“Fe Ta Sigui Loke A Ser Tendí”
1 Ora nos topa un persona cu ta “corectamente dispuesto pa bida eterno,” ta necesario pa fortalecé e persona ei su fe den loke el a tende. (Echo. 13:48; Rom. 10:17) Pa logra esei, nos mester sigui actua caminda a laga revista dor di bolbe bek pa trece e edicionnan mas recien i pa combersá mas. Sin embargo, tene na mente e meta di cuminsá un studio for dje buki Conocimentu cu Ta Hiba na Bida Eterno. Ata aki algun sugerencia cu lo por ta útil:
2 Ora di haci un rebishita caminda bo a considerá e artículo “Alabá e Rey di Eternidad!,” lo bo por cuminsá asina aki:
◼ “Ultimo biaha cu nos a papia, nos a repasá algun dje evidencia abundante cu ta proba cu tin un Dios todopoderoso. Sin embargo, djis ser conciente di su existencia no ta basta. Nos mester sa su nomber. Na ki nomber abo ta yama Dios? [Permití contesta.] Miyones di hende simplemente ta yam’é ‘Señor’ of ‘Dios,’ cu ta títulonan impersonal. Ademas, e kier pa nos conoc’é na su nomber. [Lesa Salmo 83:18.] Bijbel ta conta nos hopi mas tocante Jehova Dios, manera ta ser splicá den e buki aki.” Mustra e plachi na página 29 dje buki Conocimentu, i lesa e texto bou di dje. Despues cu bo considerá e promé tres paragrafnan den capítulo 3, bo a cuminsá un studio!
3 Cerca esnan cu bo a considerá e artículo “Pakico Lo Bini un Fin na Religion di Mundu,” tal bes lo bo kier sigui cultivá e interes dor di bisa:
◼ “Despues di a lesa e artículo, tal bes bo a keda impresioná cu e echo cu nos no por considerá tur religion di e mésun manera. Ta existí religion berdadero i tambe religionnan falsu. Esaki ta lanta e pregunta lógico, Ken su adoracion Dios ta aceptá? E contesta a ser duná dor di Jesus, i e ta ser resaltá den e buki aki.” Bai na capítulo 5 den e buki Conocimentu, i lesa §4, incluyendo Juan 4:23, 24. Anto puntra, “Lo bo ta dispuesto pa aceptá un studio di Bijbel grátis na cas?” Si e contesta ta positivo, bai na capítulo 1 i cuminsá e studio.
4 Si interes a ser mustrá den e “¡Despertad!” di 22 di april, ora bo bolbe lo bo por purba e introduccion aki pa cuminsá un studio den e buki “Conocimentu”:
◼ “Tal bes bo ta corda cu nos tabatin un combersacion tocante nos perspectivanan pa cu tempu mira un mundu sin guera. Ta difícil pa imaginá con esei lo ta realmente. Ata aki un artista su idea di esei. [Mustra e plachi na página 188-9 den e buki Conocimentu.] Lo no ta un placer pa por disfrutá di ambiente asina aki? [Bai na página 4-5, mustra e plachi, i lesa e cuadro.] E título dje buki aki ta similar n’e palabranan di Jesus hañá na Juan 17:3. [Les’é.] Si bo permití mi, lo mi kier demostrá con e buki aki por ser usá huntu cu bo Bijbel pa haña e conocimentu ei cu ta salba bida.” Si e doño di cas ta dispuesto, cuminsá e studio den e promé capítulo.
5 Si bo a topa un persona cu tabata ocupá ora bo a bishit’é e promé biaha, lo bo por bisa esaki ora bo bolbe bek:
◼ “Recientemente mi a bishitá bo i a laga copianan dje revistanan Toren di Vigilancia i Spierta! E revistanan aki ta cultivá respet pa Bijbel i pa su guia moral. Debí cu mi ta sinti cu ta esencial pa tur hende comprendé e Palabra di Dios, mi a bini bek pa mustrá bo algu cu lo yudá bo haci esei.” Mustra e buki Conocimentu, i mustra e tabla di contenido na página 3. Puntra cua capítulo ta parce esun mas interesante, bai na dje i cuminsá e studio.
6 Nos goso lo ta grandi si nos por ‘habri pa otronan e porta na fe’ cu ta hiba na bida eterno.—Echo. 14:27; Juan 17:3.