Hende “Generoso Lo Ta Bendishoná”
PA HOPI tempu, sakrifisio tabata un parti importante di adorashon berdadero. E israelitanan tabata sakrifiká bestia, i kristiannan ta bon konosí pa nan “sakrifisio di alabansa.” Pero tin otro tipo di sakrifisio ku tambe Dios ta keda masha kontentu kuné. (Heb. 13:15, 16) E sakrifisionan akí ta trese tantu goso komo bendishon, manera e siguiente ehèmpelnan ta mustra.
Ana, un fiel sirbidó di Yehova di antigwedat, tabatin masha gana di tin un yu hòmber pero e no tabata por a haña yu. Den orashon, el a primintí Yehova ku si e haña un yu, lo e “dun’é na SEÑOR tur e dianan di su bida.” (1 Sam. 1:10, 11) Ku tempu, Ana a sali na estado i a haña un yu ku el a yama Samuel. Despues ku Samuel a kita for di pechu, Ana a hib’é na e tabernakel, manera el a primintí Yehova. Yehova a bendishoná Ana pa e sakrifisio ei. Ana a haña sinku yu mas, i Samuel a bira un profeta i un eskritor di Beibel.—1 Sam. 2:21.
Meskos ku Ana i Samuel, kristiannan awe tambe por usa nan bida pa sirbi nan Kreador. Ademas, Hesus a primintí ku nos lo haña hopi bendishon pa kada sakrifisio ku nos hasi pa adorá Yehova.—Mar. 10:28-30.
Den promé siglo, un ruman muhé ku tabata yama Dorkas tabata konosí pa su ‘bon obranan’ i pa e echo ku e tabata “yuda hende pober,” esta, e sakrifisionan ku el a hasi pa yuda otro hende. Ma lamentablemente “el a bira malu i a muri,” i esei a hasi henter e kongregashon tristu. Ora e disipelnan a tende ku Pedro tabata den bisindario, nan a rog’é pa e bini mesora. Imaginá kon kontentu nan a keda ora Pedro a bini i a lanta Dorkas for di morto; esei ta e promé biaha ku Beibel ta menshoná ku un apòstel a resusitá un hende. (Echo. 9:36-41) Dios no a lubidá e sakrifisionan ku Dorkas a hasi. (Heb. 6:10) Dios a laga skirbi e relato di Dorkas den Su Palabra komo un bon ehèmpel di generosidat pa nos imitá.
Apòstel Pablo tambe tabata generoso i a duna un bon ehèmpel den esei ora el a duna di su tempu i a mustra interes den otro hende. Ora Pablo a skirbi su rumannan na Korinto, el a bisa: “Di mi parti, gustosamente lo mi duna tur loke mi tin i entregá mi mes kompletamente pa boso alma.” (2 Kor. 12:15) Pablo su eksperensianan a siñ’é ku ora e hasi sakrifisio pa yuda otro hende, e ta haña satisfakshon i mas importante ainda, e ta haña e bendishon i aprobashon di Yehova.—Echo. 20:24, 35.
Ta bisto ku Yehova ta keda kontentu ora nos usa nos tempu i energia pa promové interesnan di Reino i yuda nos rumannan. Pero tin otro manera ku nos por apoyá e trabou di prediká e Reino? Sí! Banda di usa nos tempu i energia pa yuda otro hende, nos por onra Dios ku nos donashonnan boluntario. E donashonnan ei ta ser usá pa sigui ku e trabou di prediká rònt mundu, loke ta inkluí kubri e gastunan di e misioneronan i otro rumannan ku ta den sirbishi spesial di tempu kompleto. Ademas, e donashonnan ei ta nesesario pa por sigui ku e trabounan di prepará i tradusí literatura i vidio, yuda ora un kalamidat sosodé i konstruí mas Salòn di Reino. Nos por tin sigur ku hende “generoso lo ta bendishoná.” Ademas, ora nos duna Yehova di nos kosnan balioso, nos ta onr’é.—Pro. 3:9; 22:9.