Ken Hesukristu Ta Realmente?
“Ora ku el a drenta Yerusalèm, henter e stat a keda aribabou i tabata bisa: ‘Ta ken esaki ta?’ I e multitutnan tabata bisa: ‘Esaki ta profeta Hesus, for di Názarèt di Galilea.’”—MATEO 21:10, 11.
DIKON Hesukristua su yegada na Yerusalèm riba e dia ei den e lènte di aña 33 di nos era a pone e stat aribabou? Hopi hende den e stat a tende tokante Hesus i e kosnan remarkabel ku el a hasi. I e notisia a sigui plama. (Juan 12:17-19) Sinembargo, loke e multitut no tabata sa ta ku e hòmber ei lo a sigui influensiá hende rònt mundu atraves di siglonan te den nos tempu.
Ban wak algun kos ku ta mustra kuantu influensia Hesus tabatin riba historia.
E kalènder ku hende ta usa den hopi parti di mundu ta basá riba e aña ku nan ta pensa ku Hesus a nase.
Alrededor di dos mil mion hende, esta, un tersera parti di poblashon mundial, ta yama nan mes kristian.
E religion islam ku tin mas ku mil mion miembro rònt mundu ta siña ku Hesus ta “un profeta mas importante ku Abraham, Noe i Moisés.”
Hende ta usa hopi di Hesus su dichonan sabí den nan abla di tur dia. At’akí algun di nan:
‘Laga bo sí ta sí i bo nò, nò.’—MATEO 5:37
‘No laga bo man robes sa loke bo man drechi hasi.’—MATEO 6:3.
‘Bo no por sirbi dos shon.’—MATEO 6:24.
‘No tira pèrla pa porko.’—MATEO 7:6.
“Duna Cesar loke ta di Cesar.”—MATEO 22:21.
‘Un bon samaritano.’—LUKAS 10:33.
No tin duda ku Hesus a influensiá historia. Sinembargo, hende tin diferente idea i kreensia tokante dje. P’esei, kisas bo ta puntra, ‘Ken Hesukristu ta realmente?’ Ta Beibel so ta bisa nos di unda Hesus tabata, kon el a hiba su bida i pakiko el a muri. Ora bo sa e bèrdatnan ei tokante Hesus, esei por tin un efekto profundo riba bo bida tantu awor komo den futuro.
a “Hesus,” e nòmber personal di e profeta akí di Názarèt, ta nifiká “Yehova Ta Salbashon.” E palabra “Kristu” ta un título ku ta nifiká e “Ungí,” esei ke men ku Dios a ungí òf nombrá Hesus pa okupá un puesto spesial.