PREGUNTA KU BEIBEL TA KONTESTÁ
Bida tin un propósito?
Bo sa sinti ku bida ta muchu kòrtiku?
Bo a yega di puntra bo mes si e propósito di bida ta simplemente pa pasa dushi, kasa, traha, kria famia i bira bieu? (Yòb 14:1, 2) Beibel ta mustra ku tin hende masha inteligente ku tambe a yega di hasi nan mes e pregunta ei.—Lesa Eklesiástes 2:11.
Kiko ta e propósito di bida? Na promé lugá, nos mester haña sa kon bida a kuminsá. Despues ku sientífikonan a deskubrí kon maravioso nos kurpa i selebro ta, hopi hende a yega na e konklushon ku mester tin un ser sabí ku a krea nos. (Lesa Salmo 139:14.) Si ta asina, e mester tin un bon motibu pakiko el a krea nos. Nos lo haña berdadero propósito den bida si nos hasi esfuerso pa haña sa kiko e motibu ei ta.
Pakiko Dios a krea hende?
Dios a bendishoná e promé pareha i a duna nan un trabou interesante. Su propósito tabata pa nan yena tera ku nan desendientenan, hasi tera un paradeis i biba pa semper.—Lesa Génesis 1:28, 31.
Dikon Dios su propósito no a kumpli ainda? Pasobra hende a desobedes’é. Akaso Dios su propósito a kambia? Nò. Beibel ta sigurá nos ku Dios a tuma medida pa hende fiel por haña salbashon i pa e propósito ku e tin pa tera kumpli. Dios ke pa bo biba pa semper den Paradeis riba tera. (Lesa Salmo 37:29.) Beibel ta bisa nos kiko nos tin ku hasi pa nos por benefisiá di esei.