Un Miembro Nobo di Kuerpo Gobernante

RIBA djárason mainta 24 di yanüari 2018, tantu e famia di Bètel na Merka komo e famia di Bètel na Canada tabata kontentu pa skucha un anunsio spesial. Nan a anunsiá ku Ruman Kenneth Cook, Jr., ta forma parti di Kuerpo Gobernante di Testigunan di Yehova.

Ruman Cook a lanta na Merka den e parti sur-sentral di Pennsylvania. El a siña e bèrdat for di un kompañero di klas promé ku el a gradua for di skol sekundario. Riba 7 di yüni 1980 el a batisá. Ruman Cook a drenta sirbishi di tempu kompleto ora el a kuminsá traha pionero riba 1 di sèptèmber 1982. Despues di 2 aña, Ruman Cook a haña invitashon pa sirbi na Bètel i riba 12 di òktober 1984 el a kuminsá sirbi na Wallkill, New York.

Pa e siguiente 25 añanan, Ruman Cook a haña vários asignashon den e drùkerei i den e Ofisina di Bètel. Na aña 1996, Ruman Cook a kasa ku Jamie. Huntu nan a sigui sirbi na Bètel na Wallkill. Pero, na desèmber 2009, Bètel a pidi Ruman Cook huntu ku su kasá pa muda pa e Sentro Edukativo di Watchtower na Patterson, New York. Einan Ruman Kenneth Cook a haña un otro asignashon pa sirbi den e departamento ku ta atendé ku korespondensia di redakshon. Na aprel 2016, djis despues ku Bètel a pidi nan pa muda bèk pa Wallkill, nan a pidi Ruman Cook ku su kasá pa muda pa e Bètel na Brooklyn, New York. Sinku luna despues ku nan a yega Brooklyn, Bètel a pidi nan pa muda pa e sede mundial na Warwick, New York. Na yanüari 2017, Kuerpo Gobernante a nombra Ruman Kenneth Cook pa sirbi komo ayudante den Komité di Redakshon di Kuerpo Gobernante.