Kon Yehova Ta Demostrá Amor i Hustisia den e Kongregashon Kristian? (Parti 2 di 4)

1. Di kiko nos por ta sigur?

YEHOVA DIOS ta stima su sirbidónan. Semper el a stima nan, i semper lo e stima nan. Ademas, e ta stima hustisia. (Sal. 33:5) P’esei, nos por ta sigur di dos kos: (1) Ta duel Yehova ora e mira ku su sirbidónan ta haña trato inhustu. (2) Lo e hasi sigur ku su pueblo lo haña hustisia. Den e promé artíkulo di e seri akí,b nos a siña ku e Lei ku Yehova a duna e nashon di Israel mediante Moises tabata basá riba amor. Ademas, e Lei a promové hustisia pa tur hende, asta pa esnan vulnerabel. (Deu. 10:18) E Lei ei ta mustra kuantu interes Yehova tin pa su sirbidónan.

2. Ki pregunta nos lo bai kontestá?

² Na aña 33 di nos era, ora ku a establesé e kongregashon kristian, e Lei di Moises a yega na su fin. Akaso esei ke men ku un kristian lo no benefisiá mas di un lei ku ta basá riba amor i ku ta promové hustisia? Di ningun manera! Tur kristian a haña un lei nobo. Den e artíkulo akí, nos lo analisá kiko e lei nobo ei ta. Ademas, nos lo kontestá e preguntanan akí: Dikon nos por bisa ku e lei ei ta basá riba amor? Dikon nos por bisa ku e ta promové hustisia? Bou di e lei ei, kon hende ku tin outoridat mester trata otro hende?

KIKO TA “LEI DI KRISTU”?

3. Kiko “lei di Kristu,” menshoná na Galationan 6:2, ta enserá?

³ Lesa Galationan 6:2. Tur kristian ta bou di “lei di Kristu.” Aunke Hesus no a skirbi un lista di lei pa su siguidónan, el a duna nan instrukshon, mandamentu i prinsipio pa guia nan. “Lei di Kristu” ta enserá tur loke Hesus a siña hende. Den e siguiente paragrafnan, nos lo siña mas tokante e lei ei.

4-5. (a) Kon Hesus a siña hende? (b) Na ki momento Hesus a siña hende?

⁴ Kon Hesus a siña hende? Na promé lugá, mediante su palabranan. Su palabranan tabata poderoso pasobra nan a siña hende e bèrdat tokante Dios i tokante e berdadero propósito di bida. Ademas, nan a siña hende ku Dios su Reino ta e úniko solushon pa humanidat su sufrimentu. (Luk. 24:19) Hesus a siña hende tambe mediante su ehèmpel. Su manera di biba a mustra su siguidónan kon nan mester biba.—Huan 13:15.

⁵ Na ki momento Hesus a siña hende? Durante su sirbishi riba tera. (Mat. 4:23) Ademas, el a siña su siguidónan djis despues ku el a resusitá. Por ehèmpel, el a aparesé na un grupo di disipel—kisas mas ku 500 di nan—i a duna nan e mandamentu pa ‘hasi hende su disipel.’ (Mat. 28:19, 20; 1 Kor. 15:6) Komo kabes di e kongregashon, Hesus a sigui duna su disipelnan instrukshon despues ku el a bolbe bèk na shelu. Por ehèmpel, rònt di aña 96 di nos era, Kristu a instruí apòstel Huan pa duna e kristiannan ungí animashon i konseho.—Kol. 1:18; Rev. 1:1.

6-7. (a) Unda nos por haña Hesus su siñansanan? (b) Kon nos ta obedesé lei di Kristu?

⁶ Unda nos por haña Hesus su siñansanan? Tur kuater Evangelio ta kontené hopi di loke Hesus a bisa i hasi tempu e tabata riba tera. Ademas, restu di e Skritura Griego Kristian ta yuda nos komprondé Hesus su manera di pensa pasobra e eskritornan tabata inspirá pa spiritu santu i tabatin “e mente di Kristu.”—1 Kor. 2:16.

⁷ Loke nos ta siña: Hesus su siñansanan ta útil den tur aspekto di bida. Pues, lei di Kristu tin efekto riba loke nos ta hasi na kas, na trabou, na skol i den kongregashon. Pa nos siña di e lei ei, nos mester lesa e Skritura Griego Kristian i meditá riba dje. Pa nos obedesé e lei ei, nos mester sigui e instrukshon-, mandamentu- i prinsipionan ku tin den e bukinan ei. Ora nos ta obedesé lei di Kristu, nos ta obedesé nos amoroso Dios, Yehova, kende ta e fuente di tur kos ku Hesus a siña hende.—Huan 8:28.

UN LEI BASÁ RIBA AMOR

8. Riba kiko lei di Kristu ta basá?

⁸ Un kas bon trahá riba un bon fundeshi ta laga esnan ku ta biba den dje sinti nan safe. Di mes manera, un bon lei basá riba un bon fundeshi ta laga esnan ku ta biba segun e lei ei sinti nan safe. Lei di Kristu ta basá riba e mihó fundeshi ku tin—amor. Dikon nos por bisa esei?

9-10. Kiko ta mustra ku tur loke Hesus a hasi tabata basá riba amor, i kon nos por imit’é?

⁹ Na promé lugá, tur loke Hesus a hasi tabata basá riba amor. Sintimentu di duele, òf kompashon, ta muestra di e amor ku un hende tin pa otro hende. Hesus a sinti duele di hende i p’esei el a siña un multitut grandi di hende, kura esnan malu, alimentá esnan ku tabatin hamber i lanta e mortonan. (Mat. 14:14; 15:32-38; Mar. 6:34; Luk. 7:11-15) Aunke tur esei a eksigí hopi di Hesus su tempu i energia, e tabata dispuesto pa pone nesesidat di otro hende promé ku esun di dje. Pero, e muestra di mas grandi di su amor tabata ora el a duna su bida pa salba humanidat.—Huan 15:13.

¹⁰ Loke nos ta siña: Nos por imitá Hesus den dos manera: (1) pone nesesidat di otro hende promé ku esun di nos i (2) siña demostrá mas kompashon na hende den nos teritorio. Ora e kompashon ei motivá nos pa prediká i siña hende tokante e bon notisia, nos ta obedesé lei di Kristu.

11-12. (a) Kiko ta mustra ku Yehova ta masha interesá den nos? (b) Kon nos por imitá Yehova su amor?

¹¹ Di dos, Hesus a mustra ku su Tata ta stima hende. Durante Hesus su sirbishi, el a mustra ku Yehova ta masha interesá den su sirbidónan. Entre otro, Hesus a siña su siguidónan lo siguiente: Kada un di nos ta balioso pa nos Tata selestial. (Mat. 10:31) Ademas, el a mustra ku Yehova ta ansioso pa duna un bon biní na un karné pèrdí ku a arepentí i bolbe bèk na e kongregashon. (Luk. 15:7, 10) El a bisa tambe ku Yehova a demostrá su amor pa medio di e reskate.—Huan 3:16.

¹² Loke nos ta siña: Kon nos por imitá Yehova su amor? (Efe. 5:1, 2) Esei ta ora nos ta balorá kada un di nos rumannan. Ademas, si “un karné pèrdí” bolbe bèk na Yehova, nos ta kontentu pa dun’é un bon biní. (Sal. 119:176) Nos ta demostrá ku nos ta stima nos rumannan ora nos ta usa nos tempu i energia pa yuda nan, spesialmente ora nan tin mester di esei. (1 Huan 3:17) Ora nos demostrá ku nos ta stima otro, nos ta obedesé lei di Kristu.

13-14. (a) Ki mandamentu Hesus a duna su siguidónan na Huan 13:34 i 35, i dikon e mandamentu ei ta nobo? (b) Kon nos ta obedesé e mandamentu nobo?

¹³ Di tres, Hesus a manda su siguidónan pa demostrá amor di sakrifisio propio. (Lesa Huan 13:34, 35.) E mandamentu ei ta rekerí ku nos mester stima nos rumannan meskos ku Hesus a stima nos. E mandamentu ei ta nobo pasobra e Lei ku Dios a duna Israel no a rekerí e tipo di amor ei. Nos mester stima nos rumannan asta mas ku nos mes. Nos tin ku stima nan asina tantu ku nos ta dispuesto pa muri pa nan, meskos ku Hesus a hasi pa nos. Pa nos hasi esei, nos mester tin amor di sakrifisio propio.c

¹⁴ Loke nos ta siña: Kon nos por obedesé e mandamentu nobo ei? Simplemente bisá, ora nos ta dispuesto pa hasi sakrifisio pa nos rumannan. No djis sakrifisio grandi, manera muri pa nan, pero sakrifisio chikitu tambe. Por ehèmpel, kita for di nos ruta pa hiba un ruman di edat reunion, keda sin hasi algu ku nos ta gusta pa agradá un ser kerí òf tuma fakansi pa duna yudansa despues di desaster natural. Ora nos ta hasi eseinan, nos ta obedesé lei di Kristu i e kongregashon ta bira un lugá ku tur hende ta sinti nan safe.

UN LEI KU TA PROMOVÉ HUSTISIA

15-17. (a) Kon loke Hesus a hasi a revelá ku e ta hustu? (b) Kon nos por imitá Hesus?

¹⁵ Den Beibel “hustisia” básikamente ta referí na hasi loke Dios ta bisa ku ta bon i hasi esei na un manera imparsial. Dikon nos por bisa ku lei di Kristu ta promové hustisia?

¹⁶ Di promé, laga nos mira kon loke Hesus a hasi a revelá ku e ta hustu. Den su tempu, e lidernan religioso hudiu tabata odia hende no hudiu. Ademas, nan tabata kere ku nan tabata mihó ku e hudiunan komun i nan no tabata respetá hende muhé. Pero Hesus semper a trata tur hende na un manera hustu i imparsial. El a permití hende no hudiu i ku tabatin fe den dje siguié. (Mat. 8:5-10, 13) El a prediká sin prehuisio na tur hende, riku i pober. (Mat. 11:5; Luk. 19:2, 9) Nunka e no a trata hende muhé na un manera kruel ni a maltratá nan. Al kontrario, el a respetá nan i a trata nan bon, asta esnan ku otro hende tabata pensa ku no bal nada.—Luk. 7:37-39, 44-50.

¹⁷ Loke nos ta siña: Nos por imitá Hesus ora nos ta trata otro hende na un manera imparsial i ta prediká na tur hende ku ta dispuesto pa skucha—sin importá nan religion òf posishon sosial. Un ruman hòmber ta imitá Hesus ora e ta trata hende muhé ku rèspèt. Ora nos ta hasi tur e kosnan ei, nos ta obedesé lei di Kristu.

18-19. Kiko Hesus a siña su siguidónan tokante hustisia, i kiko nos ta siña for di esei?

¹⁸ Di dos, laga nos mira kiko Hesus a siña su siguidónan tokante hustisia. El a siña nan prinsipio ku lo a yuda nan trata otro hende na un manera hustu. Por ehèmpel, pensa riba e Regla di Oro. (Mat. 7:12) Nos tur ke un trato hustu. P’esei, nos ta trata otro hende na un manera hustu. Esei kisas lo laga nan tambe trata nos hustu. Pero kiko si nos a bira víktima di inhustisia? Wèl, Hesus a siña su siguidónan tambe pa konfia ku Yehova lo “sòru pa [esnan], ku di dia i anochi ta sklama na dje, haña hustisia.” (Luk. 18:6, 7) E palabranan ei ta un promesa: Nos Dios ku ta hustu ta konsiente di e pruebanan ku nos ta pasa den e último dianan akí, i na su debido tempu lo e hasi sigur ku nos lo haña hustisia.—2 Tes. 1:6.

¹⁹ Loke nos ta siña: Ora nos sigui e prinsipionan ku Hesus a siña nos, nos lo trata otro hende na un manera hustu. I si nos a bira víktima di inhustisia den e mundu di Satanas akí, nos por tin sigur ku Yehova lo sòru pa nos haña hustisia.

KON HENDE KU TIN OUTORIDAT MESTER TRATA OTRO HENDE?

20-21. (a) Kon hende ku tin outoridat mester trata otro hende? (b) Kon un esposo por demostrá amor di sakrifisio propio? (c) Kon un tata mester trata su yunan?

²⁰ Manera nos a mira, lei di Kristu ta basá riba amor. P’esei, bou di e lei ei, hende ku tin outoridat mester trata otro hende bou di nan kuido ku rèspèt i amor. Nan tin ku kòrda ku Kristu ke pa nos demostrá amor den tur kos ku nos ta hasi.

²¹ Den famia. Un esposo ta stima su esposa “meskos ku Kristu ta hasi ku e kongregashon.” (Efe. 5:25, 28, 29) Un esposo mester imitá Kristu su amor di sakrifisio propio i pone nesesidat i interes di su esposa promé ku esun di su mes. Algun hende hòmber ta haña ku ta difísil pa demostrá e tipo di amor ei. Kisas pasobra nan a lanta den un kultura ku no ta trata hende ku hustisia i rèspèt. Lo por ta difísil pa nan stòp ku e mal kustumbernan ei, pero nan mester hasi e kambionan ei pa nan obedesé lei di Kristu. Un esposo ku ta demostrá amor di sakrifisio propio ta gana rèspèt di su esposa. Un tata ku di bèrdat ta stima su yunan nunka lo no hasi nada ni bisa nada ku ta hùrt nan. (Efe. 4:31) En bes di esei, e ta demostrá nan ku e ta stima nan i ku nan tin su aprobashon di manera ku nan ta sinti nan safe. E ora ei, su yunan lo stim’é i konfi’é mas.

22. Segun 1 Pedro 5:1-3, di ken e karnénan ta, i kon mester trata nan?

²² Den kongregashon. Tur ansiano mester kòrda ku e karnénan no ta di nan. (Huan 10:16; lesa 1 Pedro 5:1-3.) E ekspreshonnan “tou di Dios” i “propiedat di Dios” ta kòrda e ansianonan ku e karnénan ta di Yehova. E ke pa nan trata su karnénan ku amor i ternura. (1 Tes. 2:7, 8) Ora e ansianonan ta kumpli ku nan responsabilidat komo wardadó ku amor, nan lo haña Yehova su aprobashon i e amor i rèspèt di nan rumannan.

23-24. (a) Ki responsabilidat ansiano tin ora ku un hende den kongregashon kometé un piká serio? (b) Kiko ansiano ku trata e kasonan ei tin ku tene kuenta kuné?

²³ Ki responsabilidat e ansianonan tin ora nan tin ku trata kaso di piká serio? Nan responsabilidat ta diferente for di e hues- i ansianonan ku tabata bou di e Lei ku Dios a duna Israel. Bou di e Lei ei, esnan ku tabata nombrá no mester a husga asuntu spiritual so, pero tambe kaso sivil i penal. Pero, bou di lei di Kristu ansiano mester husga solamente asuntu ku tin di haber ku adorashon na Yehova. Nan ta rekonosé ku Dios a duna gobièrnu e responsabilidat pa husga kaso sivil i penal. Ta gobièrnu por disidí ki kastigu un hende ta haña, sea ku e tin ku paga but òf bai prizòn.—Rom. 13:1-4.

²⁴ Ki responsabilidat ansiano tin ora ku un hende den kongregashon kometé un piká serio? Nan ta usa Beibel pa analisá e situashon i tuma un desishon. Nan ta tene na mente ku lei di Kristu ta basá riba amor. Pues, amor ta motivá nan pa tene kuenta ku lo siguiente: Kiko mester hasi pa yuda kualke hende den kongregashon ku a bira víktima di loke a pasa? Pa loke ta esun ku a kometé e piká serio, amor lo motivá e ansianonan pa tene kuenta ku lo siguiente: E ta arepentí? Nos por yud’é drecha su relashon ku Yehova?

25. Kiko nos lo trata den e siguiente artíkulo?

²⁵ Nos ta hopi gradisidu ku nos ta bou di lei di Kristu. Ora nos tur hasi esfuerso pa obedes’é, nos ta yuda hasi e kongregashon un lugá ku tur hende por sinti nan stimá, balorá i safe. Pero, nos ta biba den un mundu ku “hende malbado” a “bai di malu pa pió.” (2 Tim. 3:13) Pues, nos mester keda alerta. Kon e kongregashon kristian por reflehá Dios su hustisia ora mester trata ku abusu seksual di mucha? E siguiente artíkulo lo kontestá e pregunta ei.