Bo Ta Sinti Ku Dios A Desepshoná Bo?

“DIKON nèt ami? Dikon Dios a laga e kos akí pasa ku mi?” E preguntanan ei tabata molestiá Sidnei, un mucha hòmber di 24 aña di Brazil. Despues ku el a haña un aksidente riba un glèiban di awa, e no por a kana mas i mester a usa un ròlstul.

Ora hende ta sufri pa motibu di un aksidente, malesa, morto di un ser kerí, desaster natural òf guera, fásilmente nan por sinti ku Dios a desepshoná nan. Esaki no ta nada nobo, ya ku e patriarka Yòb di tempu bíbliko tambe a sinti esei ora el a haña un gòlpi tras di otro den bida. Komo ku el a kere ku ta Dios a kousa su sufrimentu, el a kulpa Dios inhustamente i a bisa: “Mi ta sklama na bo pa yudansa, ma bo no ta kontestá mi; mi ta lanta para i bo no ta paga atenshon na mi. Bo a bira kruel pa mi; ku e poder di bo man bo ta persiguí mi.”—Yòb 30:20, 21.

Yòb no tabata sa ta ken a kousa e difikultatnan ei. E no tabata sa dikon e kosnan ei a pasa kuné ni dikon Dios a permití nan sosodé. Afortunadamente, Beibel ta splika nos dikon e tipo di kosnan ei ta pasa i kon nos mester reakshoná ora nan pasa.

DIOS KE PA HENDE SUFRI?

Beibel ta bisa ku Dios “su obra ta perfekto, pasobra tur su kamindanan ta hustu; un Dios di fieldat i sin inhustisia, hustu i rekto e ta.” (Deuteronomio 32:4) Siendo ku esei ta e kaso, bo ta kere ta lógiko ku un Dios “hustu i rekto” lo ke pa hende sufri òf pone nan pasa den difikultat djis pa e kastigá òf refiná nan?

Al kontrario, Beibel ta bisa nos: “Ora un hende ta pasa den prueba, e no mester bisa: ‘Dios ta pone mi na prueba.’ Pasobra ningun hende no por pone Dios na prueba ku kos malu, i e mes tampoko no ta pone ningun hende na prueba ku kos malu.” (Santiago 1:13) De echo, Beibel ta siña nos ku na komienso tur kos tabata perfekto. Dios a duna e promé hendenan, Adam ku Eva, un lugá masha bunita pa biba aden, tur loke nan tabatin mester i un trabou ku ta duna satisfakshon. Dios a bisa nan: “Sea fruktífero i multipliká, i yena e tera i hasi esaki someté na bo.” Pues, Adam ku Eva no tabatin niun motibu pa sinti ku Dios a desepshoná nan.—Génesis 1:28.

Pero, awe e situashon ku nos ta biba aden ta leu di ta perfekto. Atraves di historia, hende a pasa den situashonnan masha difísil. Pues Beibel tin rason di bisa: “Henter kreashon huntu ta sigui keha i ta keda den doló.” (Romanonan 8:22) Ta kiko a pasa anto?

DIKON NOS TA SUFRI?

Pa nos sa dikon nos ta sufri, nos mester bai bèk na e tempu ku sufrimentu a kuminsá. Bou di instigashon di e angel rebelde Satanas e Diabel, Adam ku Eva a rechasá Dios su normanan di loke ta bon i malu ora nan a desobedesé su mandamentu pa no kome di “e palu di konosementu di bon i malu.” Diabel a bisa Eva ku nan lo no muri si nan desobedesé Dios. Di e manera ei, el a yama Dios un gañadó. Ademas, Satanas a insinuá ku Dios no ta laga su sirbidónan disidí pa nan mes loke ta bon i loke ta malu. (Génesis 2:17; 3:1-6) Ku otro palabra, Satanas a insinuá ku sin e guia di Dios kos lo bai hopi mas mihó pa hende. Pues, ku esei el a lansa un akusashon hopi serio: Dios no sa kon goberná.

Un otro akusashon ku Satanas a lansa ta ku hende ta sirbi Dios pa motibunan egoista. Tokante Yòb el a bisa Dios: “Bo no a traha un tranké rònt di dje, rònt di su kas, i rònt di tur loke e tin na tur banda? . . . Ma saka bo man awor i mishi ku tur loke e tin; siguramente e lo maldishoná bo den bo kara.” (Yòb 1:10, 11) Maske Satanas tabata papia tokante Yòb, el a duna di komprondé ku ta tur hende ta sirbi Dios pa motibunan egoista.

KON DIOS A RESOLVÉ E ASUNTU?

Kon lo ta e mihó manera pa mustra unabes i pa semper ku e akusashonnan ei ta falsu? Wèl, Dios, e ser mas sabí den henter universo, tin e mihó solushon; unu ku lo no laga nos keda desepshoná. (Romanonan 11:33) El a disidí di laga hende goberná nan mes pa un tempu i laga e resultado mustra ken su gobernashon ta mihó.

E situashon teribel ku tin rònt mundu ta mustra klaramente ku gobièrnunan humano a frakasá. Nan no a trese pas, siguridat ni felisidat, i nan ta a punto di ruiná e tera. Esaki ta mustra ku loke Beibel ta bisa ta bèrdat: “No ta keda na hende pa dirigí su pasonan.” (Yeremías 10:23) Dios su propósito ta pa hende ta na pas, felis i disfrutá di bida pa semper. I ta su manera di goberná so por logra esei.—Isaías 45:18.

Kon Dios lo kumpli ku su propósito? Kòrda ku Hesus a bisa su siguidónan pa pidi lo siguiente den orashon: “Laga bo Reino bini. Laga bo boluntat sosodé, meskos ku den shelu, tambe riba tera.” (Mateo 6:10) Sí, na su debido tempu, Dios, pa medio di su Reino, lo eliminá tur loke ta kousa sufrimentu. (Daniel 2:44) Lo no tin pobresa ni malesa ni morto mas. Tokante e pobernan, Beibel ta bisa ku Dios “lo libra esun den nesesidat ora ku e sklama pa yudansa.” (Salmo 72:12-14) Ademas, Beibel ta bisa ku “ningun habitante lo no bisa: ‘Mi ta malu.’” (Isaías 33:24) I kiko di esnan ku a muri kaba i ku ta den Dios su memoria? Hesus a bisa: “Lo yega e ora ku tur esnan ku ta den graf lo tende su stèm i lo sali afó.” (Huan 5:28, 29) E promesanan akí ta masha konmovedor, no ta bèrdat?

KON PA TRATA KU DESEPSHON

Mas o ménos 17 aña despues di e aksidente, Sidnei, menshoná na prinsipio di e artíkulo akí, a bisa: “Nunka mi a kulpa Dios pa e aksidente, pero mi tin ku atmití sí ku na prinsipio mi a sinti ku Dios a laga mi na kaya. Tin biaha mi ta sinti mi hopi tristu, i mi ta yora ora mi pensa riba mi desabilidat físiko. Ma mi a siña for di Beibel ku e aksidente no tabata un kastigu di Dios i ku kosnan inesperá por sosodé ku nos tur. Ademas, orashon na Yehova i sierto tekstonan ku mi a lesa den Beibel a fortalesé mi spiritualmente i a yuda mi keda positivo.”—Eklesiástes 9:11; Salmo 145:18; 2 Korintionan 4:8, 9, 16.

Kiko por yuda nos si nos ta sinti ku Dios a desepshoná nos? Wèl, tene na mente e motibunan pakiko Dios ta permití sufrimentu i ku pronto Dios lo kaba kuné. Nos tin sigur ku Dios ta “esun ku ta rekompensá esnan ku ta hasi esfuerso pa busk’é.” Pues, hende ku pone konfiansa den Dios i su Yu lo no keda desepshoná.—Hebreonan 11:6; Romanonan 10:11.