Laga e Spiritu di Dios Guia Bo i No e Spiritu di Mundu

“Nos a risibí, no e spiritu di mundu, sino e spiritu ku ta bini di Dios, pa nos konosé e kosnan ku Dios a duna nos gratuitamente.”​—1 KOR. 2:12.

1, 2. (a) Den ki sentido kristiannan berdadero ta den un guera? (b) Ki preguntanan nos lo konsiderá den e lès akí?

KRISTIANNAN berdadero ta den un guera! I nos enemigu ta un persona poderoso, sutil i kruel. E tin na su disposishon un arma masha efikas; kuné e ta influensiá mayoria di hende. Pero nos no tin nodi di sinti nos indefenso ni pensa ku lo e vense nos sigur. (Isa. 41:10) Nos tin na nos disposishon un medio di defensa ku por resistí kualke atake.

² Nos guera no ta literal sino spiritual. Nos enemigu ta Satanas e Diabel, i un di su armanan prinsipal ta “e spiritu di mundu.” (1 Kor. 2:12) Nos medio di defensa prinsipal kontra su atakenan ta e spiritu di Dios. Pa nos por vense den e guera akí i keda ku un bon relashon ku Yehova, nos tin ku hasi orashon pidié su spiritu santu i desplegá su fruta den nos bida. (Gal. 5:​22, 23) Pero kiko e spiritu di mundu ta, i dikon e ta asina poderoso? Kon nos por sa si e spiritu di mundu ta influensiando nos? Kon Hesus a laga e spiritu santu di Dios gui’é, i kon el a resistí e spiritu di mundu? I kiko nos ta siña for di su ehèmpel?

Dikon e Spiritu di Mundu Ta Asina Plamá?

3. Kiko e spiritu di mundu ta?

³ E spiritu di mundu ta bini di Satanas, “e prens di e mundu akí,” i ta obra kontra Dios su spiritu santu. (Juan 12:31; 14:30; 1 Juan 5:19) E spiritu di mundu ta e forsa dominante di e mundu akí ku ta motivá hende pa aktua kontra Dios su boluntat i propósito.

4, 5. Kon bin e spiritu ku Satanas ta promové ta asina plamá?

⁴ Kon bin e spiritu ku Satanas ta promové ta asina plamá? Pa kuminsá, Satanas a gaña Eva den e hòfi di Edén. El a konvensé Eva ku independensia for di Dios lo a dun’é un mihó bida. (Gén. 3:13) El a resultá di ta un gran mentiroso! (Juan 8:44) I pa medio di Eva, Satanas a logra ku Adam tambe a desobedesé Yehova. Adam su desishon a hasi hende katibu di piká, i komo resultado di esei, hende tin e tendensia di laga e spiritu di desobedensia di Satanas influensiá nan.​—Lesa Efesionan 2:​1-3.

⁵ Ademas, Satanas a influensiá un gran kantidat di angel, kendenan a bira demoño. (Rev. 12:​3, 4) E akto di traishon akí kontra Dios a tuma lugá algun tempu promé ku e Diluvio den tempu di Noe. E angelnan ei a kere ku lo a kumbiní nan bandoná nan puesto òf posishon den shelu pa bini na tera, tuma kurpa di hende i duna rienda liber na nan deseonan innatural. (Hudas 6) Ku yudansa di e demoñonan ei, ku awor ta den e region di spiritu, Satanas ta “gaña henter mundu.” (Rev. 12:9) Lamentablemente, mayoria di hende no ta konsiente di e influensia ku demoño por tin riba nan.​—2 Kor. 4:4.

E Spiritu di Mundu Tin Influensia Riba Bo?

6. Kon ta e úniko manera ku e spiritu di mundu por influensiá nos?

⁶ Hopi hende no sa kon Satanas ta influensiá hende. Pero kristiannan berdadero sí ta konsiente di su trikinan. (2 Kor. 2:11) De echo, e úniko manera ku e spiritu di mundu por influensiá nos ta si nos mes permití esei. Laga nos analisá kuater pregunta ku lo yuda nos saka afó kua spiritu ta influensiá nos, si ta e spiritu di Dios òf esun di mundu.

7. Menshoná un manera ku Satanas ta trata di alehá nos for di Yehova.

⁷ Kiko mi entretenimentu ta revelá? (Lesa Santiago 3:​14-18.) Un manera ku Satanas ta trata di alehá nos for di Dios ta di stimulá nos pa stima violensia. Diabel sa ku Yehova ta odia tur hende ku ta stima violensia. (Sal. 11:5) P’esei, e ta trata di usa literatura, pelíkula, músika i weganan elektróniko pa influensiá nos deseonan di karni. Algun di e weganan akí ta motivá hungadónan pa simulá aktonan grosero di inmoralidat i brutalidat. I Satanas no ta wòri ku nos ta stima loke ta bon, basta un parti di nos kurason ta stima loke ta malu.​—Sal. 97:10.

8, 9. Ki preguntanan relashoná ku entretenimentu nos tin ku hasi nos mes?

⁸ Di otro banda, e spiritu di Dios ta motivá hende ku ta sigui su guia pa nan ta puru, pasífiko i yen di miserikòrdia. P’esei ta bon pa nos puntra nos mes: ‘E entretenimentu ku mi ta skohe ta animá mi pa desplegá bon kualidatnan?’ Kòrda ku sabiduria di ariba ta “sin hipokresia.” Pues, hende ku ta laga e spiritu di Dios guia nan no ta hipókrita; nan no ta kana prediká tokante puresa moral i pas anto na kas nan ta entretené nan mes ku kosnan inmoral, violento i kruel.

⁹ Yehova ta eksigí deboshon eksklusivo, miéntras ku Satanas ta keda kontentu ku djis ‘un solo akto’ di adorashon, manera el a pidi Hesus. (Luk. 4:​7, 8, NW) Pues, ta bon pa nos puntra nos mes: ‘E entretenimentu ku mi ta skohe ta permití mi duna Dios deboshon eksklusivo? Mi eskoho ta yuda mi resistí e spiritu di mundu òf e ta hasi esei mas difísil? Mi tin ku hasi kambio den loke mi ta skohe komo entretenimentu?’

10, 11. (a) Ki aktitut relashoná ku kosnan material e spiritu di mundu ta promové? (b) Ki aktitut e Palabra di Dios, inspirá pa spiritu santu, ta animá nos pa desplegá?

¹⁰ Ki aktitut mi tin pa ku kosnan material? (Lesa Lukas 18:​24-30.) E spiritu di mundu ta promové golosidat i materialismo i ta motivá hende pa sigui tras di “deseo di wowo.” (1 Juan 2:16) E spiritu akí ta lanta den hopi hende e deseo fuerte pa bira riku. (1 Tim. 6:​9, 10) E ke laga nos kere ku akumulashon di kos material ta duna siguridat berdadero. (Pro. 18:11) Sinembargo, si nos permití amor pa plaka remplasá nos amor pa Dios, Satanas lo logra un viktoria. P’esei, nos mester puntra nos mes: ‘Mi bida ta enfoká riba buskamentu di komodidat material i plaser?’

¹¹ Na kontraste, e Palabra di Dios, ku ta inspirá pa spiritu santu, ta animá nos pa nos tin un punto di bista balansá di plaka i pa traha duru pa perkurá pa nos nesesidatnan i esnan di nos famia. (1 Tim. 5:8) E spiritu di Dios ta yuda hende ku ta sigui su guia imitá Yehova su personalidat generoso. E personanan ei ta balorá hende mas ku kos material i ta kontentu pa kompartí loke nan tin ora nan por hasi esei. (Pro. 3:​27, 28) Nunka nan ta permití kos material bira mas importante ku nan sirbishi na Dios.

12, 13. Na kontraste ku e spiritu di mundu, ki bon efekto e spiritu di Dios por tin riba nos?

¹² Kon mi ta trata otro hende? (Lesa Kolosensenan 3:​8-10 i 13.) E spiritu di mundu ta promové obra di karni. (Gal. 5:​19-21) Kon nos por sa kua spiritu ta influensiá nos? Wèl, esei no ta masha bisto ora kos ta bai bon. Mas bien, e ta bira bisto ora kos no ta bai dje bon ei, manera por ehèmpel ora un ruman ignorá nos, ofendé nos òf peka kontra nos. Ta nos reakshon riba un situashon asina ta demostrá kua spiritu ta influensiá nos. I kiko di nos famia? E manera ku nos ta trata esnan ku ta biba den kas huntu ku nos tambe ta demostrá kua spiritu tin dominio riba nos. Kisas ta bon pa nos kada un analisá nos mes. Puntra bo mes: ‘Kon a bai ku mi e último seis lunanan? Mi personalidat a bira mas manera esun di Kristu òf mi a kuminsá komportá mi mes malu atrobe i papia malu ku hende?’

¹³ E spiritu di Dios por yuda nos “pone un banda e hende bieu ku su práktikanan malbado” i bisti “e hende nobo.” Esei lo yuda nos bira mas amoroso i bondadoso. Nos lo ta mas inkliná pa pordoná otro hende asta ora ta parse ku tin motibu bálido pa keha. Maske nos ta kere ku un inhustisia a ser hasí kontra nos, nos lo no reakshoná mas ku ‘amargura, rabiamentu, lantamentu di bos ni insulto.’ Mas bien, nos lo hasi esfuerso pa trata otro hende ku “kompashon.”​—Efe. 4:​31, 32, BPK.

14. Ki opinion hopi hende den mundu tin di e Palabra di Dios?

¹⁴ Mi ta respetá i stima e normanan moral di Beibel? (Lesa Proverbionan 3:​5 i 6.) E spiritu di mundu ta reflehá rebeldia kontra e Palabra di Dios. Personanan influensiá pa e spiritu akí ta ignorá partinan di Beibel ku no ta kumbiní nan i ta preferá di sigui tradishon i filosofia di hende. (2 Tim. 4:​3, 4) Otronan ta ignorá e Palabra di Dios kompletamente. Hende asina ta sabí den nan mes bista i ta kuestioná Beibel su importansia i outentisidat. Nan ta suavisá Beibel su normanan puru relashoná ku adulterio, homoseksualidat i divorsio. Nan ta siña hende ku ‘loke ta malu ta bon i ku loke ta bon ta malu.’ (Isa. 5:20) E spiritu akí ta afektando nos? Nos ta dependé riba sabiduria di hende, inkluyendo nos mes ideanan, ora di trata ku problema? Òf nos ta hasi esfuerso pa sigui konseho di Beibel?

15. Kiko nos mester hasi en bes di dependé riba nos mes sabiduria?

¹⁵ E spiritu di Dios ta motivá nos pa mustra rèspèt pa Beibel. Meskos ku e salmista, nos ta konsiderá e Palabra di Dios komo un lampi pa nos pia i un lus pa nos kaminda. (Sal. 119:105) En bes di dependé riba nos mes sabiduria, ku konfiansa nos ta dependé riba Dios su Palabra skirbí pa yuda nos distinguí bon for di malu. Nos ta siña pa no solamente respetá Beibel sino pa stima Dios su lei tambe.​—Sal. 119:97.

Siña for di e Ehèmpel di Hesus

16. Kon nos por haña “e mente di Kristu”?

¹⁶ Pa nos por risibí e spiritu di Dios, òf haña su guia, nos tin ku kultivá “e mente di Kristu.” (1 Kor. 2:16) I si nos ke tin “e mesun aktitut mental ku Kristu Hesus tabatin,” nos tin ku sa kon e tabata pensa i aktua i imit’é. (Rom. 15:5, NW; 1 Ped. 2:21) Laga nos konsiderá algun manera ku nos por hasi esei.

17, 18. (a) Kiko nos por siña for di Hesus tokante orashon? (b) Dikon nos tin ku sigui “pidi”?

¹⁷ Pidi Dios duna bo su spiritu. Promé ku Hesus a hañ’é ku prueba, el a hasi orashon pidi Yehova yudansa di Su spiritu santu. (Luk. 22:​40, 41) Nos tambe mester pidi Dios duna nos su spiritu santu. I Yehova ta duna su spiritu santu libremente i generosamente na tur hende ku pidié ku fe. (Luk. 11:13) Hesus a bisa: “Pidi, i lo wòrdu duná na boso; buska, i boso lo haña; bati, i lo wòrdu habrí pa boso. Pasobra ken ku pidi ta risibí, i esun ku buska ta haña, i pa esun ku bati lo wòrdu habrí.”​—Mat. 7:​7, 8.

¹⁸ Ora nos ke pa Yehova duna nos su spiritu santu i yudansa, nos no mester ta muchu lihé pa stòp di pidi. Kisas nos tin ku hasi orashon vários bes tokante e mesun asuntu i tambe dediká mas tempu pa papia ku Yehova. Tin biaha Yehova ta permití hende ku ta pidié algu demostrá kuantu interes nan tin den loke nan ta pidi i kon fuerte nan fe ta promé ku e kontestá nan orashon.a

19. Kiko Hesus a hasi semper, i dikon nos tin ku imit’é?

¹⁹ Obedesé Yehova den tur kos. Hesus semper a hasi loke ta agradá su Tata. Na por lo ménos un okashon, Hesus a sinti pa trata ku e situashon na un manera distinto for di e boluntat di su Tata. Ma ku konfiansa el a bisa su Tata: “No mi boluntat, ma di bo sosodé.” (Luk. 22:42) Puntra bo mes: ‘Mi ta obedesé Dios asta ora no ta fásil pa hasi esei?’ Si nos ke bida, nos tin ku obedesé Dios. Nos tin ku obedes’é den tur kos pasobra e ta nos Kreador i e Fuente di nos bida i Esun ku tin nos na bida. (Sal. 95:​6, 7) No tin nada ku por remplasá obedensia. Sin dje nos no por haña aprobashon di Dios.

20. Rònt di kiko Hesus su bida a drei, i kon nos por imit’é?

²⁰ Siña konosé bo Beibel bon. Hesus a sita e Skritura pa resistí e atakenan ku Satanas a lansa direktamente kontra su fe. (Luk. 4:​1-13) Ora Hesus a hañ’é konfrontá ku oponentenan religioso, el a usa e Palabra di Dios komo su outoridat. (Mat. 15:​3-6) Henter Hesus su bida a drei rònt di konosé Dios su lei i kumpli kuné. (Mat. 5:17) Nos tambe tin ku sigui alimentá nos mente ku e Palabra di Dios ya ku e ta fortalesé nos fe. (Fil. 4:​8, 9) Pero kisas algun di nos tin problema pa haña tempu pa estudio personal i estudio di famia. Ma nos no tin ku haña tempu, mas bien, nos tin ku saka tempu.​—Efe. 5:​15-17.

21. Ki provishonnan nos por hasi uso di dje pa yuda nos siña konosé e Palabra di Dios mihó i aplik’é?

²¹ E echo ku “e esklabo fiel i prudente” a perkurá pa nos tin un anochi tur siman pa Adorashon Komo Famia ta duna nos mas tempu pa estudio personal i komo famia. (Mat. 24:45) Bo ta hasi bon uso di e provishon akí? Pa yuda bo haña e mente di Kristu, kisas bo por skohe algun tópiko i, durante bo seshonnan di estudio, analisá sistemátikamente loke Hesus a siña hende tokante nan. Bo por usa Indèks di Publikashonnan Watch Tower pa buska informashon riba e tópiko ku bo ta interesá den dje. Por ehèmpel, for di aña 2008 te ku 2010, e edishon públiko di e revista akí na spañó i vários otro idioma a presentá un seri di 12 artíkulo ku e tema “Loke Nos Por Siña for di Hesus.” Kisas bo por usa e artíkulonan akí komo base di bo estudio. Na aña 2006, e revista ¡Despertad! a kuminsá presentá e rúbrika “Kon Lo Bo Kontestá?” E preguntanan den e artíkulo akí tabata prepará pa yuda bo amplia i profundisá bo konosementu di e Palabra di Dios. De bes en kuando, bo por inkluí e tipo di artíkulonan akí den bo programa di Adorashon Komo Famia.

Nos Por Vense Mundu

22, 23. Kiko nos tin ku hasi pa vense mundu?

²² Pa Dios su spiritu santu por guia nos, nos tin ku resistí e spiritu di mundu. Pero no ta fásil pa resistí e spiritu ei; esaki por ta un berdadero lucha. (Hudas 3) Pero nos por vense! Hesus a bisa su disipelnan: “Den mundu boso tin tribulashon, ma tene kurashi, mi a vense mundu.”​—Juan 16:33.

²³ Nos tambe por vense mundu si nos resistí su spiritu i ta hasi tur loke nos por pa risibí òf sigui guia di Dios su spiritu santu. Sí, “si Dios ta pa nos, ken por ta kontra nos?” (Rom. 8:31) Ora nos tin e spiritu santu di Dios i ta sigui su guia deskribí den Beibel, nos lo ta satisfecho i felis; nos lo tin pas i e speransa di biba pa semper den e mundu nobo ku ta masha serka.

[Nota]

Bo Ta Kòrda?

• Dikon e spiritu di mundu ta asina plamá?

• Kua ta e kuater preguntanan ku nos mester hasi nos mes?

• Den ki tres manera nos por imitá Hesus pa por risibí e spiritu di Dios?

[Plachi na página 12]

Kon algun angel a bira demoño?

[Plachi na página 14]

Satanas ta usa e spiritu di mundu pa tene hende den su gara, pero nos por libra nos mes