Percurando p’e Pertenencianan dje Doño

¹ Den tempu bíblico un mayordomo a ser confiá cu encargonan importante. Abraham a duna su mayordomo e tarea di busca un casá pa su yu homber, Isaac. (Gén. 24:1-4) Bon mirá, e mayordomo tabata responsabel pa sigurá e continuidad di Abraham su liña di desendencia. Ki un responsabilidad! Nada straño anto cu apostel Pablo a bisa: “Loke ta ser buscá den mayordomonan ta pa un homber ser hañá fiel”!—1 Cor. 4:2.

Encargo di Mayordomo Cristian

² Den Bijbel tin algun aspecto dje ministerio cristian cu ta ser describí como encargo di mayordomo. Por ehempel, apostel Pablo a papia cu e efesionan “dje encargo di mayordomo dje bondad inmerecí di Dios cu a ser duná na mi cu boso na bista.” (Efe. 3:2; Col. 1:25) Pablo a mira su comision di hiba e bon nobo na e nacionnan como un encargo di mayordomo cu e tabatin cu manehá fielmente. (Echo. 9:15; 22:21) Apostel Pedro a skirbi na su rumannan ungí: “Sea hospitalario un cu otro sin keha. Na e porcion cu cada un a ricibí e don, us’é pa sirbi otro como mayordomonan excelente dje bondad inmerecí di Dios expresá den vários manera.” (1 Ped. 4:9, 10; Heb. 13:16) Kico cu e cristiannan di promé siglo tabatin den sentido material tabata resultado di Jehova su bondad inmerecí. P’esei, nan tabata mayordomo dje cosnan ei i tabatin cu usa nan den un manera cristian.

³ Awe, Testigonan di Jehova ta mira asuntunan dje mésun manera. Nan a dedicá nan mes na Jehova Dios i ta considerá tur loke nan tin—nan bida, nan fortalesa físico, nan pertenencianan material—como fruta “dje bondad inmerecí di Dios expresá den vários manera.” Como mayordomonan excelente, nan ta sinti cu nan tin cu duna cuenta na Jehova Dios p’e manera cu nan ta usa e cosnan aki. Ademas, Dios a duna nan un conocimentu dje bon nobo. Esaki tambe ta un encargo cu nan kier usa den e mihó manera posibel: pa engrandecé e nomber di Jehova i pa yuda otronan yega na un conocimentu dje berdad.—Mat. 28:19, 20; 1 Tim. 2:3, 4; 2 Tim. 1:13, 14.

⁴ Con Testigonan di Jehova ta cumpliendo cu nan responsabilidad como mayordomo? E raport di aña ta mustra cu aña pasá so, nan a dedicá mundialmente mas cu un mil miyon ora predicando e ‘bon nobo dje reino’ i a conducí mas cu 4.500.000 studio bíblico cu personanan interesá. (Mat. 24:14) Tambe nan a demostrá nan fieldad como mayordomo di Jehova dor di nan contribucion generoso na e trabou mundial i pa mantené e Salonnan di Reino local, dor di nan hospitalidad na superintendentenan biahero i na otronan, i dor di nan bondad extraordinario na esnan cu tin hopi necesidad, manera e víctimanan di conflictonan armá. Como grupo, cristiannan berdadero ta percurando bon pa e pertenencianan dje Doño.

“E Mayordomo Fiel, Esun Discreto”

⁵ E encargo di mayordomo no ta existí solamente na nivel individual, sino tambe na nivel organisacional. Jesus a yama e congregacion cristian ungí riba tera “e mayordomo fiel, esun discreto.” (Luc. 12:42) E responsabilidad dje “mayordomo fiel” aki ta pa percurá “suministro di cuminda” i pa hiba e delantera den e predicacion internacional dje bon nobo. (Rev. 12:17) Relacioná cu esaki, e clase di mayordomo fiel, representá dor dje Cuerpo Gobernante, tin e responsabilidad cu Dios a duna nan pa manehá su ‘talentonan’ material i spiritual corectamente. (Mat. 25:15) Na armonia cu e ehempel dje “mayordomo fiel,” cada sucursal ta haci tur esfuerso pa usa tur contribucion financiero den un manera responsabel, pa promové interesnan di Reino. Tur e donacionnan ei ta hací a base di confiansa, i “e mayordomo fiel, esun discreto” ta responsabel pa sigurá cu nan ta ser usá p’e propósito cu nan a ser duná i cu nan ta ser manehá na un manera sabí, económico i eficas.

⁶ Nos por mira un ehempel di uso sabí dje fondonan cu a ser contribuí den e crecementu dje actividad di drukmentu di Testigonan di Jehova den siglo 20. Distribucion di Bijbel i tambe di literatura bíblico—revista, buki, foyeto, tratado i Noticianan di Reino—a hunga un papel importante den plama “e bon nobo” durante e “último dianan” aki. (Mar. 13:10; 2 Tim. 3:1) I e revista Toren di Vigilancia tabata un instrumento principal pa suministrá “alimento n’e debido tempu” na e “famia di cas di Dios” i na nan compañeronan, e “multitud grandi” di “otro carnénan.”—Mat. 24:45; Efe. 2:19; Rev. 7:9; Juan 10:16.

⁷ Na principio, tur literatura di Testigonan di Jehova a ser producí dor di imprentanan comercial. Pero durante añanan ’20, Sociedad a dicidí cu lo ta mas eficiente i spiritualmente probechoso si sirbidónan di Jehova mes imprimí nan literatura. Cuminsando na un escala chikitu na 1920, e trabou di imprenta a crece gradualmente na Brooklyn, New York, te ora cu el a bira hopi grandi. Pa 1967 e facilidadnan di imprenta a ocupá cuater blok. Den otro paisnan tambe nan a cuminsá imprimí, pero mayoria di nan a para dor di Guera Mundial II.

⁸ Pero maske cuantu e operacionnan di imprenta na Merca a crece, nunca e tabata suficiente pa suministrá henter mundu. P’esei, den e añanan despues di guera, operacionnan di imprenta tabata funcioná of a ser establecí den hopi otro pais, entre otro Cánada, Dinamarca, Grecia, Inglatera, Suisa, Sur Africa i West Alemania. Pa principio di añanan ’70, Australia, Brazil, Filipínas, Finlandia, Ghana, Hapon i Nigeria a ser agregá n’e lista. Algun dje paisnan aki a producí buki tambe. Ademas, na principio di añanan ’70, a entrená misioneronan di Galad den e trabou di imprenta i a manda nan na algun dje paisnan aki pa yuda rumannan local cu e trabou di imprenta.

⁹ Durante añanan ’80, e cantidad di pais caminda tabata imprimí revista a yega un máximo di 51.a Ki un excelente uso dje pertenencianan dje Doño tur esaki a resultá di ta! Ki un evidencia fuerte dje crecementu dje trabou di Reino! I ki un testimonio poderoso dje apoyo generoso di miyones di Testigo di Jehova individual kendenan a ‘onra Jehova cu nan cosnan balioso’! (Pro. 3:9) Pues, nan a duna prueba di ta mayordomonan excelente di loke Jehova a bendicioná nan cuné den vários manera.

Un Cambio di Enfoke

¹⁰ Durante añanan ’70 i na principio di añanan ’80, tabatin gran progreso den e tecnologia di drukmentu, i Testigonan di Jehova a adoptá técnicanan mas nobo di drukmentu. Anteriormente, nan a usa e estilo tradicional di imprimí di ‘letterpress.’ Esaki a cambia gradualmente segun cu nan a cuminsá adoptá e manera mas moderno di drukmentu ‘offset.’ Como resultado, ta producí publicacionnan bunita cu plachinan na tur color, en bes di plachinan di dos color (pretu plus un otro color mas) cu tabata posibel riba e mashinnan bieu di imprenta letterpress. Ademas, tecnologia di computer a cambia henter e preparacion pa drukmentu. Testigonan di Jehova a desaroyá un Sistema Plurilingwe di Fotocomposicion Electrónico (MEPS), un sistema computerisá cu awor ta haci posibel pa imprimí den mas cu 370 diferente idioma. Ningun programa comercial por igualá MEPS su capacidad di funcioná den asina tantu idioma.

¹¹ Cu yudansa di MEPS su tecnologia di computer i e uso di otro innovacionnan manera post electrónico, tabatin un otro gran adelanto den producí alimento spiritual n’e debido tempu. Anteriormente, cu e tecnologia bieu, revistanan cu no tabata na ingles a contené informacion lunanan, of tin biaha asta un aña, despues cu el a sali na ingles. Awor, E Toren di Vigilancia ta aparecé simultáneamente na 115 diferente idioma, i Spierta! den 62. Esaki ta nificá cu mundialmente mas cu 95 porciento di esnan cu ta asistí na e Studio di Toren di Vigilancia semanal di Testigonan di Jehova ta considerá e mésun material n’e mésun tempu. Ki un bendicion esaki ta! Pues invertí den tur e tecnologia nobo ei tabata sigur un bon uso dje pertenencianan dje Doño!

Necesidadnan Organisacional Ta Cambia

¹² E sistemanan nobo aki di imprimí a cambia e necesidadnan organisacional dje operacionnan di imprenta mundial di Testigonan di Jehova. E mashinnan di imprenta offset ta hopi mas lihé cu esnan bieu di letterpress, pero nan ta muchu mas caru tambe. Sistemanan di computer cu ta apoyá trabounan relacioná cu drukmentu, manera redaccion, traduccion i artenan gráfico, aunke nan ta ofrecé hopi mas posibilidad cu e sistemanan bieu, ta hopi mas costoso tambe. Pronto a bira bisto cu no tabata rendabel mas pa imprimí revista den 51 diferente pais. P’esei, den añanan ’90, “e mayordomo fiel” a reevaluá e situacion. Kico tabata e conclusion?

¹³ Análisisnan a indicá cu lo por a utilisá e “cosnan balioso” cu Testigonan di Jehova i nan amigunan a contribuí na un manera mas eficas si consolidá e trabou di imprenta. Di manera cu gradualmente a reducí e cantidad di sucursal cu tabata imprimí. Alemania a tuma over e drukmentu di revista i literatura di hopi pais di Oost i West Europa, incluso di algun cu anteriormente tabata imprimí nan mes literatura. Italia ta suministrá revista i literatura pa partinan di Africa i zuidoost Europa, incluso pa Grecia i Albania. Na Africa, drukmentu di revista a ser limitá na Nigeria i Sur Africa. Consolidacion similar a tuma lugá rond mundu.

Factornan pa Tuma na Cuenta

¹⁴ Pa juli 1998, lo a stop di imprimí revista den vários pais europeo, entre otro, Austria, Dinamarca, Francia, Grecia, Hulanda i Suisa. E peso di imprimí lo ser cargá dor di Alemania, Inglatera, Finlandia, Italia, Spaña i Suecia. Den e manera aki, lo evitá gastunan innecesario i usa contribucionnan den un mihó manera pa e trabou mundial. Con a dicidí cua paisnan lo sigui como sitionan di imprenta i cua lo stop di imprimí? Cumpliendo cu e mandato pa percurá p’e pertenencianan dje Doño di un manera sabí, “e mayordomo fiel” a evaluá cada sitio cuidadosamente pa wak con práctico ta pa imprimí einan.

¹⁵ E motibu principal pakico a stop di imprimí den algun pais i a consolidá den otronan tabata pasobra esei ta práctico. Ta mas cumbiniente pa laga un solo pais imprimí literatura pa vários otro tera i ta haci mihó uso di ekipo caru. Awor ta imprimí caminda gastunan ta mas abou, tin material disponibel i facilidad pa manda carga ta bon. Asina, e mayordomo ta usa e pertenencianan dje Doño corectamente. Naturalmente, e echo cu a stop di imprimí den un pais no ta nificá cu e trabou di predicá lo stop einan. Lo sigui tin un abundancia di suministro di material imprimí disponibel, i e cientos di miles di Testigonan di Jehova den e paisnan ei lo sigui anunciá “e bon nobo di pas” na nan próhimo celosamente. (Efe. 2:17) Ademas, e reorganisacion aki a resultá den otro beneficionan.

¹⁶ Pa mencioná un beneficio: a manda mayoria dje mashinnan di imprenta di Dinamarca, Grecia, Hulanda i Suisa pa Filipínas i Nigeria. Operadornan ábil for dje paisnan europeo a aceptá e invitacion pa bai huntu cu e mashinnan i entrená e operadornan local con pa usa nan. Pues, awor e paisnan ei ta hañando e revistanan cu e mésun calidad haltu cu otro paisnan.

¹⁷ Considerá un otro beneficio: E costo di imprimí revista awor ta ser cargá dor di un par di pais caminda e drukmentu ta sigui. Como resultado, den paisnan unda a stop di imprimí, awor tin fondonan disponibel pa otro propósitonan, manera pa traha Salonnan di Reino i pa yuda atendé n’e necesidadnan di nos rumannan den paisnan mas pober. Pues, uso cuidadoso dje pertenencianan dje Doño ta nificá cu por haci un mihó aplicacion dje palabranan di Pablo riba un escala internacional: “Mi no kier men pa esei ta fácil pa otronan, pero difícil pa boso; sino cu mediante un igualacion, e exceso di boso awor aki mes por compensá loke nan falta . . . pa un igualacion por tuma lugá.”—2 Cor. 8:13, 14.

¹⁸ Como resultado dje consolidacion aki, Testigonan di Jehova rond mundu ta uní cu otro mas íntimamente cu nunca. No ta un problema pa e Testigonan na Dinamarca laga nan revistanan ser imprimí na Alemania, aunke nan mes tabatin custumber di imprimí nan. Nan ta gradicidu p’e sirbishi di nan rumannan aleman. Testigonan di Jehova na Alemania ta sinti rencor p’e echo cu ta usa nan contribucion pa percurá literatura bíblico pa Dinamarca, of pa Rusia, Ucrania i otro paisnan? Naturalmente cu no! Nan ta contentu di sa cu awor por usa e contribucion di nan rumannan den e paisnan ei pa otro propósitonan necesario.

Percurando pa e Pertenencianan

¹⁹ Den tur Salon di Reino di Testigonan di Jehova rond mundu, tin un caha di contribucion riba cua tin skirbí: “Contribucion pa e Obra Mundial di Sociedad—Mateo 24:14.” Contribucion boluntario cu tira den e cahanan ei ta disponibel pa usa caminda cu tin un necesidad. “E mayordomo fiel” i cada sucursal ta dicidí con pa usa e contribucion. P’esei, caminda ley ta permití, lo por usa placa tirá den caha di contribucion di un pais pa apoyá e actividad di Testigonan di Jehova den un otro pais miles di kilometer leu. Den algun pais a usa e contribucion pa percurá yudansa di emergencia na compañeronan creyente cu tabata sufriendo debí na horcan, tornado, temblor i guera civil. I ta usa donacionnan asina pa sostené misioneronan den mas cu 200 pais.

²⁰ Den e congregacionnan di Testigonan di Jehova, ta un regla general cu ta mencioná asuntunan financiero solamente un bes pa luna, i ta tuma un par di minuut so pa esei. No ta pasa skalchi di colect na Salonnan di Reino ni na asambleanan. No ta manda carta pidi fondo na personanan individual. No ta busca hende pa organisá ‘fundraising.’ Normalmente, E Toren di Vigilancia tin solamente un artículo pa aña cu ta splica con esnan cu ta deseá esei por haci contribucion na Watch Tower Bible and Tract Society pa por apoyá e trabou mundial. Den e Spierta! no tin mencion regular di asuntunan financiero dje Sociedad. Con anto, nos a logra efectuá e enorme trabou mundial di predicá e bon nobo, traha Salonnan di Reino necesario, percurá pa esnan den sirbishi special di tempu completo, i duna yudansa na cristiannan den necesidad? Jehova a bendicioná su pueblo di un manera maraviyoso cu un spiritu di generosidad. (2 Cor. 8:2) Nos ta probechá dje oportunidad aki pa gradicí tur cu tabatin un parti den ‘onra Jehova cu nan cosnan balioso.’ Nan por ta sigur cu “e mayordomo fiel” lo sigui cuida e pertenencianan dje Doño. I nos ta pidi Jehova den oracion pa e sigui bendicioná tur e areglonan cu ta ser hací pa expandé e trabou mundialmente.

[Footnote]