Kon pa Hasi Bo Estudio di Beibel Mas Efikas i Agradabel

Hosue ta lesa e Lei; e murayanan di Yériko ta kai i e kas di Rahab ta keda para; Hosue ta hisa su man na laira i ta hasi orashon

HOSUE a enfrentá un reto difísil. E mester a guia e nashon di Israel pa nan drenta e Tera Primintí apesar di tur e difikultatnan ku nan a topa. Yehova a sigur’é ku lo e tin éksito i a anim’é: ‘Sea fuerte i tene kurashi. Hasi konforme mi Lei. Meditá den dje di dia i anochi, pa bo perkurá di hasi konforme tur loke ta pará skirbí den dje. E ora ei lo bo hasi bo kaminda prosperá i e ora ei lo bo tin éksito.’—Hos. 1:7, 8.

Den e “tempunan krítiko, difísil pa trata kuné” akí, nos tambe ta enfrentá hopi difikultat. (2 Tim. 3:1) Meskos ku Hosue, nos por logra si nos sigui e konseho ku Yehova a dun’é. Nos por lesa Beibel regularmente i apliká su prinsipionan kuidadosamente na momento ku nos ta enfrentá prueba.

Sinembargo, hopi di nos lo atmití ku nos no ta bon studiante i ku studiamentu no ta fásil pa nos. Pero, komo ku studiamentu di Beibel ta asina importante, lo ta bon pa repasá e kuadro “Purba di Apliká e Sugerensianan Akí” pa bo haña algun tep ku por yuda bo hasi bo estudio di Beibel mas efikas i agradabel.

E salmista a kanta: “Hasi mi kana den e berea di bo mandamentunan, pasobra mi tin delisia den dje.” (Sal. 119:35) Lo bo disfrutá di un konsiderashon di e Palabra di Dios. Lo bo deskubrí hoyanan balioso segun ku bo ta buska tesoro spiritual.

Maske bo no mester dirigí e nashon di Israel manera Hosue a hasi, bo tin bo mes difikultatnan pa enfrentá. Pues, meskos ku Hosue, studia i hasi konforme loke a ser skirbí pa bo por saka benefisio. Si bo hasi esei, bo tambe lo prosperá i lo bo tin éksito.

PURBA DI APLIKÁ E SUGERENSIANAN AKÍ

Hasi orashon promé ku bo kuminsá studia. Beibel ta kontené e pensamentunan di e Dios todopoderoso ku el a registrá pa bo bienestar. Pues ora bo ta lesa Beibel, pidi Yehova yuda bo komprondé, keda kòrda i apliká su Palabra den bo bida.—Èsd. 7:10.
Hasi bo mes pregunta. Ora bo ta lesa Beibel òf un publikashon basá riba Beibel, puntra bo mes: ‘Kiko e pasashi akí ta siña mi di Yehova? Kon e informashon akí ta konektá ku e mensahe general di su Palabra? Kon mi por usa e informashon akí pa yuda otro hende?’
Meditá riba loke bo ta studia. Para ketu i pensa: ‘Kon e informashon akí ta laga mi sinti? Dikon e ta laga mi sinti asina? Kon esaki ta relashoná ku loke mi a yega di pasa aden, ku mi situashon aktual òf ku posibel susesonan den futuro? Kon mi por apliká e prinsipionan di Beibel i e konseho akí den mi bida?’ (Yòb 23:5; Sal. 49:3) Wak si bo por splika dikon Yehova ta urgi su pueblo pa evitá sierto práktika, òf kiko lo ta e konsekuensia si bo tuma sierto desishon.—Deu. 32:28, 29.
Usa bo imaginashon ora bo ta lesa pasashinan ku tin deskripshon. Por ehèmpel, bo por imaginá bo e esena kaminda Yosef su rumannan ta bend’é ku e ismaelitanan? (Gén. 37:18-28) Kiko bo ta mira, tende i hole? Pone bo mes den sapatu di e personahenan. Kiko nan ta pensa i sinti? Pensamentunan asina ta hasi bo estudio mas bibu i ta yuda bo haña un propósito den bo bida.
Hasi uso di material pa studia Beibel pa amplia bo investigashon. Siña konosé e materialnan ku tin den bo idioma, sea online òf imprimí. No duda pa pidi otro hende siña bo kon pa hasi bon uso di nan. Por ehèmpel, e BIBLIOTEKA ONLINE Watchtower òf Guia pa Buska Informashon den Publikashonnan di Testigunan di Yehova por yuda bo haña loke a ser publiká riba hopi tópiko i splikashon riba hopi teksto bíbliko. Usa e foyeto Yudansa pa Studia e Palabra di Dios ku ta kontené informashon útil tokante geografia, kronologia, peso, midí etcetera.
Resumí e puntonan prinsipal. Ora bo hasi esei, lo bo kòrda loke bo a kaba di studia. Mas importante ainda, lo e yuda bo kompartié ku otro hende. Esaki ta algu ku bo por usa den sirbishi? Den e maneranan akí, no solamente bo ta graba e puntonan prinsipal den bo mente sino tambe bo ta usa nan pa yuda otro hende.