Sigui Jesus Continuamente
1 Na un ocasion Jesus a bisa: “Si un hende kier bini tras di mi, lagu’e nenga su mes i tuma su staca di tormento i siguí mi continuamente.” (Mat. 16:24) Nos sigur kier reaccioná positivamente n’e palabranan di Jesus. Laga nos examiná kico cada frase di su invitacion ta encerá.
2 “Lagu’e Nenga Su Mes”: Ora nos dedicá nos bida na Jehova, nos ta nenga nos mes. E nificacion básico dje palabra griego traducí “nenga” ta “bisa no.” Esei kier men cu boluntariamente nos ta entregá nos mes ambicionnan, deseonan, comodidadnan i placernan egoista—determiná pa agradá Jehova atrabes di tur eternidad.—Rom. 14:8; 15:3.
3 “Tuma Su Staca di Tormento”: E bida di un cristian ta un bida di hiba e staca di tormento di sirbishi sacrificial pa Jehova. Un manera cu por reflehá e spiritu di sacrificio propio ta dor di haci hopi esfuerso den e ministerio. Te asina leu e aña aki, hopi publicador a bin ta disfrutá dje trabou di pionero auxiliar. Kisas abo ta entre nan i bo por afirmá cu e bendicionnan cu bo ta saca ta mas cu compensá e sacrificionan cu bo ta haci. Esnan cu no por sirbi como pionero auxiliar, cu frecuencia a haci areglo pa pasa mas tempu den e trabou di predicá como publicadornan di congregacion. Cu e meta ei na mente, algun congregacion ta programando nan reunionnan pa sirbishi di veld un par di minuut mas trempan cu na ántes. Cu yegada di primavera, hopi publicador ta apreciá di tin e periodo mas largu aki pa sirbishi di veld. Algun tabatin resultadonan excelente tambe ora nan a dicidí di yama na ‘djis un cas mas’ of pa traha ‘solamente un par di minuut mas largu.’
4 Un otro manera pa desplegá e spiritu di sacrificio propio ta dor di fiha metanan personal. Dor di bon planeamentu i ahustá nan programa, algun a bira pionero regular. Tabata posibel pa otro rumannan regla nan asuntunan pa asina haci nan mes disponibel pa sirbi na Betel of como misionero. Algun a muda pa un área caminda tin mayor necesidad di publicadornan di Reino.
5 “Siguí Mi Continuamente”: Aunke e disipelnan di Jesus a experenciá hopi prueba, nan a ser animá dor di Jesus su celo i awante den e ministerio. (Juan 4:34) Nan a sinti nan mes renobá den nan spiritu dor di su presencia i su mensahe. Ta p’esei esnan cu a siguié a reflehá berdadero goso. (Mat. 11:29) Laga nos di igual manera animá un e otro pa perseverá den e trabou di mas importante, esta, predicacion di Reino i hacimentu di disipel.
6 Ohalá nos tur reaccioná positivamente n’e invitacion di Jesus pa siguié continuamente dor di cultivá e spiritu di sacrificio propio. Segun nos ta haci esei, nos lo tin gran goso awor i por anticipá asta mayor bendicion den futuro.