Bo Ta Kòrda?

Bo a tuma tempu pa lesa e último edishonnan di E Toren di Vigilansia? Wèl, wak si bo por kontestá e siguiente preguntanan:

Di ki tipo di piká Hesus tabata papia den e konseho ku el a duna na Mateo 18:15-17?

E tabata papia di problema ku e kristiannan enbolbí por resolvé entre nan ku nan. Pero, e piká ta asina serio ku un persona por ser ekspulsá si e asuntu no keda resolvé. Por ehèmpel, e piká por enserá kalumnia ku ta daña reputashon di un hende òf froude.—w16.05, pág. 7.

Kiko bo por hasi pa bo por benefisiá mas di bo lesamentu di Beibel?

Bo por hasi lo siguiente: Lesa ku un mente habrí i buska lèsnan ku bo por apliká. Hasi bo mes pregunta manera: ‘Kon mi por usa e informashon akí pa yuda otro hende?’ Ademas, usa e hèrmèntnan ku nos tin disponibel pa hasi investigashon tokante e informashon ku bo a kaba di lesa.—w16.05, pág. 24-26.

Ta malu pa un kristian ta tristu ora un ser kerí muri maske e ta kere den e resurekshon?

Fe den e resurekshon no ta kita e doló fuerte ku un kristian por sinti. Abraham a tene rou pa e morto di Sara. (Gén. 23:2) Ku tempu, e doló lo fria.—wp16.3, pág. 4.

Den e vishon di Ezekiel kapítulo 9, ken e hòmber ku e estuche ku kos di skirbi aden i e seis hòmbernan ku arma di destrukshon ta simbolisá?

Nos ta komprondé ku nan ta representá e ehérsito selestial ku tabata enbolbí den e destrukshon di Herúsalèm i ku lo ta enbolbí tambe den e destrukshon na Armagedon. Den e kumplimentu moderno di e profesia, e hòmber ku e estuche ta representá Hesukristu, esun ku ta marka hende ku lo sobrebibí.—w16.06, pág. 16-17.

Beibel a sobrebibí ki tipo di peliger?

Beibel a sobrebibí (1) e peliger di disparsé pasobra el a ser skirbí riba material ku ta kaba na nada, manera papiro i pèrkamènt, (2) oposishon di lidernan polítiko i religioso, kendenan a purba di kaba kuné i (3) intentonan pa kambia su mensahe.—wp16.4, pág. 4-7.

Kon un kristian por simplifiká su bida?

Pensa riba kiko ta bo berdadero nesesidatnan i eliminá gastunan innesesario. Traha un budget realístiko. Deshasí di loke bo no ta usa mas i paga kualke debe ku bo tin. Traha ménos ora na trabou i pensa kiko mas bo por hasi den sirbishi.—w16.07, pág. 10.

Segun Beibel, kiko ta bal mas ku oro òf plata?

Yòb 28:12 i 15 ta mustra nos ku sabiduria di Dios ta mihó ku oro òf plata. Segun ku bo ta busk’é, hasi esfuerso pa keda humilde i fuerte den fe.—w16.08, pág. 18-19.

Un ruman hòmber por tin barba awe?

Den algun kultura, un barba nèchi kòrtá ta aseptabel i lo no kita atenshon for di e mensahe di Reino. Pero, algun ruman hòmber por disidí ku nan no ta kria barba. (1 Kor. 8:9) Na otro lugá òf den otro kultura, hende hòmber no sa laga barba krese, i p’esei e no ta aseptabel pa kristiannan.—w16.09, pág. 21.

Dikon nos por tin sigur ku e relato di David i Goliat ta un historia real?

Goliat tabata apénas 15 sèntimeter mas haltu ku e hòmber di mas haltu registrá den tempu moderno. David tabata un hòmber real, manera un inskripshon antiguo ku ta menshoná e kas di David ta demostrá. Hesus tambe a papia di David. I e detayenan geográfiko den e relato ta kuadra ku datonan konosí.—wp16.5, pág. 13.

Kiko ta e diferensia entre konosementu, komprondementu i sabiduria?

Un hende ku tin konosementu ta akumulá informashon, òf datonan. Un hende ku tin komprondementu por mira kon un dato òf detaye ta konektá ku un otro. Pero un persona ku tin sabiduria por kombiná konosementu ku komprondementu anto apliká nan na un manera práktiko.—w16.10, pág. 18.