

Kon bo por haña sa kua grupo religioso ta riba e kaminda smal? Wèl, pakiko no konsiderá e kontestanan basá riba Beibel ku bo por haña den kapítulo 15 di e buki Kiko Beibel Ta Siña Realmente?a E informashon ei lo yuda bo sa kua organisashon religioso bo mester skohe a base di loke Beibel realmente ta bisa.

[Nota]