Ta Bon pa Resa na Santu?

MAYORIA di hende a yega di sinti e nesesidat di buska yudansa serka un otro hende den tempu di ansiedat. Dependiendo di e tipo di problema, muy probablemente nos lo skohe pa papia ku un amigu ku ta mustra komprenshon i ku tambe a pasa den un situashon similar. Sí, un amigu ideal mester tin tantu komprenshon komo eksperensia.

Tin hende kisas ta sinti meskos ora nan ke hasi orashon. Komo ku nan ta haña ku Dios ta asina elevá i inaksesibel, nan ta sinti nan mas kómodo pa akudí na un santu. Nan ta rasoná ku debí ku e santunan a pasa den prueba i difikultat ku hende tambe ta pasa aden, nan ta den mihó posishon pa mustra komprenshon. Por ehèmpel, un hende ku a pèrdè algu ku ta masha balioso p’e kisas ta preferá di resa na “San” Antonio di Padua—e patron di kosnan pèrdí òf hòrtá. Si nan ta hasi orashon pa un bestia ku ta malu, kisas nan ta skohe pa aserká “San” Fransisko di Assisi, i si nan ta desesperá pasobra nan a pèrdè speransa, podisé nan ta skohe pa resa na “San” Hudas Tadeo.

Pero, segun Beibel, ta korekto pa resa na santu? Dios ta skucha e tipo di orashonnan ei? Kiko Dios ta pensa di hasimentu di orashon na santu? Siendo ku nos ke pa Dios skucha nos orashonnan, nos mester ta interesá den su punto di bista.

SEGUN BEIBEL, TA BON PA RESA NA SANTU?

E kustumber di hasi orashon na santu ta basá riba e doktrina di interseshon di santu, un siñansa di Iglesia Katóliko. E Catisashi di Iglesia Catolico ta bisa tokante e santunan: “Nan no ta laga di intercede pa nos cerca Tata, ya cu nan ta ofrece pa medio di e unico Mediador entre Dios y hende, Cristo Hesus, e meritonan cu nan a adkeri na mundo.” Pues, esnan ku ta hasi orashon na santu ta karga speransa di risibí fabor spesial mediante e santunan debí ku nan ta kere ku e santunan tin un posishon bendishoná dilanti Dios.

Beibel ta siña e doktrina ei? Tin hende ta bisa ku sí i ku ta apòstel Pablo a pone fundeshi pa hasi orashon na santu. Por ehèmpel, na e kristiannan na Roma, el a skirbi: “Awor bon, mi ta hasi un apelashon na boso, rumannan, pa medio di nos Señor Hesukristu i pa medio di e amor ku ta bini di spiritu santu, pa huntu ku mi boso hasi orashon na Dios ku masha fervor pa mi.” (Romanonan 15:30) Akaso Pablo a pidi su kompañeronan kristian pa intersedé p’e dilanti di Dios? Klaru ku nò. Mas bien, Pablo kier a mustra ku ta korekto pa pidi un kompañero kristian pa hasi orashon pa nos. Pero ta henteramente un otro kos pa resa na un persona ku segun bo ta den shelu pa e hasi un petishon na Dios pa bo. Dikon nos no mester hasi esei?

Den e Evangelio di apòstel Huan, Hesus a bisa: “Ami ta e kaminda, e bèrdat i e bida. Ningun hende no ta yega serka e Tata si no ta pa medio di mi.” (Huan 14:6) El a bisa tambe: “Loke boso pidi Tata den mi nòmber, E ta duna boso.” (Huan 15:16, BPK) Hesus no a bisa ku nos mester hasi orashon direktamente na dje i ku despues lo e papia ku Dios pa nos. Mas bien, pa nos orashonnan ser skuchá, nos mester hasi orashon na Dios mediante Hesus i no mediante ningun otro persona.

Ora e disipelnan di Hesus a pidié pa siña nan kon pa hasi orashon, el a bisa nan: “Ora boso ta hasi orashon, bisa: ‘Tata, laga bo nòmber sea santifiká.’” (Lukas 11:2) Esei ta nifiká ku “ora” nos ta hasi orashon, nos no mester dirigié na Hesus ni na ningun otro hende, sino na Dios so. Pues, a base di loke Hesus a siña, no ta lógiko anto pa konkluí ku nos mester hasi orashon na Dios mediante Hesukristu i no na ningun intersesor òf “santu”?

Orashon ta un parti masha importante di nos adorashon na Dios. I segun Beibel, nos no mester adorá ningun otro persona ku no ta Dios. (Huan 4:23, 24; Revelashon 19:9, 10) Ta p’esei nos mester hasi orashon solamente na Dios.

BO MESTER TIN MIEDU DI ASERKÁ DIOS DEN ORASHON?

Den su Sermon Riba Seru, Hesus a duna un ehèmpel di un mucha ku ta pidi su tata algu di kome. Un tata lo duna su yu un piedra si e pidié pan? Òf un kolebra venenoso si e pidié un piská? (Mateo 7:9, 10) Un mayor amoroso nunka lo hasi un kos asina.

Awor, pensa un ratu riba un ehèmpel paresido pero for di e punto di bista di un mayor. Imaginá bo ku bo a perkurá pa bo por tin un bon relashon ku bo yu i semper bo tabata aserkabel. Na dado momento, bo yu ke pidi bo algu ku ta importante. E no ta pidi bo mes pasobra e tin miedu di bo reakshon, p’esei e ta puntra un otro hende pa pidi bo loke e tin mester. Kon abo lo sinti bo? Kiko si el a hasié un kustumber pa komuniká ku bo via di e persona ei i ta parse ku e no tin pensá di kambia? Lo bo keda kontentu? Klaru ku nò! Mayornan amoroso ke pa nan yunan papia direktamente ku nan i pa e yunan sinti nan liber pa pidi nan tur loke nan tin mester.

Biniendo bèk riba e ehèmpel ku Hesus a usa di e yu ku a pidi su tata kuminda, el a rasoná ku su oyentenan: “P’esei, si boso mes ku ta malbado sa di duna boso yunan bon regalo, kuantu mas boso Tata ku ta den shelu! E sigur lo duna kos bon na esnan ku pidié.” (Mateo 7:11) No tin duda ku un mayor ta deseá di duna su yu tur loke ta bon. E deseo di nos Tata na shelu pa skucha i kontestá nos orashonnan ta mas fuerte ainda.

Ora nos ta hasi orashon, Dios ke pa nos papia direktamente kuné asta si nos ta sinti nos malu pa motibu di nos propio fayonan. E no ta duna ningun otro persona e enkargo pa skucha nos orashonnan. Beibel ta animá nos: “Tira bo karga riba SEÑOR, i e lo sostené bo.” (Salmo 55:22) En bes di resa na santu òf kualke otro persona pa nan intersedé pa nos, nos tin ku hasi esfuerso pa nos por tin un bon relashon ku Yehova Dios i sinti nos liber pa papia kuné.

Nos Tata selestial ta interesá den kada un di nos. E kier yuda nos ku nos problemanan i ta animá nos pa hala serka dje. (Santiago 4:8) Esta un privilegio nos tin di por hala serka di nos Dios i Tata, e “Skuchador di orashon”!—Salmo 65:2, BPK.