Pone e Cosnan Mas Importante na Promé Lugá
1 Kico ta algun cos importante cu ta vital pa nos bienestar spiritual? Studio personal, asistencia na reunion, oracion persistente, bon asociacion i e ministerio cristian sigur ta entre e cosnan importante. Nos no por mantené un bon salú spiritual si nos no ta tene cosnan importante na promé lugá den nos bida.
2 Sin embargo, nos tur tin un lucha contra deseonan carnal i tin mester di disiplina. (Gal. 5:17) Nos no mester pensa nunca cu dor di bai tras di metanan egoista nos por saca mas probecho. (Jer. 17:9) P’esei, si nos kier protehá nos curason i evitá di ser desviá, ta crucial pa nos haci examinacion propio regularmente.—Pro. 4:23; 2 Cor. 13:5.
3 Examiná Bo Mes Curason: Bo por haci esaki dor di haci bo mes algun pregunta franco: Mi ta anhelá pa lesa e Palabra di Dios? (1 Ped. 2:2) Mi ta conciente dje importancia di asistí na tur e reunionnan di congregacion? (Heb. 10:24, 25) Mi ta perseverá den oracion? (Rom. 12:12) Mi ta busca e compania di personanan cu un inclinacion spiritual? (Rom. 1:11, 12) Mi ta sinti un obligacion personal pa declará e bon nobo? (1 Cor. 9:16) Contestanan afirmativo lo mustra cu bo ta deseoso pa pone e cosnan mas importante na promé lugá.
4 Examiná Bo Rutina Diario: Despues di a examiná e deseonan di bo curason bo tin cu establecé prioridadnan en cuanto e uso di tempu. Esaki ta encerá programá tempu pa regularmente bo lesa e Bijbel i cada edicion di E Toren di Vigilancia i Spierta!, i tambe tempu pa prepará p’e reunionnan. Tambe tin cu apartá tempu pa e famia studia i haci oracion huntu. Fiha un límite n’e tempu cu ta dedicá na sinta dilanti television of computer. Sea dicididu pa asistí na tur reunion di congregacion i programá tur otro cos rond di nan. Planea pa henter e famia participá den sirbishi di veld tur siman.
5 Sin duda, si nos pone e cosnan mas importante na promé lugá den nos bida, nos lo haña un causa di goso.