PREGUNTA KU BEIBEL TA KONTESTÁ

Dikon nos mester rekordá e morto di Hesus?

E morto di Hesus ta e suseso di mas importante di historia. El a muri pa hende por biba manera tabata e propósito di Dios for di prinsipio. Dios no a krea hende ku e tendensia di hasi malu, tampoko pa bira malu i muri. (Génesis 1:31) Pero ta pa motibu di e promé hòmber, Adam, piká a drenta mundu. Hesus a duna su bida pa salba nos di piká i morto.—Lesa Mateo 20:28; Romanonan 6:23.

Dios a mustra un amor sobresaliente ora el a manda su Yu na tera pa bin muri pa nos. (1 Huan 4:9, 10) Hesus a instruí su siguidónan pa rekordá su morto mediante un seremonia simpel, usando pan i biña. Ora nos ta rekordá e morto di Hesus tur aña di e manera ei, nos ta demostrá ku nos ta apresiá e amor ku Dios i Hesus a mustra na nos.—Lesa Lukas 22:19, 20.

Ken mester kome di e pan i bebe di e biña?

Ora Hesus a bisa su disipelnan pa rekordá su morto, el a papia ku nan tokante un pakto, òf un aliansa. (Mateo 26:26-28) Esaki a duna tantu su disipelnan komo un grupo limitá di otro hende e speransa pa bira rei i saserdote kuné den shelu. Aunke miónes di hende ta rekordá e morto di Hesus, ta solamente esnan ku ta den e pakto ei por kome di e pan i bebe di e biña.—Lesa Revelashon 5:10.

Pa kasi 2.000 aña kaba, Yehova ta skohiendo e hendenan ku lo bira rei. (Lukas 12:32) Nan ta un kantidat chikitu kompará ku e hendenan ku lo biba pa semper riba tera.—Lesa Revelashon 7:4, 9, 17.