Imitá Nan Fe
1 Apostel Pablo a definí fe como e “anticipacion sigur di loke ta ser sperá, e demostracion evidente di realidadnan aunke nan no ta ser mirá.” El a agregá cu “sin fe ta imposibel pa agradá [Dios] bon.” (Heb. 11:1, 6) Pablo a insta nos pa ehercé fe, pa abundá cuné i pa sigui tras di fe.—2 Cor. 4:13; Col. 2:7; 2 Tim. 2:22.
2 Tin hopi ehempel sobresaliente di fe cu ta ser relatá den Bijbel. Na Hebreonan capítulo 11, Pablo ta duna un lista largu di testigonan cu a demostrá fe inkebrantabel. Entre otro, e lista aki ta mencioná Abel, kende tabata e promé persona cu a muri como mártir debí na su fe. Noe ta ser mencioná pasobra mediante su fe el a demostrá e temor piadoso cu tabata necesario pa salba su famia. Abraham ta ser encomendá pa su fe i obedencia. Moises ta ser elogiá pasobra mediante su fe el a sigui firme como si fuera el a mira Esun cu ta invisibel. E lista di ehempelnan tabata asina largu cu Pablo a bisa cu tempu lo falt’é si e sigui mencioná nan tur. Ki gradicidu nos ta cu nos por fortalecé nos fe dor di repasá nan “actonan santu di conducta i obranan di debocion piadoso”!—2 Ped. 3:11.
3 Den e promé siglo, Jesus a plantea e pregunta: “Ora e Yu di hende yega, lo e realmente haña fe riba tera?” (Luc. 18:8) Pues, anto, nos tin ehempelnan bibu di fe meimei di nos awe? Nos ta mira homber i muher, tantu hóben como bieu, manifestando fe inkebrantabel den Jehova mescos cu tabata cierto dje pueblo di Dios den tempu bíblico?
4 Ehempelnan di Fe den Tempu Actual: Ehempelnan sobresaliente di fe ta ser hañá tur rond di nos! E fe di superintendentenan cu ta hibando e delantera meimei di nos ta digno di imitacion. (Heb. 13:7) Pero esakinan no ta e úniconan ehemplar den nan fe. Den cada congregacion tin esnan leal kendenan tin un registro largu di sirbishi fiel na Jehova, efectuá hopi bes bou di circunstancianan masha difícil.
5 Nos mester admirá nos fiel rumannan muher cu, pa añanan, a wanta oposicion di esposonan cu ta contra. Mayornan soltero tabatin cu enfrentá e desafio di cria yunan nan so. Tin biudanan di mas edad meimei di nos cu nunca ta keda sin t’ei na actividadnan di congregacion maske nan tal bes no tin famia pa yuda nan. (Compará cu Lucas 2:37.) Nos ta maraviyá n’e fe di esnan cu ta wanta problemanan crónico di salú. Hopi ruman ta sigui sirbi lealmente maske nan tin limitacionnan cu ta prevení nan di haña privilegionan adicional di sirbishi. Tin Testigonan yong kendenan cu curashi a ehercé fe apesar di oposicion na scol. Nos debocion piadoso ta bira mas fuerte segun cu nos ta observá pioneronan fiel kendenan ta perseverá aña den aña afó aunke siendo confrontá cu un sin fin di problemanan. Mescos cu Pablo, tempu lo falta nos si nos purba relatá tur e experencianan den sirbishi di Reino i e actonan di fe efectuá dor dje rumannan aki!
6 E ehempelnan aki di esnan fiel ta duna nos consuelo i animacion. (1 Tes. 3:7, 8) Nos ta haci bon di imitá nan fe pasobra “esnan actuando den fieldad ta un placer pa [Jehova].”—Pro. 12:22.