Pregunta di Lektor

Kiko ta “e palabra di Dios” na Hebreonan 4:12 ku “ta bibu i poderoso”?

E konteksto ta mustra ku apòstel Pablo tabata referí na e mensahe di Dios relashoná ku su propósito ku tin den Beibel.

Hopi biaha nos ta sita Hebreonan 4:12 den nos publikashonnan pa mustra ku Beibel tin poder pa kambia bida di hende, i e aplikashon ei ta na su lugá. Pero ta bon pa wak kiko Pablo tabata papia di dje ora el a skirbi e palabranan na Hebreonan 4:12. Pablo tabata urgi e kristiannan hebreo pa kooperá ku e aspektonan di Dios su propósito. Hopi di e aspektonan ei ta skirbí den e skrituranan santu. Komo ehèmpel di un di e aspektonan ei, Pablo a referí na e israelitanan ku Dios a libra for di Egipto. Nan tabatin e speransa di drenta e Tera Primintí ku tabatin “lechi i miel na abundansia,” kaminda nan por tabatin berdadero pas.—Éks. 3:8; Deu. 12:9, 10.

Esei tabata e propósito di Dios manera el a revelá na e israelitanan. Sinembargo, despues nan a hasi nan kurason duru i no a ehersé fe, pues mayoria di nan no a logra drenta den e sosiegu ei. (Num. 14:30; Hos. 14:6-10) Pero Pablo a bisa ku ainda tabatin “un promesa pa drenta den [Dios] su sosiegu.” (Heb. 3:16-19; 4:1) E “promesa” ei klaramente ta parti di loke Dios a revelá tokante su propósito. Meskos ku e kristiannan hebreo, nos tambe por lesa di e propósito ei i kooperá kuné. Pa enfatisá ku e promesa ei ta basá riba e Skritura, Pablo a sita parti di Génesis 2:2 i Salmo 95:11.

Klaru ku e echo ku “te ainda tin un promesa pa drenta den [Dios] su sosiegu” mester motivá nos. Nos tin sigur ku e speransa bíbliko di drenta den e sosiegu ei ta realmente posibel, i nos a dal paso pa drent’é. Pa nos drenta, no ta e Lei di Moises nos ta sigui ni nos no ta hasi bon obra djis pa purba di haña aprobashon di Yehova. Mas bien, fe ta pone ku gustosamente nos ta kooperá i ta sigui kooperá ku e propósito di Dios. Ademas, manera nos a menshoná na komienso, míles di hende rònt mundu a kuminsá studia Beibel i siña tokante loke Dios a revelá tokante su propósito. Hopi di nan a sinti nan motivá pa kambia nan estilo di bida pa nan por ehersé fe i bira kristian batisá. Esaki klaramente ta duna prueba ku “e palabra di Dios ta bibu i poderoso.” Loke Dios a revelá den Beibel tokante su propósito ya a ehersé poder den nos bida, i lo sigui hasi esei.