BIBLIOTEKA ONLINE Watchtower
Watchtower
BIBLIOTEKA ONLINE
Papiamentu (Kòrsou)
  • BEIBEL
  • PUBLIKASHON
  • REUNION
  • w11 1/4 pág. 8-9
  • Hesus—Pakiko El A Muri?

No tin vidio disponibel pa esaki.

Despensa, tin un problema pa habri e vidio.

  • Hesus—Pakiko El A Muri?
  • E Toren di Vigilansia Anunsiando e Reino di Yehova Dios—2011
  • Informashon Similar
  • Hesukristu—Kontesta pa Nos Preguntanan
    E Toren di Vigilansia Anunsiando e Reino di Yehova Dios—2012
  • Ken Hesukristu Ta?
    Kiko Beibel Ta Siña Realmente?
  • Loke Dios A Haci pa Salba Humanidad
    Conocimentu Cu Ta Hiba na Bida Eterno
  • Kon Hesus Ta Engrandesé e Hustisia di Dios?
    E Toren di Vigilansia Anunsiando e Reino di Yehova Dios—2010
Mas Artíkulo
E Toren di Vigilansia Anunsiando e Reino di Yehova Dios—2011
w11 1/4 pág. 8-9

Hesus—Pakiko El A Muri?

‘E Yu di hende a bin pa duna su bida komo preis di reskate pa hopi.’​—MARKO 10:45.

HESUS tabata sa kiko ta bai pasa kuné. E tabata sa ku su bida lo no ta fásil. E tabata konsiente ku na edat di 30 i piku aña lo el a muri na un manera kruel, i e tabata kompletamente prepará pa esei.

Beibel ta duna e morto di Hesus masha importansia. Un buki di konsulta ta bisa ku e Skritura Griego Kristian, òf Tèstamènt Nobo, ta menshoná e morto di Hesus mas o ménos 175 biaha. Pero dikon Hesus mester a sufri i despues muri? Nos mester komprondé esei, pasobra e morto di Hesus por tin un efekto profundo riba nos bida.

Hesus tabata sa kiko ta sper’é

Durante e último aña di Hesus su bida, el a papia na vários okashon ku su disipelnan tokante e sufrimentu i morto ku tabata sper’é. Ora e tabata riba kaminda pa Yerusalèm pa selebrá su último Pasku Hudiu, el a bisa su 12 apòstelnan: “E Yu di hende lo wòrdu entregá na e saserdotenan prinsipal i eskribanan; i nan lo konden’é na morto, i lo entreg’é na e paganonan. I nan lo hasi bofon di dje i skupi riba dje i sut’é i mat’é.”a (Marko 10:​33, 34) Dikon e tabata asina sigur di loke tabata sper’é?

Hesus tabata konosé e tantísimo profesianan den e Skritura Hebreo ku tabata mustra kon su bida lo terminá. (Lukas 18:​31-33) Ban wak awor algun di e profesianan huntu ku e tekstonan bíbliko ku ta splika kon nan a kumpli.

E Mesias lo a ser . . .

  • Traishoná pa trinta pida di plata.​—ZAKARIAS 11:12; MATEO 26:​14-16.

  • Gòlpiá i skupí.​—ISAIAS 50:6; MATEO 26:67; 27:​26, 30.

  • Klabá na staka.​—SALMO 22:16; MARKO 15:​24, 25.

  • Insultá ora e tabata na staka.​—SALMO 22:​7, 8; MATEO 27:​39-43.

  • Matá sin ku nan a kibra ningun di su wesunan.​—SALMO 34:20; JUAN 19:​33, 36.

Hesus a kumpli ku tur e profesianan akí i hopi otro mas. Ta imposibel ku e mes lo por a hasi areglo pa tur e kosnan akí sosodé. E echo ku tur e profesianan a haña nan kumplimentu den Hesus ta duna prueba ku Dios a mand’é.b

Pero ta dikon Hesus mester a sufri i muri?

Hesus a muri pa resolvé kuestionnan sumamente importante

Hesus tabata konsiente ku den hòfi di Edén a lanta algun kuestion ku ta di importansia pa tur kriatura inteligente. Instigá pa un kriatura spiritual rebelde, Adam ku Eva a skohe pa desobedesé Dios. E echo ku e pareha a rebeldiá a lanta duda enkuanto Dios su manera di goberná. Ademas, nan piká a lanta duda si hende lo por keda fiel na Dios ora nan ta bou di prueba.​—Génesis 3:​1-6; Jòb 2:​1-5.

Hesus a kita tur e dudanan ku a lanta enkuanto Yehova su manera di goberná i integridat di hende. Kon el a hasi esei? El a keda obediente “te na morto” i asina a apoyá Dios su manera di goberná. (Filipensenan 2:8) Ademas, Hesus a duna prueba ku un hende perfekto por mantené su integridat na Yehova sin importá kon duru e pruebanan ta.

Hesus a muri pa libra humanidat

Isaias a profetisá ku e Mesias primintí su sufrimentu i morto lo kubri òf paga pa e pikánan di humanidat. (Isaias 53:​5, 10) Hesus a komprondé esei hopi bon, i p’esei di buena gana el a “duna su bida komo preis di reskate pa hopi.” (Mateo 20:28) E echo ku el a duna su bida komo reskate a habri kaminda pa hende imperfekto por tin un bon relashon ku Yehova i pa libra nan di piká i morto. E morto di Hesus ta duna nos e oportunidat di haña bèk loke Adam ku Eva a pèrdè, esta e speransa di biba pa semper den kondishonnan perfekto riba tera.c​—Revelashon 21:​3, 4.

Loke bo tin ku hasi

Den e artíkulonan ku nos a kaba di trata, nos a mira, segun Beibel, di unda Hesus tabata, kon el a hiba su bida i pakiko el a muri. Ora bo sa e bèrdatnan ei tokante Hesus, esei ta aklará ideanan robes ku bo por tin tokante Hesus. I si bo aktua na armonia ku e konosementu ei, lo bo por haña bendishon tambe, esta un mihó bida awor i bida eterno den futuro. Beibel ta bisa nos kiko nos tin ku hasi si nos ke benefisiá di esei.

  • Nos tin ku siña mas tokante Hesukristu i su papel den Yehova su propósito.​—JUAN 17:3.

  • Demostrá mediante e manera ku bo ta hiba bo bida ku bo tin fe den Hesus i ta asept’é komo bo Salbador.​—JUAN 3:36; ECHONAN 5:31.

Gustosamente Testigunan di Yehova lo yuda bo siña mas tokante Hesukristu, e “Yu unigénito” di Dios, mediante ken nos por haña e regalo di “bida eterno.”​—Juan 3:16.

a Hopi bes Hesus a referí na su mes komo “e Yu di hende.” (Mateo 8:20) E ekspreshon akí no ta mustra solamente ku e tabata un ser humano den tur sentido di palabra, sino tambe ku e tabata e “yu di hende” ku profesia di Beibel a papia di dje.​—Daniel 7:​13, 14.

b Si bo ke mas informashon tokante profesianan ku a haña kumplimentu den Hesus, wak e tópiko “Hesukristu—E Mesias Primintí” den e apèndiks di e buki Kiko Beibel Ta Siña Realmente? publiká pa Testigunan di Yehova.

c Si bo ke mas informashon tokante e balor di Hesus su reskate, wak kapítulo 5, “Dios Su Regalo di Mas Grandi: E Reskate” den e buki Kiko Beibel Ta Siña Realmente?

    Publikashonnan na Papiamentu (Curaçao) (1986-2025)
    Log Out
    Log In
    • Papiamentu (Kòrsou)
    • Kompartí
    • Preferensia
    • Copyright © 2025 Watch Tower Bible and Tract Society of Pennsylvania
    • Kondishonnan di Uso
    • Maneho di Privasidat
    • Konfigurashon di Privasidat
    • JW.ORG
    • Log In
    Kompartí