Testificá Mediante Bon Conducta
1 Den e mundu djawe caminda tur cos mag, hopi hóben ta malgastá nan bida descabeyadamente cu droga, inmoralidad, rebelion i violencia. Na contraste, ta refrescante pa mira e conducta ehemplar di hóbennan saludabel den e congregacion cristian i esei sigur ta algu bunita pa Jehova. Esei ta sirbi como un testimonio poderoso cu lo por atraé otro hende n’e berdad.—1 Ped. 2:12.
2 Hopi experencia ta mustra cu e bon conducta di hóbennan cristian tabatin un impacto positivo riba observadónan. Papiando di un hóben Testigo cu tabata su alumno, un maestra di scol a bisa henter e klas cu e mucha muher aki su Dios, Jehova, ta e Dios berdadero. El a bisa esaki pasobra semper e mucha muher su conducta tabata respetuoso. Un otro maestra a skirbi Sociedad, bisando: “Mi kier a felicitá boso pa e hóbennan asina excelente cu boso tin den boso religion. . . . Boso hóbennan di berdad ta un ehempel. Nan ta respetá hende grandi, nan tin bon manera i nan ta bisti modesto. I nan conocé nan Bijbel masha bon mes! Esei ta religion!”
3 Un otro maestra a keda impresioná cu e conducta excelente di un Testigo di shete aña den su klas. El a ser atraí n’e mucha homber su personalidad suave i agradabel, cu a pon’é na contraste skerpi cu e otro mucha hombernan. Su actitud serio pa cu su creencianan religioso a causa un impresion cerca e maestra; e no tabatin bergwensa di ta otro debí na loke el a kere. E maestra por a mira cu e tabatin un concenshi entrená i cu e por a “distinguí tantu loke ta bon como loke ta malu.” (Heb. 5:14) Cu tempu, e mama dje mucha a bishitá e maestra, i a cuminsá un studio di Bijbel cuné. Despues, e maestra a bautisá i a bira un pionero regular!
4 Un yoncuman a ser influenciá dor dje bon conducta di un Testigo na su scol. E mucha muher tabata ègt otro—masha cortes, gusta siña su lesnan i semper modesto den su forma di bisti; tambe, distinto dje otro mucha muhernan, nunca el a flirt cu e mucha hombernan. E yoncuman por a mira cu e Testigo tabata biba segun principionan di Bijbel. E yoncuman a hacié preguntanan tocante su creencianan religioso i a keda impresioná cu loke el a haña sa. El a cuminsá studia Bijbel, djis despues el a bautisá i cu tempu el a participá den e ministerio di pionero i den e sirbishi di Betel.
5 Si bo ta un hóben cristian cu ta deseá di duna un excelente testimonio na otronan, vigilá bo conducta den tur cos. Nunca baha bo vigilancia dor di simpatisá cu e mundu su actitud, su punto di bista i estilonan di bida permisivo. Pone un bon ehempel den bo manera di papia, bisti i di areglo personal, no solamente ora bo ta den e ministerio di veld i na reunionnan di congregacion, sino tambe ora bo ta na scol of ta recreá. (1 Tim. 4:12) Lo bo tin berdadero goso ora un persona mustra interes den e berdad debí cu abo a ‘laga bo lus briya’ mediante bo bon conducta.—Mat. 5:16.