Bo Tabata Sa?

Den pasado, kiko un hende mester a hasi pa biaha riba barku?

GENERALMENTE, den tempu di Pablo no tabatin barku di pasahero. Pa un hende biaha ku barku, e mester a puntra otro hende si nan tabata sa di un barku di karga ku tabata bai den e direkshon korekto i ku tabata dispuesto pa bai ku pasahero. (Echo. 21:2, 3) Asta si e barku no tabata bai eksaktamente kaminda e hende kier a bai, e por a subi e barku tòg i baha na un di e hafnan ku ta riba ruta. Despues, e por buska un otro barku ku ta hib’é mas serka di su destinashon.—Echo. 27:1-6.

Ta sierto temporada di aña so barku por a nabegá, i nan no tabatin un skèdjel fiho. Nabegante por a retrasá salida di un barku no solamente debí na mal wer, pero tambe debí na superstishon. Por ehèmpel, tabata un mal señal si nan a mira un raf pará ta grita riba un di e kabuyanan di barku, òf si nan a mira restu di un barku ku a noufragá na kantu. Di otro banda, si tabatin bon bientu, e nabegantenan tabata sali haf mesora. Ora un pasahero a haña un barku ku tabata dispuesto pa hib’é, e tabata bai warda ku su ekipahe den bisindario di e haf te ora e tende e anunsio ku e barku ta bai sali.

E historiadó, Lionel Casson a splika: “E stat di Roma tabatin un manera fásil pa hende haña un barku pa biaha sin ku nan mes mester a kana pariba pabou riba waf pa buska un barku. Haf di e stat tabata na boka di riu Tiber. Den e stat Ostia tabatin un plenchi grandi rondoná pa ofisina. Hopi di e ofisinanan ei tabata pertenesé na e doñonan di barku for di diferente haf: e doñonan di barku di Narbonne [awendia Fransia] tabatin un, i e doñonan di barku di Cartago [awendia Tunisia] tabatin un otro. Kualke hende ku tabata buska un barku pa biaha riba dje, mester a djis bai na un di e ofisinanan di kualke stat ku tabata riba su ruta.”

Biaha ku barku a spar e pasaheronan tempu, pero e tabata peligroso tambe. Apòstel Pablo a noufragá vários biaha durante su biahenan komo misionero.—2 Kor. 11:25.