Profesia 6. Un Trabou di Prediká Mundialmente
“Lo prediká e bon notisia di e reino rònt mundu.”—MATEO 24:14, BPK.
● Vaiatea ta biba riba e isla Fangatau den Laman Pasífiko ku ta pertenesé na e Archipiélago Tuamotu. Aunke Tuamotu ta konsistí di kasi 80 isla plamá riba un área di mas ku 802.900 kilometer kuadrá, e tin un poblashon di solamente 16.000 habitante. Asina mes, Testigunan di Yehova a logra papia ku Vaiatea i su bisiñanan. Kon bin? Pasobra e Testigunan ta deseá di kompartí e bon notisia tokante Dios su Reino ku tur hende—sin importá unda nan ta biba.
KIKO ECHONAN TA MUSTRA? E mensahe di Reino ta alkansá tur skina di mundu. Den 2010 so, Testigunan di Yehova a dediká mas ku 1,6 mil mion ora predikando e bon notisia akí den 236 pais. Pa dia, esei ta un averahe di 30 minüt den e trabou di prediká pa kada Testigu. Durante e último dékada, nan a produsí i distribuí mas ku 20 mil mion ehemplar di literatura pa edukashon bíbliko.
KIKO TA UN OPHESHON KOMUN? Hende a prediká e mensahe di Beibel pa míles di aña kaba.
E OPHESHON EI TIN BASE? Ta bèrdat ku hopi hende a prediká algu tokante e mensahe di Beibel. Sinembargo, mayoria di nan a hasi esei solamente pa un tempu kòrtiku i a kubri solamente un área chikitu. Na kontraste, Testigunan di Yehova, na un manera organisá, ta partisipá den un kampaña mundial di prediká ku ta alkansá sientos di miónes di hende. E Testigunan a perseverá den e trabou di prediká apesar di oposishon severo ku a bini di algun di e organisashonnan mas poderoso i kruel den historia humano.a (Marko 13:13) Ademas, Testigunan di Yehova no ta ser pagá pa hasi e trabou di prediká. Mas bien, nan ta duna boluntariamente di nan tempu i nan no ta kobra pa literatura ku nan ta ofresé. Nan trabou ta ser sostené kompletamente pa medio di kontribushonnan boluntario.
KIKO ABO TA PENSA? “E bon notisia di e reino” ta ser prediká rònt mundu? E kumplimentu di e profesia akí kisas ta nifiká ku tin algu mihó pa nos den futuro?
[Nota]
a Pa mas informashon, wak e tres vidionan “Fiel bou di Prueba,” “Triángulo Püs” i “Testigunan di Yehova Ta Para Firme Kontra Atake Nazi” distribuí pa Testigunan di Yehova.
[Komentario na página 9]
“Tanten ku Yehova ta permití, nos lo sigui prediká e bon notisia di Reino ku zelo, hasiendo uso di tur medio posibel pa alkansá hende.”—ANUARIO 2010 DI TESTIGUNAN DI YEHOVA.