Sirbishi di Pionero—Algu pa Bo?
1 “Mi no por imaginá mi ta haciendo algu otro. Sigur-sigur mi no por imaginá nada cu lo por trece e mésun goso.” Ken a bisa esaki? Un dje cientos di miles di Testigo di Jehova cu a haci e ministerio di tempu completo nan carera gososo den bida. Abo a considerá, huntu cu oracion, si e sirbishi di pionero ta algu pa bo? Como cu nos a haci un dedicacion sin reserva na Jehova, ta importante pa nos considerá si nos lo por participá mas plenamente den plama e bon nobo di Reino. Cu e meta ei na mente, por fabor, considerá algun pregunta cu hopi ruman ta haci tocante e sirbishi di pionero.
PREGUNTA 1: “Tin ruman ta bisa cu traha pionero no ta algu pa tur hende. Con mi por sa si e ta pa mi?”
2 E contesta ta dependé di bo circunstancia i obligacionnan cu Bijbel ta rekerí di bo. Tin hopi ruman kende nan salú of situacion actual den bida no ta permití nan dedicá 90 ora pa luna n’e ministerio. Tuma por ehempel e hopi ruman muhernan fiel cu ta esposa i mama cristian. Nan ta participá den e ministerio mas tantu cu nan por, te asina leu cu nan circunstancia ta permití. Ora nan tin chens, nan ta traha pionero auxiliar un of mas luna pa aña, i asina ta cosechá e goso cu ta bini di aumentá nan participacion den sirbishi. (Gal. 6:9) Maske tal bes nan circunstancia no ta permití nan sirbi awor aki como pionero di tempu completo, tog nan ta promové e spiritu di pionero i ta un bendicion pa e congregacion como publicadó celoso dje bon nobo.
3 Di otro banda, hopi ruman cu ta relativamente liber di obligacion a traha lugá pa e sirbishi di pionero dor di ahustá nan prioridadnan. Ki tal di bo? Bo ta un hóben cu a caba scol? Bo ta esposa di un casá cu por percurá debidamente pa e famia? Bo ta casá i no tin yu cu ta dependé di bo? Bo a baha cu penshon? Traha pionero of no ta un decision cu cada persona tin cu tuma pa su mes. E pregunta ta: Bo por traha lugá den bo bida pa e trabou di pionero?
4 Satanas ta usa su sistema di cosnan mundano pa yena nos bida cu distraicion i pa hinca nos den un estilo di bida egoista. Si nos ta dicididu pa keda sin ta parti di mundu, Jehova lo yuda nos pa mantené interesnan di Reino na promé lugá i pa haci mas esfuerso i aceptá tur e privilegionan di sirbishi teocrático cu tin disponibel pa nos. Si bo por ahustá bo circunstancia pa sirbi como pionero, pakico no hacié?
PREGUNTA 2: “Con mi por ta sigur cu lo mi por mantené mi mes siendo den e sirbishi di tempu completo?”
5 Ta berdad cu den hopi pais, atrabes di añanan e oranan di trabou pa siman cu bo mester traha pa por obtené loke ta ser considerá necesidad di bida a aumentá. No obstante, hopi ruman a traha pionero pa décadanan, i Jehova ta sigui sostené nan. Pa por tin éxito como pionero, nos tin mester di fe i e spiritu di sacrificio propio. (Mat. 17:20) Salmo 34:10 ta sigurá nos cu ‘esnan cu ta busca Jehova lo no falta nada bon.’ Ken cu drenta e sirbishi di pionero mester haci esei cu pleno confiansa cu Jehova lo percurá p’e. Ta net esei Jehova ta haciendo pa pioneronan fiel na tur parti! (Sal. 37:25) Di mes, di acuerdo cu e principionan na 2 Tesalonicensenan 3:8, 10 i 1 Timoteo 5:8, pioneronan no ta verwagt pa otro rumannan mantené nan.
6 Ken cu ta pensando riba e sirbishi di pionero mester haci manera Jesus a declará: “Sinta promé i calculá e gastu.” (Luc. 14:28) Esaki ta demostrá sabiduria práctico. Papia cu esnan cu a traha pionero exitosamente pa vários aña. Puntra nan con Jehova a sostené nan. Bo superintendente di circuito ta un pionero experenciá i gustosamente lo e ofrecé sugerencianan en cuanto kico pa haci pa logra éxito den e ministerio di tempu completo.
7 Kisas un persona nunca ta experenciá plenamente e berdad dje promesa cu Jesus a haci na Mateo 6:33, sino te ora e pone su mes den man di Jehova. Un fiel pionero a conta: “Ora ami cu mi compañera a yega na un asignacion nobo como pionero, nos tabatin solamente un poco berdura, un paki di margarina i ni un debchi. Anochi nos a come tur e cuminda i a bisa: ‘Awor nos no tin nada pa mañan.’ Nos a haci oracion tocante esei, i a bai drumi. Su siguiente mainta trempan, un Testigo local a bati na porta i a introducí su mes, bisando: ‘Mi a pidi Jehova p’e manda pionero. Awor mi por compañá boso mayor parti dje dia, pero como cu mi ta biba den cunucu, lo mi tin cu come merdia huntu cu boso, p’esei mi a bin cu cuminda pa nos tur.’ Tabata un cantidad grandi di carni i berdura.” Nada straño cu Jesus a sigurá nos cu nos por ‘stop di ta anshá tocante nos alma’! Anto el a agregá: “Cua di boso, dor di ta anshá, por agregá un codo na e duracion di su bida?”—Mat. 6:25, 27.
8 E mundu rond di nos ta birando mas i mas materialista. Tin mas i mas presion riba nos pa bira mescos. Sin embargo, si nos ta humilde i tin aprecio pa e ministerio di tempu completo, nos lo keda contentu cu ménos materialmente. (1 Tim. 6:8) Pioneronan cu ta mantené nan bida simpel i ordená tin mas tempu pa sirbishi i ta adkerí mayor goso i fortalesa spiritual dor di siña otro hende e berdad. Aunke nan no ta purba di hiba un bida asético, esta, sin ningun goso of placer, tog nan moda balansá di trata cu nan situacion económico a capacitá nan pa disfrutá dje bendicionnan di traha pionero.
9 Si bo tin un sintimentu masha fuerte cu nos ta bibando den e último dianan i cu tempu ta cabando pa e mundu malbado aki, lo bo ta spiritualmente motivá pa haci e sacrificionan necesario pa predicá e bon nobo na tur oportunidad. Dor di bolbe analisá bo situacion económico i dor di pone e asuntu den man di Jehova, tal bes bo ta realisá cu bo por traha den e sirbishi di tempu completo. Asta si bo tin cu pone cierto deseonan material un banda pa por traha pionero, lo bo disfrutá di bendicionnan ricu di parti di Jehova.—Sal. 145:16.
PREGUNTA 3: “Como tiener, pakico mi tin cu considerá e sirbishi di pionero como un posibel carera?”
10 Ora bo ta den bo último añanan di scol, ta normal cu bo ta pensa riba bo futuro. Bo kier pa e ta sigur, felis i satisfaciente. Tal bes conseheronan di scol ta purba dirigí bo den direccion di un carera lucrativo cu ta exigí añanan di educacion universitario. Bo concenshi cristian bon-entrená ta bisá bo cu bo mester prepará pa sirbi Jehova mas completo posibel. (Ecl. 12:1) Kisas bo tin pensá tambe pa cu tempu casa i forma un famia. Kico lo bo haci?
11 E decisionnan cu bo tuma awor aki den bo bida por determiná henter bo futuro. Si ya caba bo ta un Testigo di Jehova dedicá i bautisá, bo a entregá bo mes di henter alma na Jehova. (Heb. 10:7) E promé chens cu bo haña, purba traha pionero auxiliar pa un of mas luna. Esaki lo duná bo un idea dje goso i responsabilidadnan cu e trabou di pionero regular ta trece cuné. Sin duda esei lo yudá bo mira mas cla kico bo tin cu haci cu bo bida. E ora ei, en bes di yena e bashí cu caba scol a laga cu un trabou seglar full-time, pakico no cuminsá traha pionero regular? Algun ruman cu a warda te mas despues den bida pa disfrutá dje sirbishi di pionero ta lamentá cu nan no a cuminsá mas promé.
12 Como hóben, probechá di bo oportunidad di keda soltero i disfrutá dje beneficionan cu esei ta duná bo den e actividad di predicá di tempu completo. Si bo ta deseá di casa un dia, bo no por pone un mihó fundeshi pa bo matrimonio cu sirbi promé den e trabou di pionero regular. Segun bo ta crece na madures i den spiritualidad, bo por scoge pa haci e trabou di pionero bo carera huntu cu un casá cu ta pensa mescos cu bo. Algun pareha cu a traha pionero huntu, a bai den e trabou di circuito of e campo di misionero. Un estilo di bida berdaderamente satisfaciente!
13 Sin importá pa cuantu tempu bo sigui traha pionero, lo bo a completá bo educacion i ricibí entrenamentu baliosísimo cu ningun otro trabou riba tera por duna. Traha pionero ta siñá bo disiplina, organisacion personal, con pa trata cu hende, dependé riba Jehova, i con pa desaroyá pacenshi i bondad—cualidadnan cu lo ekipá bo pa carga responsabilidadnan mas grandi.
14 Nunca promé bida tabata asina insigur pa humanidad. Apart di loke Jehova a primintí, masha poco cos ta ègt permanente. Ya cu bo tin henter un futuro bo dilanti, awor no ta e mihó tempu pa pensa seriamente riba loke lo bo haci cu bo bida den e añanan binidero? Evaluá e privilegio di traha pionero cuidadosamente. Nunca lo bo lamentá di a scoge e sirbishi di pionero como bo carera.
PREGUNTA 4: “No tin un presion constante pa yega e cantidad di ora? Kico si mi cai atras cu mi oranan?”
15 Ora bo ta yena un solicitud pa traha pionero regular, bo tin cu contestá e pregunta: “Bo a organisá bo asuntunan personal di tal manera cu bo por spera razonablemente di yega e rekisito anual di 1.000 ora?” Pa yegu’é, bo tin cu traha un promedio di tres ora pa dia den sirbishi. Ta bisto cu esaki ta rekerí un bon orario i disiplina propio. Mayoria pionero ta desaroyá un rutina práctico i factibel den un par di luna.
16 Sin embargo, ta berdad loke Eclesiástes 9:11 ta bisa: ‘Tempu i suceso imprevisto ta cai riba nos tur.’ Malesa grave of otro circunstancianan imprevisto por pone un pionero cai atras cu su oranan. Si e problema no ta unu cu ta dura largu i ta sosodé na comienso dje aña di sirbishi, un orario cu mas actividad kisas ta tur loke tin mester pa recuperá e oranan atrasá. Pero ki tal si un problema serio presentá djis un par di luna promé cu e aña di sirbishi terminá i e pionero no por recuperá e oranan atrasá?
17 Si bo ta malu temporalmente pa un par di luna of pa un otro motibu urgente fuera di bo control bo no por yega e oranan rekerí, bo por acercá un miembro dje Comité di Sirbishi di Congregacion i splik’é e problema. Si e ancianonan aki ta haña cu lo ta mihó pa lagá bo sigui den e sirbishi di pionero sin preocupá pa recuperá e oranan atrasá, nan por tuma e decision ei. E secretario lo marca riba e karchi di Registro di Publicadó di Congregacion cu bo no tin nodi recuperá e oranan atrasá. Esaki no ta un verlof sino, mas bien, ta tene consideracion special cu bo circunstancia.—Mira e suplemento di Nuestro Ministerio del Reino di augustus 1986, §18.
18 Pioneronan experenciá ta traha ora extra na comienso dje aña di sirbishi. Nan sirbishi di pionero tin e prioridad, di manera cu tin biaha nan ta haña ta necesario pa restringí actividadnan cu no ta esencial. Si un pionero cai atras debí na un mal orario of debí na falta di disiplina propio pa tene su mes na su orario, e mester sinti cu ta su responsabilidad pa recuperá e oranan atrasá i no spera consideracion special.
19 Tin biaha un pionero ta hañ’é cu un cambio inevitabel den su circunstancianan. Tal bes e ta haña cu pa un periodo largu di tempu e no por cumpli cu e rekisito di ora debí na un problema continuo di salú, mas responsabilidad di famia, etcétera. Den un caso asina, e curso sabí lo ta pa bolbe bek den e fila di publicadó i participá ki ora cu ta posibel den e sirbishi di pionero auxiliar. No tin un percuracion general pa permití un hende keda riba lista di pionero si su circunstancianan no ta permitié mas pa cumpli cu e rekisito di ora.
20 Nos ta spera cu e percuracion di duna consideracion special na esnan cu ta cualificá, lo stimulá mas ruman pa inscribí como pionero sin tin cu preocupá innecesariamente. Esei tambe mester animá esnan cu ya caba ta den sirbishi di tempu completo pa sigui traha pionero. Nos kier p’e pioneronan tin éxito den nan sirbishi di tempu completo.
PREGUNTA 5: “Mi kier logra algu i ser felis haciendo esei. E sirbishi di pionero lo satisfacé mi?”
21 Berdadero felicidad ta dependé pa gran parti di tin un relacion íntimo i personal cu Jehova i di ta convencí cu nos ta sirbié fielmente. Jesus a wanta un staca di tormento “p’e goso cu tabata poní su dilanti.” (Heb. 12:2) Su felicidad a bini di haci e boluntad di Dios. (Sal. 40:8) Den e actual sistema di cosnan, nos por disfrutá di berdadero felicidad, si mayor parti di nos actividadnan di bida ta relacioná cu nos adoracion na Jehova. Actividadnan spiritual ta duna nos un sentido di propósito, pasobra den nos curason nos sa cu nos ta haciendo loke ta corecto. Felicidad ta bini di duna, i nos sa cu no tin un mihó manera di duna nos mes cu siña otro hende con pa gana bida eterno den Dios su mundu nobo.—Echo. 20:35.
22 E pionero citá den e promé paragraf a splica esei asina aki: “Acaso por tin un goso mas grandi cu mira un persona cu ken bo ta studia bira un alabadó activo di Jehova? Ta excitante i fortalecedor di fe pa mira con poderoso e Palabra di Dios ta den motivá hende pa haci cambio den nan bida afin di agradá Jehova.” (Mira E Toren di Vigilancia di 15 di october 1997, página 18-23.) P’esei, kico ta haci abo felis? Si bo ta balorá actividadnan permanente cu ta bale la pena, en bes dje goso temporal cu mundu ta ofrecé, anto e trabou di pionero lo duná bo un sintimentu di logro cu ta maraviyoso i cu lo hací bo berdaderamente felis.
PREGUNTA 6: “Si e trabou di pionero no ta necesario pa haña bida eterno, no ta mi asuntu si mi ta hacié of no?”
23 Ta berdad, ta abo tin cu dicidí si bo ta traha pionero. Jehova so por husga bo circunstancia personal di bida. (Rom. 14:4) E tin tur derecho di verwagt cu bo ta sirbié cu henter bo curason, alma, mente i forsa. (Mar. 12:30; Gal. 6:4, 5) E ta stima un dunadó alegre, un cu ta sirbié cu goso, no di mala gana of obligá. (2 Cor. 9:7; Col. 3:23) Bo motibu pa traha den sirbishi di tempu completo mester ta cu bo ta stima Jehova i e hendenan den e teritorio. (Mat. 9:36-38; Mar. 12:30, 31) Si ta asina bo ta sinti, anto e sirbishi di pionero ta merecé bo consideracion serio.
24 Nos ta spera cu loke a ser describí aki lo yudá bo evaluá bo prospectonan pa traha pionero. Bo por ahustá bo circunstancianan pa traha pionero regular? Aki bou tin un kalender titulá “Mi Orario Semanal di Sirbishi di Pionero.” Wak si bo por yena un orario práctico pa bo mes cu lo permití bo traha rond di 23 ora pa siman den e ministerio. Anto, pone bo pleno fe i confiansa den Jehova. Cu su yudansa bo por logra! El a primintí: “Lo mi . . . realmente basha riba bo un bendicion te ora cu no tin mas mester.”—Mal. 3:10.
25 Pues nos ta puntra: “Sirbishi di pionero—algu pa bo?” Si bo por bisa “Sí,” pone un fecha pa pronto bo cuminsá traha como pionero regular i sea sigur cu Jehova lo bendicioná bo cu un bida yen di goso!
[Chart on page 6]
(For fully formatted text, see publication)
Mi Orario Semanal di Sirbishi di Pionero
DIALUNA: Sirbishi di veld mainta
DIAMARS: Sirbishi di veld mainta
DIARASON: Sirbishi di veld mainta
DIAHUEBS: Sirbishi di veld mainta
DIABIERNE: Sirbishi di veld mainta
DIASABRA: Sirbishi di veld mainta
DIADOMINGO: Sirbishi di veld mainta
DIALUNA: Sirbishi di veld atardi
DIAMARS: Sirbishi di veld atardi
DIARASON: Sirbishi di veld atardi
DIAHUEBS: Sirbishi di veld atardi
DIABIERNE: Sirbishi di veld atardi
DIASABRA: Sirbishi di veld atardi
DIADOMINGO: Sirbishi di veld atardi
DIALUNA: Sirbishi di veld anochi
DIAMARS: Sirbishi di veld anochi
DIARASON: Sirbishi di veld anochi
DIAHUEBS: Sirbishi di veld anochi
DIABIERNE: Sirbishi di veld anochi
DIASABRA: Sirbishi di veld anochi
DIADOMINGO: Sirbishi di veld anochi
Usa un potlot pa yena bo orario pa cada dia di siman.
Programá un total di rond di 23 ora pa siman den sirbishi di veld. Total di ora semanal programá _________________