“Boso Ta Mi Testigunan”

1, 2. (a) Kiko ta un testigu, i kiko e medionan di komunikashon di e mundu akí no ta publiká? (b) Dikon Yehova no ta dependé di e medionan di komunikashon di mundu?

KIKO ta un testigu? Generalmente, hende ta definí e palabra “testigu” komo un hende ku a presensiá algu i ta konta esaki na otro hende. Na Suráfrika, por ehèmpel na e stat Pietermaritzburg, pa mas ku 160 aña kaba, nan ta publiká un korant ku yama E Testigu. E nòmber akí ta apropiá pasobra meta di e korant ta pa na un manera eksakto raportá susesonan ku ta tuma lugá rònt mundu. E editor ku a kuminsá ku e korant a primintí ku nan lo raportá “e bèrdat, e bèrdat kompleto, i nada mas ku e bèrdat.”

² Pero lamentablemente, hopi biaha medionan di komunikashon no ta duna notisia eksakto di susesonan ku ta tuma lugá. I sigur esei ta e kaso enkuanto Dios; nan no ta publiká e bèrdat tokante Dios ni di loke el a hasi. Pero Yehova, e Gobernante Todopoderoso di universo, no ta dependé di e medionan di komunikashon di e mundu akí. El a deklará pa medio di su profeta Ezekiel: “E nashonnan lo sa ku ami ta [Yehova].” (Eze. 39:7) Kon lo e logra esaki? Yehova tin alrededor di ocho mion Testigu, kendenan ta konta hende rònt mundu tokante dje. Ta e ehérsito akí di Testigu ta konta hende loke Dios a hasi i ta hasiendo pa humanidat. Ademas, nan ta proklamá e kosnan maravioso ku Dios a primintí di hasi den futuro pa hende. Na Isaías 43:10 (NW), nos ta lesa: “‘Boso ta mi testigunan,’ ta e ekspreshon di Yehova, ‘sí, mi sirbidó ku mi a skohe.’” Pues, ora nos ta duna prioridat na e trabou di prediká, nos ta demostrá ku realmente nos ta Testigu di Yehova.

3, 4. (a) Na ki tempu e Studiantenan di Beibel a kuminsá usa un nòmber nobo, i kon nan a sinti? (Wak e promé plachi.) (b) Ki preguntanan e artíkulo akí lo kontestá?

³ Ta un onor pa karga e nòmber di Dios, pasobra ta Yehova Dios ta “e Rei di eternidat,” kende a bisa: “Esaki ta mi nòmber pa semper, i esaki ta mi nòmber konmemorativo di generashon pa generashon”! (1 Tim. 1:17; Éks. 3:15; kompará ku Eklesiástes 2:16.) Na 1931, e Studiantenan di Beibel a keda masha kontentu ora ku nan a kuminsá usa e nòmber “Testigunan di Yehova.” Hopi di nan a skirbi karta pa ekspresá nan apresio pa e kambio akí. Un kongregashon na Canada a skirbi ku e nòmber nobo akí a hasi nan mas determiná ainda pa sigui biba na un manera ku ta duna alabansa na Yehova.

⁴ Awor, kon abo por demostrá ku ta un onor pa karga e nòmber di Dios? Bo por splika dikon Yehova ta yama nos su Testigunan manera e buki di Isaías ta bisa?

DIOS SU TESTIGUNAN DEN PASADO

5, 6. (a) Kon mayornan israelita a duna testimonio tokante Yehova? (b) Kiko mas mayornan israelita mester a hasi, i dikon mayornan djawe mester hasi meskos?

⁵ Den tempu di Isaías, Yehova a skohe e nashon di Israel pa ser su ‘testigu.’ Kada israelita tabatin e responsabilidat di duna testimonio tokante Yehova. (Isa. 43:10) Por ehèmpel, mayornan tabata duna testimonio na nan yunan siñando nan tokante e kosnan ku Yehova a hasi den pasado. Yehova a instruí e mayornan pa papia ku nan yunan tokante e Pasku Hudiu. El a bisa nan: “Ora boso yunan bisa boso: ‘Kiko e sirbishi akí ta nifiká pa boso?’ ku boso mester bisa: ‘Ta un sakrifisio di Pasku na SEÑOR, kende a pasa e kasnan di e yunan di Israel na Egipto forbei ora ku el a mata e egipsionan, ma a libra nos kasnan.’” (Éks. 12:26, 27) Sí, probablemente e mayornan a konta nan yunan kon Fárao, e gobernante di Egipto, a nenga di laga e israelitanan bai den desierto pa adorá Yehova ora ku Moises a bai serka dje pa promé biaha. Na e okashon ei, Fárao a bisa: “Ken ta Yehova, pa mi obedesé su bos pa manda Israel bai?” (Éks. 5:2, NW) I sin duda, mayornan lo a konta nan yunan kon Yehova a kontestá Fárao su pregunta i kon Yehova a laga tur hende mira ku E ta e Dios Todopoderoso: Yehova a manda dies plaga riba Egipto i a salba e israelitanan for di e ehérsito egipsio na Laman Kòrá. Asina, e nashon di Israel a mira ku nan propio wowo ku Yehova ta e Dios berdadero i ku semper e ta kumpli ku su promesanan.

⁶ E israelitanan a balorá e privilegio di por a karga e nòmber di Dios, ku ta Yehova. P’esei, siguramente nan lo a konta tantu nan yunan komo e estranheronan ku a sirbi komo esklabo na nan kas tokante e kosnan maravioso ku Yehova a hasi. E israelitanan tabata sa tambe ku nan mester tabata santu i ku nan mester a siña nan yunan pa nan tambe ta santu, pa nan kumpli ku e normanan di Dios. Yehova a bisa nan: “Boso sea santu, pasobra ami SEÑOR boso Dios ta santu.” (Lev. 19:2; Deu. 6:6, 7) Esaki ta un bon ehèmpel pa mayornan kristian djawe. Sí, awe tambe mayornan mester siña nan yunan kon pa biba na un manera ku ta trese onor na e glorioso nòmber di Dios!—Lesa Proverbionan 1:8; Efesionan 6:4.

7. (a) Ora Israel tabata fiel na Yehova, ki efekto esaki tabatin riba e nashonnan bisiña? (b) Ki responsabilidat tur hende ku ta karga e nòmber di Dios tin?

⁷ Tanten ku e israelitanan tabata fiel na Yehova, nan a duna bon testimonio enkuanto e nòmber di Dios. Yehova a laga bisa nan: “Tur e pueblonan di mundu lo mira ku bo ta wòrdu yamá na e nòmber di SEÑOR, i nan lo tin temor pa bo.” (Deu. 28:10) Pero lamentablemente, mayoria di biaha e israelitanan tabata infiel na Yehova. Bes tras bes, nan tabata adorá ídolo. I nan a bira kruel meskos ku e diosnan kananeo ku nan tabata adorá. Kon asina? Wèl, nan tabata sakrifiká nan yunan i oprimí hende pober. Nan mal kondukta ta siña nos un lès importante: Nos mester hasi esfuerso pa imitá Yehova Dios, e Santísimo, i pa nos ta santu den su bista pasobra ta su nòmber nos ta karga.

“MIRA, MI TA BAI HASI ALGU NOBO”

8. Ki asignashon Yehova a duna Isaías, i kon Isaías a reakshoná?

⁸ Pa medio di Isaías, Yehova a spièrta e israelitanan ku lo E bai destruí Herúsalèm, e kapital di Israel, i permití Su pueblo ser hibá den koutiverio. Pero Yehova a profetisá tambe ku lo e “hasi algu nobo” i libra su pueblo na un manera maravioso for di koutiverio. (Isa. 43:19) Yehova, kende por lesa kurason perfektamente, tabata sa ku e israelitanan lo no a arepentí. Tòg el a urgi Isaías pa sigui spièrta nan. P’esei, gran parti di e promé seis kapítulonan di e buki di Isaías ta kontené spièrtamentu tokante e kalamidat ku lo a bini riba Herúsalèm i e siudatnan den serkania. Isaías kier a sa pa kuantu tempu e nashon di Israel lo a sigui desobedesé Yehova. Dios a bis’é: “Te ora statnan keda ruiná i sin habitante, kasnan keda sin hende, i e tera keda kompletamente desolá.”—Lesa Isaías 6:8-11.

9. (a) Na ki tempu e profesia di Isaías tokante Herúsalèm a kumpli? (b) Na ki spièrtamentu nos tin ku presta atenshon awe?

⁹ Pa mas ku 45 aña, Isaías a spièrta e israelitanan tokante e binidero destrukshon di Herúsalèm. El a kuminsá su sirbishi komo profeta den e último aña di e reinado di Rei Uzias, alrededor di aña 778 promé ku Kristu, i a sigui te ku mas o ménos aña 732 promé ku Kristu, durante e reinado di Rei Ezekías. Despues di esei, Yehova a sigui spièrta su pueblo pa 125 aña mas, promé ku e destrukshon di Herúsalèm na aña 607 promé ku Kristu. Pues, hopi aña adelantá e israelitanan a haña spièrtamentu di loke lo a bai pasa den futuro. Awe tambe, Yehova ta usa su pueblo pa spièrta hende adelantá di loke lo bai pasa den futuro. Pa 135 aña kaba, for di su promé edishon, E Toren di Vigilansia ta spièrta hende ku pronto e gobernashon malbado di Satanas lo yega su fin i ku lo e ser remplasá pa Hesukristu su Reinado di Mil Aña.—Rev. 20:1-3, 6.

10, 11. E israelitanan ku tabata na Babilonia tabata testigu di e kumplimentu di kua profesia di Isaías?

¹⁰ Hopi hudiu a sobrebibí e destrukshon di Herúsalèm. Kon bini? Nan a obedesé Yehova i a entregá nan mes na e babilonionan i a ser hibá komo prezu na Babilonia. (Yer. 27:11, 12) Ta einan, 70 aña despues, e pueblo di Dios a mira kumplimentu di un otro maravioso profesia di Isaías ku ta bisa: “Esaki ta loke Yehova a bisa, boso Rekumprador, e Santu di Israel: ‘Pa kousa di boso lo mi manda un hende Babilonia i laga baha e rèndunan dje prizònnan.’”—Isa. 43:14, NW.

¹¹ Yehova a kumpli ku e profesia akí na un manera masha maravioso. Tabata un anochi den òktober di aña 539 promé ku Kristu, i e rei di Babilonia i su noblenan tabatin un fiesta na onor di nan diosnan. Durante e selebrashon ei, nan tabata bebe for di e kopanan ku nan a hòrta for di e tèmpel di Yehova. Pero e mesun anochi ei, Rei Siro i su ehérsito a invadí Babilonia i a kapturá e stat. Na aña 538 òf 537 promé ku Kristu, Siro a ordená e hudiunan pa bai Herúsalèm bèk pa rekonstruí e tèmpel di Dios. I Yehova a hasi sigur ku nada no a sosodé ku nan durante nan biahe. Tur esaki a sosodé presis manera Isaías a profetisá. Ora e rekonstrukshon di e tèmpel na Herúsalèm a terminá, Dios su pueblo ku a presensiá tur e kosnan akí a bira testigu di e echo ku Yehova ta e Dios berdadero i ku semper e ta hasi loke e primintí. I Dios a referí na e hudiunan akí ku a regresá Herúsalèm komo ‘e pueblo ku mi a forma pa mi mes pa deklará mi alabansa.’—Isa. 43:21; 44:26-28.

12, 13. (a) Ken a uni ku e israelitanan ku a regresá Herúsalèm pa rekonstruí e tèmpel? (b) Kiko e ‘otro karnénan’ tin ku hasi awor, i ki oportunidat nan lo tin den futuro?

¹² Míles di persona ku no tabata hudiu a uni ku e israelitanan pa adorá Yehova i a bai Herúsalèm huntu ku nan ora nan a regresá pa rekonstruí e tèmpel. I mas despues, asta mas estranhero a uni ku nan. (Èsd. 2:58, 64, 65; Èst. 8:17) Awe, ta e kristiannan ungí ta e nashon di Dios, esta, “e Israel di Dios.” I e “multitut grandi” di Hesus su ‘otro karnénan’ ta uni ku nan pa adorá Yehova. (Gal. 6:16; Rev. 7:9, 10; Huan 10:16) Tantu e ungínan komo e otro karnénan tin e onor di karga e nòmber “Testigunan di Yehova.”

¹³ Durante Kristu su Reinado di Mil Aña, e multitut grandi lo tin e maravioso oportunidat di splika e hendenan ku resusitá kiko ser un Testigu di Yehova a nifiká pa nan durante e último dianan den e mundu di Satanas. Pero pa nos por tin e privilegio ei den futuro, nos mester keda santu. P’esei, diariamente nos mester pidi Yehova pordoná nos pasobra, maske nos ta hasi nos bèst pa biba na armonia ku Yehova su normanan, nos ta kometé eror tur dia. Sí, si nos keda santu, nos ta demostrá ku nos ta masha kontentu ku Yehova a permití nos represent’é, òf karga su nòmber.—Lesa 1 Huan 1:8, 9.

LOKE E NÒMBER DI DIOS TA NIFIKÁ

14. Kiko e nòmber “Yehova” ta nifiká?

¹⁴ Pa nos por tin un mihó idea ki un gran onor ta pa karga e nòmber di Dios, nos mester meditá riba e nifikashon di Dios su nòmber. E nòmber “Yehova” ta bini di un palabra hebreo ku por ser tradusí komo “bira” i ta duna e idea di tuma akshon. Por lo general, hende ta komprondé ku e nòmber “Yehova” ta nifiká “E Ta Kousa pa Bira.” E nòmber akí ta yuda nos komprondé ken Yehova ta. Yehova ta Esun ku a krea tur kos. I ora Yehova bisa ku e ta bai hasi algu, no tin ningun persona ku por strob’é, ni Satanas.

15. Kiko nos por siña tokante Dios su nòmber for di loke el a bisa Moises? (Wak e kuadro “Un Nòmber Yen di Nifikashon.”)

¹⁵ Ora Yehova a manda Moises pa libra Su pueblo for di Egipto, Yehova a duna Moises mas detaye enkuanto nifikashon di Su nòmber. El a bisa Moises: “Lo Mi Bira Loke Lo Mi Ke Bira.” I Yehova a agregá: “Esaki ta loke bo tin ku bisa e yunan di Israel: ‘Lo Mi Bira a manda mi serka boso.’” (Éks. 3:14, NW; nota.) Pues, Yehova por bira loke ta nesesario pa e kumpli ku su propósito. Den tempu di e israelitanan, Yehova a bira nan Libertador, Protektor, Guia i Perkurador, loke tabata nesesario pa yuda nan den sentido spiritual i material.

KON NOS POR MUSTRA NOS APRESIO?

16, 17. (a) Kon nos por mustra apresio pa e privilegio di por karga e nòmber di Dios? (b) Ki pregunta e siguiente artíkulo lo kontestá?

¹⁶ Yehova no a kambia. Su nòmber ta rekordá nos ku e por i ta bira loke ta nesesario pa perkurá pa su pueblo, tantu spiritualmente komo materialmente. No opstante, Yehova su nòmber ta siña nos algu mas. Kiko asina? Wèl, ku Yehova por pone su kreashon hasi loke sea ta nesesario pa kumpli ku Su propósito. Por ehèmpel, Yehova ta usa su Testigunan pa hasi e trabou di prediká. E echo ku nos sa esei mester motivá nos pa represent’é bon. Kåre di Noruega, un ruman hòmber di 84 aña di edat, kende pa 70 aña kaba ta un Testigu di Yehova zeloso, a bisa: “Ta un gran onor pa sirbi Yehova, e Rei di eternidat, i pa forma parti di e pueblo ku ta karga su nòmber. Semper ta un gran privilegio pa splika bèrdatnan bíbliko na hende i pa mira kon nan wowo ta bria di alegria ora nan komprondé loke Beibel ta siña. Por ehèmpel, mi ta sinti un gran satisfakshon ora mi ta splika hende kon e sakrifisio di reskate di Kristu ta funshoná i kon, pa medio di esaki, nan por haña bida eterno den un mundu pasífiko i hustu.”

¹⁷ Nos tin ku atmití sí ku, na algun pais, ta birando mas i mas difísil pa haña hende ku ke siña tokante Dios. No opstante, meskos ku Kåre, nos ta keda masha kontentu ora nos haña sikiera ún hende ku ke skucha i siña tokante Dios su nòmber. Pero awor, kon nos por ta un Testigu di Yehova i na mes momento testigu di Hesus? E siguiente artíkulo lo kontestá e pregunta akí.