E Mihó Komparashon Ku Bo Por Hasi Den Bo Bida

BO TA konsiderá bo mes un kristian? Si ta asina, bo ta un di e mas ku dos mil mion hendenan ku ta bisa ku nan ta siguidó di Kristu. Awe tin míles di religion ku ta yama nan mes kristian, ma nan no tin e mesun punto di bista i ta siña doktrinanan ku ta kontradisí otro. Pues, bo kreensianan kisas ta masha diferente for di otro hende ku ta yama nan mes kristian. Ta importá realmente kiko bo ta kere aden? Sí! Sigur si bo ke praktiká e kristianismo ku Beibel ta papia di dje.

E promé siguidónan di Hesukristu a bira konosí komo “kristian.” (Echonan 11:26) No tabatin mester di otro nòmber pa identifiká nan, ya ku ta ún fe kristian so tabatin. E kristiannan tabata uní i a sigui e siñansa- i instrukshonnan di e Fundadó di kristianismo, esta, Hesukristu. Kiko di bo iglesia? Bo ta kere ku e ta siña loke Kristu a siña i loke e promé siguidónan di Kristu tabata kere aden? Kon bo por sa sigur? Ta ún manera so tin: usa Beibel pa hasi un komparashon.

Pensa riba esaki: Hesukristu tabatin masha rèspèt pa e Skritura pasobra el a mir’é komo e Palabra di Dios. El a kondená hende ku a desviá for di siñansa di Beibel djis pa sigui tras di tradishon di hende. (Marko 7:9-13) Ku tur siguransa nos por bisa ku e berdadero siguidónan di Kristu lo basa nan kreensianan riba Beibel. Pues ta bon pa kada kristian puntra su mes: ‘E siñansanan di mi iglesia ta di akuerdo ku Beibel?’ Pa kontestá e pregunta ei, kompará loke bo iglesia ta siña ku loke Beibel realmente ta bisa.

Hesus a bisa ku nos adorashon na Dios mester ta basá riba bèrdat, i e bèrdat ei ta den Beibel. (Huan 4:24; 17:17) I apòstel Pablo a bisa ku pa nos haña salbashon, nos mester haña “konosementu eksakto di e bèrdat.” (1 Timoteo 2:4) Pues ta importante pa nos basa nos kreensia riba un konosementu eksakto di e bèrdatnan ku tin den Beibel, ya ku ta nos salbashon ta den wega!

KON NOS POR KOMPARÁ NOS KREENSIANAN KU BEIBEL?

Nos ta invitá bo pa lesa e seis preguntanan ku tin den e artíkulo akí i wak ki kontesta Beibel ta duna pa nan. Buska e tekstonan ku ta sitá den bo mes Beibel, lesa nan i pensa riba e kontestanan. Despues, puntra bo mes: ‘E siñansanan di mi iglesia ta di akuerdo ku loke Beibel ta bisa?’

E análisis breve akí por yuda bo hasi e mihó komparashon ku bo por hasi den bo bida. Bo ta dispuesto pa kompará otro siñansanan di bo iglesia ku loke Beibel ta bisa? Gustosamente Testigunan di Yehova lo ke yuda bo analisá e bèrdatnan di Beibel. Bo por pidi un Testigu un kurso di Beibel grátis, òf bo por bishitá nos website, jw.org.

1 PREGUNTA: Ken Dios ta?

KONTESTA: Yehova, Tata di Hesus, ta e Dios eterno, e Todopoderoso i Kreador di tur kos.

LOKE BEIBEL TA BISA:

“Semper nos ta gradisí Dios, Tata di nos Señor Hesukristu, ora nos ta hasi orashon pa boso.”—Kolosensenan 1:3.

“Bo ta digno, Yehova, nos Dios, di risibí alabansa pa bo gloria, onor i poder, pasobra ta abo a krea tur kos.”—Revelashon 4:11.

Wak tambe Romanonan 10:13; 1 Timoteo 1:17.

2 PREGUNTA: Ken Hesukristu ta?

KONTESTA: Hesus ta e promé Yu di Dios. Dios a krea Hesus, pues Hesus tabatin un prinsipio. Hesus ta someté su mes na e outoridat di Dios i ta obedes’é.

LOKE BEIBEL TA BISA:

“E Tata ta mas ku mi.”—Huan 14:28.

“[Hesus] ta e imágen di e Dios invisibel, e promé di tur kreashon.”—Kolosensenan 1:15.

Wak tambe Mateo 26:39; 1 Korintionan 15:28.

3 PREGUNTA: Kiko spiritu santu ta?

KONTESTA: Spiritu santu no ta un persona, sino e forsa ku Dios ta usa pa kumpli ku su boluntat. Hende por yena ku spiritu santu i haña forsa pa medio di dje.

LOKE BEIBEL TA BISA:

“Ora Elisabèt a tende e kumindamentu di Maria, e yu den su barika a bula, i Elisabèt a yena ku spiritu santu.”—Lukas 1:41.

“Boso lo risibí poder ora spiritu santu baha riba boso.”—Echonan 1:8.

Wak tambe Génesis 1:2; Echonan 2:1-4; 10:38.

4 PREGUNTA: Kiko e Reino di Dios ta?

KONTESTA: E Reino di Dios ta un gobièrnu selestial. Hesus ta Rei di e Reino di Dios. Pronto e Reino akí lo perkurá pa e boluntat di Dios sosodé riba henter tera.

LOKE BEIBEL TA BISA:

“E di shete angel a supla su tròmpèt. I tabatin stèmnan duru den shelu ku a bisa: ‘E reino di mundu awor ta pertenesé na nos Señor i na su Kristu, i lo E reina komo rei pa tur eternidat.’”—Revelashon 11:15.

Wak tambe Daniel 2:44; Mateo 6:9, 10.

5 PREGUNTA: Tur bon hende ta bai shelu?

KONTESTA: Nò. Dios a skohe un “tou chikitu,” esta, un grupito di hende fiel, pa bai shelu. Nan lo goberná komo rei huntu ku Hesus riba humanidat.

LOKE BEIBEL TA BISA:

“No tene miedu, tou chikitu, pasobra boso Tata a haña ta bon pa duna boso e Reino.”—Lukas 12:32.

“Nan lo ta saserdote di Dios i di Kristu, i nan lo reina komo rei huntu kuné.”—Revelashon 20:6.

Wak tambe Revelashon 14:1, 3.

6 PREGUNTA: Kiko ta Dios su propósito pa tera i pa humanidat?

KONTESTA: Bou di e Reino di Dios, tera lo bira un paradeis, i hende fiel lo tin salú perfekto, pas pa semper i bida eterno.

LOKE BEIBEL TA BISA:

“E humildenan lo heredá e tera, i lo deleitá nan mes den pas abundante.”—Salmo 37:10, 11.

“Lo e seka tur lágrima for di nan wowo, i lo no tin morto mas; ni tristesa ni sklamashon ni doló lo no tin mas. E kosnan ku tabata pasa ántes no t’ei mas.”—Revelashon 21:3, 4.

Wak tambe Salmo 37:29; 2 Pedro 3:13.