HISTORIA DI BIDA
Mi Ta Haña Fortalesa, Aunke Mi Ta Débil
Ken ku mira mi lo pensa ku mi no ta masha fuerte ya ku mi ta den un ròlstul, i mi ta pisa solamente 29 kilo. Pero aunke mi kurpa ta bira mas i mas débil, mi ta sigui haña fortalesa. Laga mi konta bo ki efekto esaki tabatin riba mi bida.
Tempu mi tabatin kuater aña
Ora mi pensa riba mi infansia, mi ta kòrda e tempu dushi ku mi a pasa ku mi mayornan. Nos tabata biba na un kas den kunuku den e parti zùit di Fransia. Mi tata a traha un skòmel pa mi, i mi tabata gusta kore rònt den kurá. Na 1966, Testigunan di Yehova a yama na nos kas, i nan tabatin un kòmbersashon basta largu ku mi tata. Despues di shete luna, el a disidí di bira un Testigu. No a dura muchu ku mi mama tambe a bira Testigu, i nan a lanta mi den un ambiente di hopi amor i kariño.
Mi problemanan a kuminsá un poko tempu despues ku nos a bai biba na Spaña, e pais natal di mi mayornan. Mi a kuminsá sinti doló fuerte na mi man i na mi ènkel. Nos a bai hopi dòkter, i despues di dos aña nos a bin haña un spesialista di reumatismo, kende a bisa tur preokupá: “Nos no por hasi muchu kos mas.” Mi mama a kuminsá yora. E dòkter a bisa mi mayornan ku mi tin artrítis króniko i ku mi sistema inmunológiko ta ataká i destruí tehido saludabel di mi kurpa, i komo konsekuensia mi djòintnan ta hincha i mi ta haña hopi doló. Komo un mucha di dies aña mi no a komprondé muchu bon loke el a bisa, pero loke sí mi a komprondé ta ku mi tabatin algu hopi grave.
E dòkter a sugerí pa mi bai un sanatorio di mucha pa haña tratamentu. Ora mi a yega na e edifisio straño ei, mi a sinti hopi miedu. Nan tabatin reglanan hopi estrikto. E sùrnan a kòrta mi kabei i bisti mi un unifòrm masha mahos mes. Ku awa na wowo, mi a pensa: ‘Kon lo mi por sobrebibí den e lugá akí?’
MI A SINTI KON YEHOVA TABATA KUIDA MI
Komo ku mi mayornan a siña mi sirbi Yehova, mi a nenga di partisipá den e ritonan katóliko den e sanatorio. E sùrnan no por a komprondé dikon mi a nenga di partisipá. Mi a roga Yehova pa no bandoná mi, i no a dura hopi ku mi a sinti komo si fuera Yehova su brasa tabata protehá mi meskos ku e brasa di un tata amoroso ta protehá su yu.
Mi mayornan tabatin mag di bishitá mi un ratu so riba djasabra. Pa mi fortalesé mi fe, nan tabata trese publikashonnan basá riba Beibel pa mi lesa. Normalmente, mucha no tabatin mag di tin nan propio bukinan, pero e sùrnan a laga mi keda ku e publikashonnan i ku mi Beibel; mi tabata les’é tur dia. Ademas, mi tabata papia ku e otro mucha muhénan tokante mi speransa di biba pa semper den Paradeis riba tera, kaminda ningun hende lo bira malu. (Revelashon 21:3, 4) Apesar ku tin biaha mi tabata sinti mi tristu i so, mi tabata kontentu ku mi fe i konfiansa den Yehova tabata bira mas i mas fuerte.
Despues di seis luna largu, e dòkternan a laga mi bai kas. Mi salú no a mehorá, pero mi tabata kontentu ku mi tabata serka mi mayornan atrobe. Mi djòintnan tabata sigui deformá, i mi tabata haña mas doló. Ora mi a bira tiner, mi tabata hopi suak. Pero tòg mi a batisá ku 14 aña di edat, i mi tabata determiná pa sirbi mi Tata selestial lo mihó posibel. Sinembargo, tin biaha mi tabata sinti ku Dios a desepshoná mi. Ora mi tabata hasi orashon, mi tabata puntra Dios: “Dikon nèt ami? Por fabor, kura mi. Bo no ta mira kuantu mi ta sufri?”
E temporada di adolesensia tabata hopi difísil pa mi. Mi mester a aseptá ku mi salú lo no mehorá, pero mi tabata kompará mi mes ku mi amiganan ku tabata bon di salú i yen di bida. P’esei mi tabata sinti mi inferior i a kuminsá alehá mi mes for di otro hende. Sinembargo, mi famia i amigunan tabata yuda mi. Mi tin grato rekuerdo di Alicia. El a bira un bon amiga di mi aunke e ta 20 aña mas grandi ku mi. El a yuda mi pa mi no keda enfoká riba mi malesa, sino pa mi mustra interes den otro hende.
LOKE A YUDA MI HAÑA MAS SATISFAKSHON DEN BIDA
Tempu mi tabatin 18 aña, mi a sufri un rekaida severo, i asta ora mi tabata asistí na e reunionnan kristian, mi tabata keda morto kansá. Apesar di esei, mi a hasi bon uso di tur e tempu ku mi tabatin na kas pa studia Beibel mas profundo. E buki di Yòb i e Salmonan a yuda mi komprondé ku no ta tur ora Yehova Dios ta protehá nos di problema físiko, pero den sentido spiritual sí e ta perkurá pa nos haña e animashon i konsuelo ku nos tin mester. Mi tabata hasi hopi orashon, i komo resultado mi a haña “e poder ku ta surpasá esun di hende” i “e pas di Dios ku ta surpasá tur komprondementu.”—2 Korintionan 4:7; Filipensenan 4:6, 7.
Ku 22 aña mi mester a kuminsá usa ròlstul. Esaki no tabata algu fásil pa mi aseptá. Mi tabatin miedu ku hende ta kuminsá wak mi komo e pobersitu muhé malu sintá den un ròlstul en bes di mira ken mi ta realmente. Sinembargo, e ròlstul a yuda mi dependé ménos di otro hende, i loke ami a pensa lo tabata un maldishon a bira un bendishon. Un amiga di mi ku yama Isabel a animá mi pa pone meta pa traha 60 ora den e trabou di prediká huntu kuné pa un luna.
Na promé instante mi a haña e idea ei apsurdo. Pero mi a pidi Yehova pa yuda mi, i ku sosten di mi famia i amigunan, mi a logra. E luna drùk ei a pasa lihé. Mi a logra vense mi miedu, i mi no ta sinti bèrgwensa mas. Mi a disfrutá asina tantu di e trabou di prediká ku na 1996 mi a disidí di bira pionero regular (un Testigu ku tabata dediká 90 ora tur luna den e trabou di prediká). Esei tabata un di e mihó desishonnan ku mi a yega di tuma ya ku mi a hala mas serka Dios, i esaki asta tabatin un bon efekto riba mi salú. E trabou di prediká a yuda mi kompartí mi fe ku hopi hende, i mi a logra yuda algun di nan bira amigu di Dios.
YEHOVA A SIGUI DUNA MI FORTALESA
Den zomer di 2001, mi a haña un aksidente di outo, i mi a kibra tur dos pia. Ora mi tabata den hospital, mi tabatin hopi doló. P’esei mi a pidi Dios den silensio: “Yehova por fabor, no bandoná mi!” Diripiente, un señora ku tabata drumi riba un kama banda di mi a bira puntra mi: “Bo ta un Testigu di Yehova?” Mi no tabatin forsa pa kontest’é, p’esei mi a djis sagudí mi kabes bis’é ku sí. Anto el a bisa mi: “Mi konosé bosnan! Tur ora mi ta lesa boso revistanan.” E palabranan ei tabata un gran animashon pa mi. Asta den e kondishon lamentabel ei, mi ehèmpel a yuda ku otro hende por a haña un bon testimonio tokante Yehova. Esta un onor!
Ora mi salú a kuminsá mehorá, mi a disidí di prediká un poko mas. Ku mi dos pianan den yesu, mi mama tabata hiba mi den mi ròlstul serka e hendenan den hospital. Tur dia, nos tabata bishitá algun pashènt, puntra nan kon ta bai i laga literatura basá riba Beibel ku nan. Ora nos kaba, mi tabata keda morto kansá, pero Yehova a duna mi e forsa nesesario.
Ami ku mi mayornan na 2003
Durante e último añanan, mi dolónan a bira mas fuerte, i loke a hasi e asuntu mas duru ainda ta ku mi tata a fayesé. Apesar di tur kos, mi ta purba keda positivo. Kiko ta yuda mi? Ki ora ku ta posibel, mi ta purba di ta den kompania di famia i amigunan, esei ta yuda mi pa no pensa riba mi problemanan. I ora mi ta mi so, mi ta lesa, studia Beibel òf prediká via telefòn.
Hopi biaha mi ta sera mi wowo pa imaginá kon bida lo ta den e mundu nobo ku Dios a primintí
Ademas, mi ta purba disfrutá di kosnan chikitu, manera entre otro, e brisa suave ku ta karisiá mi kara òf e holó dushi di flor. E kosnan akí ta duna mi motibu pa ta gradisidu na Dios. Un otro kos ku ta yuda mi ta un bon sentido di humor. Por ehèmpel, un dia ora nos tabata prediká, mi amiga, kende tabata pusha mi ròlstul, na dado momento a para un ratu pa skirbi algu. Nos tabata na un bahada i diripiente e ròlstul a kuminsá kore bai abou, i mi a dal den un outo ku tabata stashoná. Na promé instante, nos tur dos a spanta, pero ora nos a mira ku nada malu no a pasa, nos a kuminsá hari sin por stòp.
Tin hopi kos den bida ku mi no por hasi. Pa ami e kosnan akí lo bira realidat den futuro. Hopi biaha mi ta sera mi wowo pa imaginá kon bida lo ta den e mundu nobo ku Dios a primintí. (2 Pedro 3:13) Mi ta imaginá kon mi ta kana rònt bon di salú i ta disfrutá plenamente di bida. I loke a hasi un impakto riba mi ta e palabranan di Rei David: “Spera riba SEÑOR; sea fuerte i e lo fortalesé bo kurason.” (Salmo 27:14) Maske mi kurpa ta birando mas i mas débil, Yehova ta fortalesé mi. Sí, mi ta sigui haña fortalesa aunke mi ta débil.