Nos Ministerio—Un Expresion di Amor Berdadero
1 Mediante nos ministerio nos ta demostrá nos obedencia na e dos mandamentunan di mas grandi. (Mat. 22:37-39) Nos amor pa Jehova ta motivá nos pa papia cosnan positivo tocante dje. Nos amor pa nos próhimo ta impulsá nos pa animá nan pa busca pa conocé e boluntad i propósitonan di Dios di manera cu, mescos cu nos, nan por yega na stima Jehova i pone nan mes den fila pa e premio di bida eterno. Pues anto, mediante nos ministerio nos ta onra Jehova su nomber i ta compartí e speransa di Reino baliosísimo cu nos próhimo. Sí, nos ministerio ta un expresion di amor berdadero pa Dios i pa hende.
2 Nos amor ta impulsá nos pa papia cu tur clase di hende den tur clase di marco di circunstancia. (1 Cor. 9:21-23) Ata aki un ehempel: Abordo di un avion, un anciano cristian a sinta banda di un pastor católico romano. E anciano a haci e pastor un par di pregunta cu tacto, loke a pone e pastor expresá su mes libremente. Despues e ruman a dirigí e combersacion n’e Reino. Pa ora e pastor a baha for dje avion, el a aceptá dos di nos bukinan. Ki un resultado excelente p’e anciano su expresion di amor berdadero pa su próhimo!
3 Amor Berdadero Ta Motivá Nos pa Predicá: Esnan cu ta participá den e trabou di pionero auxiliar i pionero di tempu completo, sigur ta expresando amor berdadero pa Dios i pa próhimo. Constantemente pioneronan ta sacrificá nan tempu i energia pa yuda otro hende spiritualmente. Kico ta motivá nan pa haci esaki? Un pionero a bisa: “Mi sa cu amor ta un fruta di Dios su spiritu. P’esei, sin amor lo mi no ta ni den e berdad, pa no papia mes di tin éxito como pionero. Amor ta poné mi tuma hende na cuenta, tuma nota di loke nan tin mester, i mi sa cu hende ta reaccioná faborablemente riba amor.” Jesus a demostrá tal clase di amor pa hende. Un biaha ora e cu su disipelnan cansá tabata bayendo na un lugá pa “sosegá un poco,” e multitudnan a yega ei promé cu nan. Kico Jesus a haci? “Conmoví cu duele pa nan,” el a pone su necesidadnan personal un banda pa por “siña nan hopi cos.”—Mar. 6:30-34.
4 Asta ora hende rechasá e bon nobo cu nos ta ofrecé, nos ta experenciá un goso interno, sabiendo cu impulsá pa amor, nos a haci nos best pa yuda nan gana salbacion. Ora cu nos tur ta ser husgá finalmente dor di Cristo, nos lo ta masha contentu di a demostrá amor berdadero dor di a ‘cumpli cu nos ministerio plenamente.’—2 Tim. 4:5.