Asistí na Reunionnan “Tantu Mas” Awor
1 Reuní huntu semper tabata vital p’e pueblo di Jehova. E israelitanan tabatin e tempel i nan snoanan como centro pa adoracion berdadero, educacion divino i asociacion gososo. Di igual manera, e cristiannan di promé no a bandoná reunimentu huntu. Segun cu presion i pruebanan ta aumentá den e último dianan crítico aki, nos tambe tin mester dje fortalesa spiritual cu nos reunionnan di congregacion ta percurá—i nos tin mester di dje “tantu mas” awor. (Heb. 10:25) Tuma nota di tres motibu pakico nos ta asistí na reunion.
2 Pa e Asociacion: E Scritura ta amonestá nos pa “sigui consolá otro i edificá otro.” (1 Tes. 5:11) Asociacion cu rumannan deboto ta yena nos mente cu pensamentunan edificante i ta motivá nos pa haci bon obra. Pero si nos isolá nos mes, nos lo ta capas di pensa riba cosnan bobo, egoista of asta inmoral.—Pro. 18:1.
3 Pa e Instruccion: Reunionnan cristian ta percurá un programa continuo di instruccion bíblico diseñá pa mantené e amor di Dios bibu den nos curason. Nan ta duna nos guia práctico pa aplicá “tur e conseho di Dios.” (Echo. 20:27) Reunionnan ta entrená nos den e arte di predicá i siña e bon nobo na otro hende. E abilidadnan aki ta tantu mas necesario awor pa nos por experenciá e goso inexpresabel di haña i yuda esnan cu lo aceptá e berdad di Bijbel.
4 Pa e Proteccion: Den e mundu malbado aki, e congregacion ta un berdadero lugá di proteccion spiritual—un refugio di pas i amor. Ora nos ta presente na reunionnan di congregacion, e spiritu santu di Dios tin un influencia poderoso riba nos, produciendo e fruta di “amor, goso, pas, gran pacenshi, amabilidad, bondad, fe, suavedad, dominio propio.” (Gal. 5:22, 23) Reunionnan ta fortalecé nos pa para firme i sólido den e fe. Nan ta ekipá nos pa ta prepará p’e pruebanan den futuro.
5 Dor di asistí regularmente na reunion, nos ta experenciá loke e salmista a describí, manera ta registrá na Salmo 133:1, 3: “Mira! Ki bon i ki agradabel ta pa rumannan biba huntu den unidad!” Unda cu e pueblo di Dios ta sirbi i reuní huntu awe, “ei Jehova a ordená p’e bendicion ta, asta bida pa tempu indefiní.”