TÓPIKO PRINSIPAL | DI BÈRDAT DIABEL TA EKSISTÍ?

Nos Mester Tin Miedu di Diabel?

Un pareha kasá ta kore sali for di nan kas kontaminá pa haña airu fresku pafó — Diabel ta meskos ku monóksido di karbon: invisibel i masha peligroso

Tin un gas ku no ta fásil pa detektá. E no tin holó ni koló. E ta mata su víktimanan sin ku nan sa mes. E gas akí yama monóksido di karbon. Segun kálkulo, mas ku mitar di e kantidat di hende ku muri venená, a muri debí na e gas akí. Ma bo no tin nodi di drenta den pániko. Tin maneranan pa bo detektá e gas akí i protehá bo mes. Hopi hende ta instalá alarma ku ta detekt’é i nan ta aktua asina ku e alarma zona.

Diabel ta meskos ku monóksido di karbon; e tambe ta invisibel, su influensia ta difísil pa detektá i e ta masha peligroso. Pero bo no tin nodi di tene miedu di Diabel, ya ku Dios ta ofresé nos vários yudansa. Laga nos konsiderá algun di nan.

E kapasidat di skohe. Santiago 4:7 ta bisa nos: “Oponé Diabel, i lo e hui for di boso.” Maske Satanas ta poderoso, e no por obligá bo di hasi algu ku bo no ke hasi. Ta abo tin ku skohe. Na 1 Pedro 5:9 nos ta lesa: “Tuma boso posishon kontra dje [Diabel], firme den fe.” Kòrda ku Diabel a bai laga Hesus despues ku el a rechasá e tres tentashonnan redondamente. (Mateo 4:11) Bo tambe por skohe pa rechasá e intentonan di Satanas.

Amistat ku Dios. Santiago 4:8 ta animá nos pa “hala serka Dios.” Yehova ta invitá bo personalmente pa bo sera un amistat kuné. Kon bo por hasi esei? E mihó manera pa kuminsá ta di siña kiko Beibel ta bisa tokante Yehova. (Huan 17:3) Mas bo siña di Yehova, mas lo bo stim’é, i e amor ei lo motivá bo pa hasi su boluntat. (1 Huan 5:3) Kon bo Tata selestial lo reakshoná riba bo esfuerso pa hala mas serka di dje? Santiago ta bisa ku ‘lo e hala serka bo.’

Un hòmber ta studia Beibel, despues e ta hasi orashon na Dios i despues ta destruí ophetonan di spiritismo — Yehova ta ofresé yudansa spiritual pa protehá bo

Dios su protekshon. Proverbionan 18:10 (NW) ta bisa: “E nòmber di Yehova ta un toren fuerte. E hustu ta kore drenta den dje i ta haña protekshon.” Ta klaru ku esaki no ta nifiká ku e nòmber personal di Dios riba su mes ta un tipo di amuleto. Mas bien, esaki ta nifiká ku hende ku tin un rèspèt profundo pa e nòmber ei por pidi Dios protehá nan ki ora ku nan mester.

Un ehèmpel di Beibel. Echonan 19:19 ta konta nos algu interesante ku algun habitante di Efeso ku a kaba di bira kristian a hasi. E versíkulo ta bisa ku “un kantidat grandi di esnan ku tabata praktiká magia a trese nan bukinan huntu i a kima nan dilanti di tur hende. I nan a kalkulá e balor di tur e bukinan i a yega na un total di 50.000 moneda di plata.”a E kristiannan ei a destruí tur opheto ku tabatin di haber ku spiritismo, sin importá kuantu sèn nan tabata kosta. Awe nos por siña hopi for di nan ehèmpel. E mundu akí ta hopi enbolbí ku spiritismo i kosnan okulto. Asta ophetonan i práktikanan spiritista ku por parse inosente por trese nos bou di influensia di demoño. Ta masha importante pa tene e tipo di kosnan ei leu for di bo, kueste loke kueste.—Deuteronomio 18:10-12.

Pa 50 aña largu, Rogelio, menshoná den e promé artíkulo di e seri akí, no tabata kere ku Diabel ta eksistí. Pero na dado momento su punto di bista a kambia. Dikon? Rogelio ta bisa: “Pa promé biaha den mi bida mi a haña un Beibel den mi man. Loke m’a lesa den Beibel a konvensé mi ku Diabel ta eksistí. E konosementu ei a yuda mi protehá mi mes kontra di su influensia.”

“Loke m’a lesa den Beibel a konvensé mi ku Diabel ta eksistí. E konosementu ei a yuda mi protehá mi mes kontra di su influensia”

Abo lo ke mira e dia ku Satanas di bèrdat lo no eksistí mas? Bo por. Beibel ta profetisá ku djis akí Diabel, kende ta gaña asina tantu hende, lo ser “bentá den e lago di kandela i suafel.” (Revelashon 20:10) Ta klaru ku kandela i suafel literal no por hasi daño na un ser spiritual invisibel. Pues, e lago di kandela mester ta simbóliko: e ta representá destrukshon eterno. Satanas lo disparsé pa semper. Esaki lo ta un tempu di alegria pa tur hende ku ta stima Dios!

Mientrastantu, sigui siña tur loke bo por tokante Yehova i su manera di pensa.b Si bo hasié, lo bo mira e dia ku por fin nos por bisa di bèrdat ku “Satanas no ta eksistí!”

a Si e moneda di plata en kuestion tabata un denario romano, esaki lo tabata un suma basta grandi! Un trahadó lo tabatin ku traha 50.000 dia pa gana e suma ei.

b Pa mas informashon tokante Satanas i Dios su punto di bista di spiritismo, wak kapítulo 10 di e buki Kiko Beibel Ta Siña Realmente? Bo por pidi un Testigu di Yehova un ehemplar di e buki òf les’é online na www.jw.org/pap.