Pregunta di Lektor

Beibel ta bisa ku por lo ménos dos testigu ta nesesario pa konfirmá un asuntu. (Num. 35:30; Deu. 17:6; 19:15; Mat. 18:16; 1 Tim. 5:19) Pero, segun Lei, si “den kunuku” un hòmber violá un mucha muhé komprometí i e mucha muhé a grita, e mucha muhé no tabata kulpabel di adulterio pero e hòmber sí. Komo ku no tabatin testigu di e violashon, dikon e mucha muhé tabata inosente i e hòmber nò?

E relato na Deuteronomio 22:25-27 no a enfoká primeramente riba proba kulpabilidat di e hòmber; esei ya tabata establesí. Mas bien, e lei a enfoká riba konfirmá inosensia di e mucha muhé. Laga nos analisá e konteksto.

Versíkulo 23 i 24 ta papia di un hòmber ku a tene relashon seksual “den stat” ku un mucha muhé komprometí. E hòmber tabata kulpabel di adulterio pasobra a konsiderá e mucha muhé komprometí komo un hende kasá. Pero, kiko awor di e mucha muhé? E relato ta bisa ku “e no a grita pa yudansa den e stat.” Si el a hasi esei, otro hende lo a tend’é i yud’é. Pero, komo ku e no a grita, e tambe tabata kulpabel di adulterio; no e hòmber so.

Despues, Lei a trata un otro situashon: “Ma si ta den kunuku e hòmber haña e mucha muhé ku ta komprometí, i e hòmber viol’é, e ora ei solamente e hòmber ku a hasi esaki lo muri. Ma bo no mester hasi e mucha muhé nada; e mucha muhé no a hasi piká ku meresé morto, pasobra e kaso akí ta meskos ku esun di un hòmber ku ta lanta kontra su próhimo i ta mat’é. Ora ku el a hañ’é den kunuku, e mucha muhé komprometí a grita, ma no tabatin ningun hende pa salb’é.”—Deu. 22:25-27.

Den e kaso ei, Lei a duna e mucha muhé benefisio di duda. E huesnan a asumí ku el “a grita, ma no tabatin ningun hende pa salb’é.” Pues, e no a kometé adulterio. Di otro banda, e hòmber a hasi su mes kulpabel di violashon i adulterio pasobra el a ‘violá’ un mucha muhé komprometí.

Aunke e lei ei a enfoká riba e inosensia di e mucha muhé, e relato a indiká bon kla ku e hòmber tabata kulpabel di violashon i adulterio. Nos por tin sigur ku e huesnan lo a “hasi un investigashon profundo” di e asuntu i lo a tuma un desishon di akuerdo ku e instrukshonnan bon kla ku Dios a ripití hopi biaha.—Deu. 13:14; 17:4; Éks. 20:14.