Dies Pregunta Tokante Sèks i Nan Kontesta

1 Ta relashon seksual Adam ku Eva a tene ora nan a peka den hòfi di Edén?

▪ Kontesta: Hopi hende ta kere ku e fruta prohibí ku Beibel ta papia di dje a simbolisá relashon seksual. Pero no ta esei Beibel ta siña.

Pensa riba esaki: Ta promé ku Dios a krea Eva, el a bisa Adam pa no kome di “e palu di konosementu di bon i malu.” (Génesis 2:15-18) Siendo ku Adam tabata su so, e restrikshon akí no por a referí na relashon seksual. Ademas, ta Dios mes a bisa Adam ku Eva pa nan “sea fruktífero i multipliká, i yena e tera.” (Génesis 1:28) Awor, bo ta kere ku un Dios amoroso lo a manda e promé pareha “yena e tera”—loke a enserá tene relashon seksual—pa despues e sentensiá nan na morto pasobra nan a obedesé su instrukshonnan?—1 Huan 4:8.

Un otro kos: Eva tabata su so ora el ‘a kohe e fruta prohibí i a kome.’ Ta despues, ora e ‘tabata huntu ku su esposo, el a duna su esposo di e fruta i el a kome.’—Génesis 3:1-6.

Es mas, ora ku finalmente Adam ku Eva a tene relashon seksual i haña yu, Dios no a kondená nan. (Génesis 4:1, 2) Pues, ta opvio ku e fruta ku Adam ku Eva a kome di dje no tabata un fruta simbóliko ku a representá relashon seksual sino un fruta real ku a krese na palu.

2 Beibel ta prohibí hende di disfrutá di relashon seksual?

▪ Kontesta: E promé buki di Beibel ta bisa ku ta Dios mes a krea hende “hòmber i muhé.” I Dios a bisa ku su kreashon tabata “masha bon.” (Génesis 1:27, 31) Despues, Dios a inspirá un eskritor di Beibel pa duna esposonan e siguiente instrukshon: ‘Alegrá ku e esposa di bo hubentut. Laga su pechunan satisfasé bo tur ora.’ (Proverbionan 5:18, 19) Akaso nos por dedusí for di e palabranan akí ku Beibel ta prohibí hende di disfrutá di relashon seksual?

Echonan ta mustra ku Dios a krea órganonan seksual no solamente pa hende por prokreá pero tambe pa parehanan kasá por ekspresá nan amor i afekto pa otro i disfrutá di esaki. Ora un hòmber i un muhé ta stima otro, tal relashon ta hasi posibel ku nan por satisfasé nan nesesidat físiko i emoshonal.

3 Dios ta aprobá pa un hòmber i un muhé biba huntu sin ku nan ta legalmente kasá?

▪ Kontesta: Beibel ta bisa bon kla ku “Dios lo husga esnan ku ta kometé fornikashon.” (Hebreonan 13:4) E palabra griego pornéia, ku ta ser tradusí komo fornikashon, tin un nifikashon amplio. E ta referí, entre otro, na tur mal uso di órgano seksual entre hende ku no ta kasá ku otro.a P’esei den bista di Dios, ta malu pa un pareha biba huntu maske nan tin intenshon di kasa despues.

Sí, asta si un hòmber i un muhé ta profundamente namorá di otro, Dios ta eksigí pa nan kasa promé ku nan tene relashon seksual. Kòrda ku ta Dios a krea hende ku e kapasidat di stima. I su kualidat prinsipal ta amor. Pues, Dios tin bon motibu pa permití relashon seksual solamente entre parehanan kasá, manera e siguiente artíkulo lo splika.

4 Poligamia ta aseptabel?

▪ Kontesta: Tabatin un tempu ku Dios tabata permití hende hòmber tin mas ku ún esposa. (Génesis 4:19; 16:1-4; 29:18–30:24) Pero no ta Dios a instituí poligamia. El a duna Adam ún esposa.

Ku tempu, Dios a duna Hesukristu outorisashon pa reinstituí monogamia, loke semper tabata Dios su norma pa matrimonio. (Huan 8:28) Ora algun fariseo a hasi Hesus un pregunta tokante matrimonio, el a kontestá: “Boso no a lesa ku esun ku a krea hende na prinsipio a traha nan hòmber i muhé i a bisa: ‘P’esei un hòmber lo bandoná su tata i su mama i lo pega na su esposa, i nan dos lo ta ún karni?’”—Mateo 19:4, 5.

Mas despues, Dios a inspirá un disipel di Hesus pa skirbi: “Laga kada hòmber tin su mes esposa i kada muhé su mes esposo.” (1 Korintionan 7:2) Ademas, Beibel ta mustra ku pa un hòmber kasá por risibí privilegio den e kongregashon kristian, e mester ta “esposo di ún esposa.”—1 Timoteo 3:2, 12.

5 Ta malu pa parehanan kasá usa antikonseptivo?

▪ Kontesta: Hesus no a duna su siguidónan e mandato pa haña yu. Su disipelnan tampoko no a duna e instrukshon ei. Niun kaminda Beibel no ta kondená uso di antikonseptivo.

Pues, parehanan kasá ta liber pa disidí si nan ke haña yu òf nò. I ta nan mester sa kuantu yu nan ke i na ki momento nan ta haña nan. Anto si un pareha skohe pa usa un òf otro antikonseptivo ku no ta kousa aborto pa evitá embaraso, esei ta nan responsabilidat i nan desishon.b Ningun hende no tin derecho di husga nan.—Romanonan 14:4, 10-13.

6 Ta malu pa kometé aborto?

▪ Kontesta: Bida ta sagrado pa Dios. P’e, asta un èmbrio ta un bida, esta, un ser bibu. (Salmo 139:16) P’esei, Dios a bisa bon kla ku si un persona lástima un yu ku no a nase ainda, lo ten’é responsabel pa esei. Pues, den bista di Dios, mata un yu ku no a nase ainda ta un krímen.—Éksodo 20:13; 21:22, 23, NW.

Pero kiko si durante di parto surgi un emergensia ku ta obligá un pareha skohe entre e mama òf e yu? Den un kaso asina, e pareha mester disidí bida di ken nan ke purba salba.c

7 Beibel ta permití divorsio?

▪ Kontesta: Sí, Beibel ta permití un pareha divorsiá. Sinembargo, Hesus a duna solamente ún motibu bálido pa divorsio ora el a bisa: “Ken ku divorsiá di su esposa i kasa ku un otro muhé—si no ta pa motibu ku e esposa a kometé fornikashon [esta, tene relashon seksual pafó di matrimonio]—ta kometé adulterio.”—Mateo 19:9.

Pero Dios ta odia ora parehanan ta divorsiá pa motibu di engaño i traishon. P’esei, lo e regla kuenta ku tur esnan ku ta bandoná nan kasá sin motibu bálido, i foral si nan ta hasi esei ku e intenshon di drenta ku un otro persona.—Malakías 2:13-16; Marko 10:9.

8 Dios ta aprobá homoseksualidat?

▪ Kontesta: Na un manera masha kla Beibel ta kondená fornikashon, lokual ta inkluí relashon homoseksual. (Romanonan 1:26, 27; Galationan 5:19-21) Pero aunke Beibel ta mustra bon kla ku Dios ta desaprobá e estilo di bida ei, nos sa tambe ku “Dios a stima mundu asina tantu ku el a duna su Yu unigénito, pa tur ku pone fe den dje no bai pèrdí, ma haña bida eterno.”—Huan 3:16.

P’esei, maske kristiannan berdadero no ta apoyá relashonnan homoseksual, nan ta demostrá kariño na tur hende. (Mateo 7:12) Dios ke pa nos “onra tur sorto di hende.” Pues, kristiannan berdadero no ta odia homoseksualnan.—1 Pedro 2:17.

9 Tin algu malu den sèks via telefòn òf via Internet?

▪ Kontesta: Pa satisfasé nan deseo seksual, algun hende ta usa Internet òf telefòn pa papia tokante sèks, skucha òf manda mensahenan ku ta eksitá otro seksualmente i pa manda imágennan erótiko.

Beibel no ta papia spesífikamente tokante e práktikanan moderno akí. Pero e ta bisa sí pa “no menshoná fornikashon ni ningun sorto di impuresa ni golosidat mes meimei di boso, pasobra esaki no ta apropiá pa hende santu; ni komportashon bergonsoso ni papiamentu di disparate ni chansanan vulgar—kosnan ku no ta pas.” (Efesionan 5:3, 4) Práktikanan manera sèks via telefòn i via Internet ta promové un punto di bista inkorekto di sèks i ta motivá hende pa eksperensiá plaser seksual pafó di matrimonio. Pues, na lugá di yuda hende dominá deseo seksual, e práktikanan ei ta insitá hende pa satisfasé nan deseonan egoista.

10 Kiko ta Beibel su punto di bista di masturbashon?

▪ Kontesta: Beibel no ta papia spesífikamente di masturbashon, esta, e práktika di stimulá bo mes kurpa ku e meta di kousa eksitashon seksual i orgasmo. No opstante, Beibel ta urgi kristiannan pa ‘mata e inklinashonnan di nan kurpa pa loke ta fornikashon, pashon inapropiá i impuresa.’—Kolosensenan 3:5.

Masturbashon ta pone un persona bira egoséntriko i haña un idea robes di sèks. Ma Beibel ta sigurá nos ku Dios por duna un persona ku ta hasi esfuerso sinsero pa stòp ku e mal hábito ei “poder ku ta surpasá esun di hende” pa asina e por vense.—2 Korintionan 4:7; Filipensenan 4:13.

[Nota]