4 Dios Ta Inhustu—Esei Ta Bèrdat?

Loke hende sa bisa: “Ta Dios ta goberná mundu, pues tur loke ta sosodé ta su boluntat. E ta responsabel pa tur inhustisia, diskriminashon i opreshon.”

Loke Beibel ta siña: Dios no ta esun ku ta kousa e inhustisia ku tin na mundu. Beibel ta bisa ku Yehova “su obra ta perfekto, pasobra tur su kamindanan ta hustu.”—Deuteronomio 32:4.

Dios ta bondadoso ku tur hende, asta ku esnan ku no meresé esei. Beibel ta bisa: “[Dios] ta laga su solo sali riba mal hende i bon hende i ta laga awa kai riba hende hustu i inhustu.” (Mateo 5:45) Sí, Yehova ta trata hende di tur rasa i kultura na un manera hustu. Echonan 10:34 i 35 ta bisa ku “Dios no ta hasi distinshon di persona, sino ku e ta aseptá tur hende di tur nashon ku ta tem’é i ku ta hasi loke ta korekto.”

Kiko anto ta e kousa di tur inhustisia? Hopi hende no ta sigui e ehèmpel ku Dios a pone; nan ta trata otro hende na un manera inhustu. (Deuteronomio 32:5) Ademas, Beibel ta mustra ku Dios ta permití su enemigu, Diabel, ehersé outoridat riba mundu.a (1 Huan 5:19) Pero pronto Dios lo pone un fin na e manera inhustu akí di goberná. Ya kaba el a hasi preparashon pa “destruí e obranan di Diabel.”—1 Huan 3:8.

Kon e bèrdat ta yuda bo? Kisas lo bo keda babuká ora bo haña sa di e tantísimo korupshon, opreshon i inhustisia ku tin na mundu. Pero ora bo sa e rais di e problema bo ta komprondé pakiko e situashon na mundu ta asina malu i dikon hende no por hasi planeta Tera un mihó lugá di biba apesar di tur nan esfuersonan. (Salmo 146:3) P’esei, en bes di hinka tur bo tempu i energia den algu ku su resultado lo ta temporal, pakiko no konfia den e promesanan di Dios pa un futuro briante?—Revelashon 21:3, 4.

Ora nos sa kiko ta e berdadero kousa di asina tantu inhustisia, nos lo por trata mihó ku kualke problema ku presentá. I si hende ta trata nos na un manera inhustu, nos lo por sklama na Dios meskos ku su sirbidó Habakuk, kende a bisa: “Lei ta wòrdu ignorá, i hustisia nunka ta wòrdu hasí.” (Habakuk 1:4) Anto ripará ku Dios no a rabia kuné. Al kontrario, Dios a bisa Habakuk ku el a stipulá un dia kaba pa drecha asuntu, i el a yuda Habakuk mantené su goso apesar di difikultat. (Habakuk 2:2-4; 3:17, 18) Pues, ta bon pa bo tambe konfia den Dios i spera e tempu ku lo e kaba ku tur inhustisia. Asina lo bo tin pas mental i trankilidat den e mundu inhustu akí.

[Nota]

a Pa bo haña sa kon Diabel a bini na eksistensia, wak kapítulo 3 di e buki Kiko Beibel Ta Siña Realmente?

[Komentario na página 7]

Ta Dios ta responsabel pa e sufrimentu i inhustisia ku tin na mundu?

[Rekonosementu pa Pòtret na página 7]