Mayornan—Entrená Boso Yunan pa Predicá
1 Nos congregacionnan ta bendicioná cu hopi mucha cu tin un deseo sincero pa sirbi Dios. (Ecl. 12:1) Nan tambe ta entre esnan invitá dor di Jehova pa participá den alab’é. (Sal. 148:12-14) P’esei, e entrenamentu dia-tras-tras cu mayornan ta duna nan yunan lo mester incluí instruccion en cuanto con pa compartí nan fe cu otronan den e trabou di predicacion di Reino.—Deu. 6:6, 7.
2 Entrená Yunan cu Pasonan Progresivo: Yunan ta merecé di ser entrená for di un edad hopi chikitu pa compañá nan mayornan den e ministerio. Promé cu bai den sirbishi, prepará bo yunan pa participá den un manera significativo. Determiná di antemano loke bo ta spera pa nan haci na porta dje casnan. Muchanan hopi chikitu por duna tratado i papel di invitacion i invitá e hendenan na e Salon di Reino. Por pidi esnan yong cu ta lesa bon pa lesa un texto bíblico pa e doño di cas. Nan por ofrecé e revistanan, usando un presentacion breve. Segun cu nan ta gana experencia, entrená nan pa usa e Bijbel den nan presentacion. Hopi publicadó hóben a cuminsá nan mes ruta di revista i ta haci rebishita regularmente. Ta mihó pa un mucha traha cu un adulto en bes di cu un otro hóben. E adulto por splica e doño di cas cu e hóben ta ricibiendo entrenamentu den e ministerio.
3 Un mucha muher chikitu a pidi e ancianonan pa yud’é p’e por cualificá como un publicadó di Reino. Maske e tabatin solamente cincu aña di edad n’e tempu ei i no por a lesa, e por a presentá e mensahe di Reino eficasmente n’e casnan. E tabata siña for di cabes unda e textonan ta keda, tabata bai n’e página ei, tabata pidi e doño di cas pa lesa nan, i despues tabata duna e splicacion.
4 Tambe mayornan mester siña yunan via nan ehempel, ki balioso ta di tin un bon orario pa participá regularmente den e ministerio. Mayornan tin cu establecé un rutina semanal consistente pa sirbishi i pega na dje, di manera cu e muchanan sa ki parti di siman semper ta apartá pa e trabou di predicá.
5 Ora muchanan ta ser entrená for di chikitu pa stima i disfrutá dje ministerio, nan lo ser motivá pa haci esfuerso pa alcansá privilegionan mas grandi den futuro, incluyendo kisas e sirbishi di pionero. (1 Cor. 15:58) Nos tur mester animá e muchanan meimei di nos pa haci bon progreso como alabadónan di Jehova.