Bo Tabata Sa?

Dikon tabatin kambiadó di plaka den e tèmpel di Herúsalèm?

▪ Poko promé ku Hesus a muri, el a atendé un situashon grave ku tabata tuma lugá den e tèmpel. Beibel ta bisa: “Hesus . . . a kore ku tur hende ku tabata bende i kumpra kos den tèmpel, i el a bòltu mesa di e kambiadónan di plaka i banki di esnan ku tabata bende palomba. I el a bisa nan: ‘Ta pará skirbí: “Mi kas lo ser yamá un kas di orashon,” ma boso ta hasié un kueba di ladron.’”—Mateo 21:12, 13.

E hudiunan di promé siglo i tambe hende kombertí na hudaismo tabata bini for di hopi pais i stat pa bishitá e tèmpel na Herúsalèm, i nan tabata bini ku plaka di nan área. Sinembargo, pa nan a paga e belasting anual di tèmpel, kumpra bestia pa sakrifisio òf duna ofrenda boluntario, nan mester a usa e tipo di plaka ku tèmpel tabata eksigí. Pues, e kambiadónan di plaka a kobra un komishon pa kambia e monedanan di diferente lugá i di diferente balor na e plaka aseptabel. Ora dianan di fiesta hudiu tabata serka, e kambiadónan di plaka tabata pone nan stènt den patio di e tèmpel.

Hesus a akusá e kambiadónan di plaka di a hasi e tèmpel “un kueba di ladron.” Esaki evidentemente ta indiká ku nan tabata kobra un komishon eksorbitante pa nan servisio.